ଛତ୍ରପୁର,୨୨।୧୨(ଦିଲ୍ଲୀପ ସାମଲ): ଅଦିନିଆ ବର୍ଷା ଉଜାଡ଼ି ଦେଇଛି ଚାଷୀର ବର୍ଷକର ଦାନାପାଣି। କଟା ହୋଇଥିବା ଧାନ ନା ମଣ୍ଡିକୁ ଯାଇପାରିଛି ନା ଖଳାକୁ। କ୍ଷେତ ମଝିରେ ସୁନାର ଫସଲ ବରବାଦ ହୋଇଯାଇଛି। ବତୁରି ଯାଇଛି କଟା ହୋଇଥିବା ଧାନ। ୨ ଦିନର କୋହଲା ପାଗ ସାଙ୍ଗକୁ ଝିପିଝିପି ବର୍ଷା ଭାତ ହାଣ୍ଡିକୁ ଉଜାଡ଼ି ଦେବା ପରେ ଏବେ ନିରାଶ ହୋଇପଡ଼ିଛନ୍ତି ଚାଷୀକୂଳ। ଅମଳ ବେଳକୁ ଅଦିନିଆ ବର୍ଷାରେ ଅକଲ ଗୁଡୁମ ଅବସ୍ଥା।
ଗଞ୍ଜାମ ଜିଲାର ସମସ୍ତ ଅଞ୍ଚଳ ସହ ଛତ୍ରପୁର ବ୍ଲକ ଅଞ୍ଚଳରେ ଅମଳ ଧାନ ଗଜା ହେବା ପ୍ରାୟ ସୁନିଶ୍ଚିତ। ଛତ୍ରପୁର ବ୍ଲକର ବଡମାଧପୁର, ଗୋବା, ବରଙ୍ଗ , ପୋଟଲାମପୁର, ବଉଳଗାଁ, ମହାନାଦପୁର, ବିପୁଳିଙ୍ଗି, ଭିକାରୀପଲ୍ଲି, ଅଗସ୍ତି ନୂଆଗାଁ, ପୋଡାପଦର ଆଦି ଅଞ୍ଚଳର ଚାଷୀ ବିଶେଷ ପ୍ରଭାବିତ ହୋଇଛନ୍ତି। କେବଳ ଏତିକି ନୁହେଁ ଏଠାକାର ଅଞ୍ଚଳରେ ଅଧିକାଂଶ ଲୋକ କଞ୍ଚାଲଙ୍କା, ଚିନାବାଦାମ ଆଦି ଫସଲ କରନ୍ତି। ହେଲେ ଅଦିନିଆ ଲଘୁଚାପ ଜନିତ ବର୍ଷା ଯୋଗୁ ଏହା ସମ୍ପୂର୍ଣ୍ଣ ନଷ୍ଟ ହୋଇଯାଇଛି।
ରବିବାର ବଡମାଧପୁର ଛତ୍ରପୁର ବ୍ଲକ ଅଞ୍ଚଳର ବିଭିନ୍ନ ଗାଁକୁ ବୁଲି ଛତ୍ରପୁର ବିଧାୟକ କୃଷ୍ଣଚନ୍ଦ୍ର ନାୟକ ଏହାର ସମୀକ୍ଷା କରିଛନ୍ତି। କ୍ଷୟକ୍ଷତିର ଆକଳନ କରିବା ପାଇଁ ସମ୍ପୃକ୍ତ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ଚଳିତ ବର୍ଷ ଗଞ୍ଜାମ ଜିଲାରେ ଡିସେମ୍ବର ୨୩ ତାରିଖରୁ ମଣ୍ଡି ଆରମ୍ଭ ହେବାକୁ ଥିବା ବେଳେ ଅଧିକାଂଶ ଚାଷୀଙ୍କ ଚାଷ ଜମିରେ ପାଣି ଜମି ପାଚିଲା ଧାନ ନଷ୍ଟ ହୋଇଯାଇଛି। ଏହି ଲଘୁଚାପ ଜନିତ ଅଦିନିଆ ବର୍ଷା ଚାଷୀଙ୍କୁ ଦେଇଛି ଅସରନ୍ତି ଦୁଃଖ। ମିଲରମାନେ ଚାଷୀଙ୍କୁ ଏଫଏକ୍ୟୁ ମାନର ଧାନ ମାଗିଲେ ଦବା ଅସମ୍ଭବ। ଏଣୁ ଧାନ କିଣାରେ ଏଫଏକ୍ୟୁ ମାନ କୋହଳ ସହ ଯଥାଶୀଘ୍ର କ୍ଷୟକ୍ଷତିର ଆକଳନ କରି କ୍ଷତିପୂରଣ ଦେବା ପାଇଁ ଦାବି କରିଛନ୍ତି।
