ରାଉରକେଲା,୧୫ା୧୧(ବିପ୍ଳବ ରଞ୍ଜନ ଦାଶ): ଓଡ଼ିଶାର ମାନ୍ୟବର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଶନିବାର ରାଉରକେଲାକୁ ଦ୍ୱିତୀୟ ଥର ଗସ୍ତ କରିଛନ୍ତି। ଅପରାହ୍ନ ୧ଟାରେ ମାନ୍ୟବର ମୁଖ୍ୟମନ୍ତ୍ରୀ ରାଉରକେଲା ବିମାନ ବନ୍ଦରରେ ଅବତରଣ କରିବା ପରେ ସ୍ଥାନୀୟ ଭାଜପା ନେତା ଓ କର୍ମୀମାନେ ତାଙ୍କୁ ଭବ୍ୟ ସ୍ବାଗତ କରିଥିଲେ। ଏଥିସହିତ ସୁନ୍ଦରଗଡ଼ ଜିଲାପାଳ ଡକ୍ଟର ଶୁଭଙ୍କର ମହାପାତ୍ର, ପଶ୍ଚିମାଞ୍ଚଳ ଡିଆଇଜି ବ୍ରିଜେଶ ରାୟ, ରାଉରକେଲା ଆରକ୍ଷୀ ଅଧୀକ୍ଷକ ନିତେଶ ଔଧଓ୍ବାନୀ ମଧ୍ୟ ବିମାନ ବନ୍ଦରଠାରେ ଉପସ୍ଥିତ ରହି ମୁଖ୍ୟମନ୍ତ୍ରୀଙ୍କ ସୁରକ୍ଷା ଉପରେ କଡ଼ା ନଜର ରଖିଥିଲେ। ପରେ ମାନ୍ୟବର ମୁଖ୍ୟମନ୍ତ୍ରୀ ଛେଣ୍ଡ୍ସ୍ଥିତ ହକି ଭିଲେଜରେ ଅଳ୍ପ ସମୟ ରହି ଅପରାହ୍ନ ୨ଟାରେ ସେକ୍ଟର-୧୩ସ୍ଥିତ ମେଳଣ ପଡ଼ିଆରେ ଜାତୀୟ ଜନଜାତି ଗୌରବ ଦିବସ-୨୦୨୫ ପାଳନ ସଭା ଅଭିମୁଖେ ଯାତ୍ରା କରିଥିବା ବେଳେ ମୁଖ୍ୟମନ୍ତ୍ରୀଙ୍କୁ ସଭାସ୍ଥଳ ମୁଖ୍ୟ ଫାଟକରେ ଭବ୍ୟ ସ୍ବାଗତ କରା ଯାଇଥିଲା।
ଏଥିସହ ଏହି ବିଶେଷ ମୁହୂର୍ତ୍ତକୁ ବିଶେଷ ଆକର୍ଷଣ କରିବା ପାଇଁ ସୁନ୍ଦରଗଡ଼ ତଥା ରାଉରକେଲାର ବିଭିନ୍ନ ଜନଜାତି ଓ ଆଦିବାସୀ ବର୍ଗ ନୃତ୍ୟ ଅନୁଷ୍ଠାନର ନୃତ୍ୟଶିଳ୍ପୀମାନଙ୍କ ଦ୍ୱାରା ବିଭିନ୍ନ ଆଦିବାସୀ ପାରମ୍ପାରିକ ନୃତ୍ୟ ପରିବେଷଣ ହୋଇଥିଲା। ବିଶେଷକରି ବିବାହ ସମୟରେ ଆଦିବାସୀମାନଙ୍କର ଦ୍ୱାରା ପ୍ରସ୍ତୁତ ହେଉଥିବା କଇଁଚି ନାଚ, ଧାଡ଼ିନାଚ ସହିତ ଓରାମ ନାଚ ବେଶ୍ ଚିତ୍ତାକର୍ଷକ ସାଜିଥିବାବେଳେ, ମାନ୍ୟବର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଦିବାସୀ ଜନଜାତିଙ୍କ ସାଂସ୍କୃତିକ ନୃତ୍ୟ ଭାରତୀୟ ସଂସ୍କୃତିର ଏକ ଅବିଚ୍ଛିନ୍ନ ଅଙ୍ଗ ବୋଲି କହି ବେଶ୍ ପ୍ରଶଂସା କରିଥିଲୋ। ପରେ ମୁଖ୍ୟମନ୍ତ୍ରୀ କେନ୍ଦ୍ରମନ୍ତ୍ରୀ ଜୁଏଲ ଓରାମଙ୍କର ସହ ସଭାସ୍ଥଳ ଅଭିମୁଖେ ଯାତ୍ରା କରିଥିଲେ।
