ହିଞ୍ଜିଳିକାଟୁ ୨୮।୪(ଦ୍ବିତୀକୃଷ୍ଣ ପଣ୍ଡା): ମୁଖ୍ୟମନ୍ତ୍ରୀ ତଥା ବିଜେଡି ଦଳର ସୁପ୍ରିମୋ ନବୀନ ପଟ୍ଟନାୟକ ୩୦ ଏପ୍ରିଲରେ ହିଞ୍ଜିଳି ବିଧାନସଭା ପାଇଁ ନାମାଙ୍କନପତ୍ର ଦାଖଲ କରିବେ। ଏହି ନାମାଙ୍କନ ପୂର୍ବରୁ ରାଲିରେ ଯୋଗ ଦେବା ନିମନ୍ତେ ରବିବାର ହିଞ୍ଜିଳିକାଟୁ ବ୍ଲକ କୁରେଇଶୁଣୀ ଠାରେ ଏକ ପୂର୍ବ ପ୍ରସ୍ତୁତି ବୈଠକ ହୋଇଯାଇଛି। ତେବେ ଗତ ୨୪ ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ହିଞ୍ଜିଳିରୁ ପ୍ରଚାର ଆରମ୍ଭ ବେଳେ ଅନୁଷ୍ଠିତ ସଭା ମଞ୍ଚ ଉପରେ ଅଞ୍ଚଳର କିଛି ଆଗ ଧାଡ଼ିର ବିଜେଡ଼ି ନେତାଙ୍କୁ ମୁଖ୍ୟମନ୍ତ୍ରୀଙ୍କ ସହ ବସିବାକୁ ସୁଯୋଗ ପାଇ ନ ଥିଲେ। ଏହାକୁ ନେଇ ରବିବାର ସମାବେଶରେ ହୋହଲ୍ଲା ହୋଇଥିଲା। ଜଣେ ପୂର୍ବତନ ସରପଞ୍ଚ ବିଷୋଦଗାର ପ୍ରକାଶ କରିଥିଲେ। ହିଞ୍ଜିଳି ସାଙ୍ଗଠନିକ ଦାୟିତ୍ୱରେ ଥିବା ନେତାତ୍ମାନେ ଜାଣିଶୁଣି କିଛି ନେତା ଓ ଅଞ୍ଚଳକୁ ଅଣଦେଖା କରୁଛନ୍ତି ବୋଲି ଅଭିଯୋଗ କରିଛନ୍ତି। ବିଶେଷ କରି ଗତ ୨୪ ମୁଖ୍ୟମନ୍ତ୍ରୀଙ୍କ ସଭା ମଞ୍ଚ ଉପରେ ପୂର୍ବତନ ବ୍ଲକ ଅଧ୍ୟକ୍ଷ ଓ ନଗରପାଳଙ୍କୁ ସ୍ଥାନ ନ ମିଳିଥିବାରୁ ଅସନ୍ତୋଷ ପ୍ରକାଶ ପାଇଛି। ଏ ସମ୍ପର୍କିତ ଏକ ଭିଡିଓ ବିଭିନ୍ନ ସାମାଜିକ ଗଣମାଧ୍ୟମଗୁଡିକ ରେ ଭାଇରାଲ ହୋଇଛି। ତେବେ କିଛି ନେତାଙ୍କ ସହ ଯୋଗାଯୋଗ ପରେ ପାଟିତୁଣ୍ଡ ହୋଇନାହିଁ ବୋଲି ସଫେଇ ଦେଇଥିବାସ୍ଥଳେ କିଛି ଆଲୋଚନା ମାଧ୍ୟମରେ ସମାଧାନ ହେବ ବୋଲି ସେମାନଙ୍କର ନାମ ପ୍ରକାଶ ନ କରିବା ସର୍ତ୍ତରେ କହିଛନ୍ତି।
ପ୍ରକାଶ ଯେ, ଆସନ୍ତା ୩୦ରେ ମୁଖ୍ୟମନ୍ତ୍ରୀ ତଥା ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ ନିଜ ପାରମ୍ପରିକ ବିଧାନସଭା ଆସନ ହିଞ୍ଜିଳି ପାଇଁ ନାମାଙ୍କନପତ୍ର ଦାଖଲ କରିବେ। ସେହି ଦିନ ପୂର୍ବାହ୍ନ ୧୧.୧୫ରେ ସେ ପ୍ରଥମେ ତାରା ତାରିଣୀ ମନ୍ଦିର ଦର୍ଶନ ପାଇଁ ଯିବେ। ସେଠାରୁ ଛତ୍ରପୁର ଉପଜିଲ୍ଲାପାଳଙ୍କ ଅଫିସରେ ମଧ୍ୟାହ୍ନ ୧୨.୩୫ରେ ପହଞ୍ଚି ନାମାଙ୍କନପତ୍ର ଦାଖଲ କରିବେ। ମୁଖ୍ୟମନ୍ତ୍ରୀଙ୍କ ଏହି ନାମାଙ୍କନ ଦାଖଲ ବେଳେ ହିଞ୍ଜିଳି ଅଞ୍ଚଳର ବହୁ ନେତା ଓ କର୍ମୀମାନେ ଯୋଗଦେବାକୁ ଦଳ ପକ୍ଷରୁ ପ୍ରାକ ପ୍ରସ୍ତୁତି ବୈଠକ କରାଯାଇଛି।
