କେନ୍ଦୁଝର,୬ା୩ (ସ୍ବ.ପ୍ର.): ଗତ ଜାନୁୟାରୀ ୨୬ ତାରିଖ ସରସ୍ବତୀ ପୂଜା ଦିନ କେନ୍ଦୁଝର ଜିଲା ହରିଚନ୍ଦନପୁର ବ୍ଲକ ଅନ୍ତର୍ଗତ ସେଣ୍ଟ ଜାଭିୟର ସ୍କୁଲରେ ଜଣେ ୬୦ ବର୍ଷୀୟ ରୋଷେୟା ଜଣେ ଛାତ୍ରୀଙ୍କୁ ବଳାତ୍କାର କରିଥିଲେ। ଘଟଣା ପରେ ସ୍କୁଲ ବନ୍ଦ ରହିଥିବା ବେଳେ ରୋଷେୟା ସହିତ ସ୍କୁଲ ମାଲିକଙ୍କୁ ପୋଲିସ ଗିରଫ କରିଥିଲା। ଘଟଣା ପରେ ଶିକ୍ଷା ବିଭାଗ ପକ୍ଷରୁ ସ୍କୁଲର ବୈଦ୍ଧତାକୁ ନେଇ ଯାଞ୍ଚ କରାଯାଇଥିଲା। ଯାଞ୍ଚରେ ଉକ୍ତ ସ୍କୁଲ ବିନା ପଞ୍ଜୀକରଣରେ ଚାଲିଥିବା ଜଣାପଡ଼ିଛି। ଏନେଇ ବ୍ଲକ୍ ଶିକ୍ଷା ଅଧିକାରୀ ଏକ ଯାଞ୍ଚ ରିପୋର୍ଟ ମାନବାଧିକାର କମିଶନକୁ ପ୍ରଦାନ କରିଛନ୍ତି।
ଉକ୍ତ ରିପୋର୍ଟ ଅନୁଯାୟୀ, ସ୍କୁଲରେ ଏକ ଶହରୁ ଊର୍ଦ୍ଧ୍ୱ ପିଲା ପଢୁଥିଲେ। ମାତ୍ର ଅନୁମତି ପତ୍ର ନ ଥିବା ସହ ଚଳିତ ଶିକ୍ଷା ବର୍ଷରେ ଆବେଦନ କରାଯାଇ ନ ଥିଲା ବୋଲି ଦର୍ଶାଯାଇଛି। ତେବେ ବିନା କନସେଣ୍ଟ ଅଫ ରେଜିଷ୍ଟ୍ରେସନ (ସିଓଆର)ରେ କିପରି ଏହି ଆବାସିକ ସ୍କୁଲ ଚାଲିଆସୁଥିଲା ତାହା ଶିକ୍ଷା ବିଭାଗର କାମକାର୍ଯ୍ୟକୁ ପଦାରେ ପକାଇଛି। ଶିକ୍ଷା ଅଧିକାର ଆଇନ ୨୦୦୯ ଅନୁଯାୟୀ ବିନା ସିଓଆରରେ କୌଣସି ସ୍କୁଲ ଚାଲୁଥିଲେ ଏକ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା ବ୍ୟବସ୍ଥା ରହିଥିବା ମାନବାଧିକାର କର୍ମୀ ହିମାଂଶୁ ଶେଖର ନାଏକ ସୂଚନା ଦେଇଛନ୍ତି। ବିନା ଅନୁମତିରେ ସ୍କୁଲ ଚଲାଇ ମନ ଇଛା ଫି ଆଦାୟ କରାଯାଉଛି। ଏନେଇ ଧରପଗଡ଼ ହେବା ଜରୁରୀ ବୋଲି ପୂର୍ବତନ ପ୍ରଧାନଶିକ୍ଷକ ରମେଶ ଚନ୍ଦ୍ର ହୋତା କହିଛନ୍ତି। ଏଭଳି କ୍ଷେତ୍ରରେ ଧରା ସମ୍ପୃକ୍ତ ଅଞ୍ଚଳର ଶିକ୍ଷା ବିଭାଗର ଅଧିକାରୀମାନଙ୍କ ବିରୋଧରେ ଦୃଷ୍ଟାନ୍ତ ମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି।
