ରାୟପୁର,୯।୮: ଛତିଶଗଡରେ ବିଧାନସଭା ନିର୍ବାଚନର ୩ମାସ ପୂର୍ବରୁ ବାହୁଜନ ସମାଜ ପାର୍ଟି (ବିଏସପି) ଏହାର କାର୍ଡ ଖୋଲିଛି। ରାଜ୍ୟରେ ବିଏସପି ସର୍ବ ପ୍ରଥମେ ନିଜର ପ୍ରାର୍ଥୀ ଘୋଷଣା କରିଛି। ପ୍ରଥମ ପର୍ଯ୍ୟାୟରେ ୯ଟି ବିଧାନସଭା ଆସନ ପାଇଁ ପ୍ରାର୍ଥୀଙ୍କ ନାମ ଘୋଷଣା କରାଯାଇଛି। ଏଥିରେ ବିଏସପି ୨ ଜଣ ବିଧାୟକଙ୍କୁ ପୁଣି ଟିକେଟ୍ ଦେଇଛି। ଜୈଜେଇପୁର ବିଧାୟକ କେଶବ ପ୍ରସାଦ ଚନ୍ଦ୍ର ଏବଂ ପାମଗଡ ବିଧାୟକ ଇନ୍ଦୁ ବଞ୍ଜାରେଙ୍କୁ ଦଳ ପୁଣି ଥରେ ଟିକେଟ୍ ଦେଇଛି।
ମଙ୍ଗଳବାର ବାହୁଜନ ସମାଜ ପାର୍ଟି ୭ଟି ଜିଲାର ୯ଜଣ ପ୍ରାର୍ଥୀଙ୍କ ଟିକେଟ ଚୂଡାନ୍ତ କରିସାରିଛି। ବିଏସପି ରାଜ୍ୟ ସଭାପତି ହେମନ୍ତ ପୋୟାମ ପ୍ରାର୍ଥୀଙ୍କ ତାଲିକା ପ୍ରକାଶ କରିଛନ୍ତି। ଏଥିରେ ବିଲାସପୁର, ବେମେତରା, ଯଞ୍ଜଗିର ଚମ୍ପା, ଶକ୍ତି, ସରଙ୍ଗଡ, ବିଲାଇଗଡ ଏବଂ ବଳରାମପୁର ଜିଲାର ୯ଜଣ ପ୍ରାର୍ଥୀଙ୍କ ନାମ ରହିଛି। ମସ୍ତୁରୀ ବିଧାନସଭା ଏସସି ଆସନ ପାଇଁ ଦାଉରାମ ରତ୍ନାକରଙ୍କୁ ପ୍ରାର୍ଥୀ କରାଯାଇଛି। ସେହିଭଳି ନବାଗଡ ଏସସି ଆସନରେ ଓମପ୍ରକାଶ ବାଚପେୟୀ, ଯଞ୍ଜଗିର ଚମ୍ପା ଜେନେରାଲ ଆସନରେ ରାଧେଶ୍ୟାମ ସୂର୍ଯ୍ୟବଂଶୀ, ଜୈଜେଇପୁର ଜେନେରାଲ ଆସନରେ କେଶବ ପ୍ରସାଦ ଚନ୍ଦ୍ର, ପାମଗଡ ଏସସି ଆସନରେ ଇନ୍ଦୁ ବଞ୍ଜାରେ, ଅକଳତରା ଜେନେରାଲ ଆସନରେ ବିନୋଦ ଶର୍ମା, ବିଲାଇଗଡ ଜେନେରାଲ ଏସସିରେ ଶ୍ୟାମ ଟଣ୍ଡନ, ବେଲତରା ଜେନେରାଲ ଆସନରେ ରାମକୁମାର ସୂର୍ଯ୍ୟବଂଶୀ ଏବଂ ସମରୀ ଏସଟି ଆସନରେ ଆନନ୍ଦ ତିଗାଙ୍କୁ ଦଳ ବିଶ୍ୱାସ କରିଛି।
