ନୂଆଦିଲ୍ଲୀ,୨୬।୨: ଏଥର ପଡ଼ୋଶୀ ଦେଶ ପାକିସ୍ତାନ ଚାମ୍ପିଅନ୍ସ ଟ୍ରଫିର ଆୟୋଜକ ସାଜିଛି। ପ୍ରାୟ ୨୯ ବର୍ଷ ପରେ କୌଣସି ଟୁର୍ନାମେଣ୍ଟର ଆୟୋଜକ ଦାୟିତ୍ୱ ପାକିସ୍ତାନକୁ ମିଳିଛି, ହେଲେ ଏହାର ଟିମ୍ ଟୁର୍ନାମେଣ୍ଟରୁ ବାଦ୍ ପଡ଼ିଛି। ଏସବୁ ମଧ୍ୟରେ ଚାମ୍ପିଅନ୍ସ ଟ୍ରଫିକୁ ନେଇ ନୂଆ ବିବାଦ ସାମ୍ନାକୁ ଆସିଛି। ଏଠାରେ ୧୦୦ରୁ ଅଧିକ ପୋଲିସ କର୍ମଚାରୀ ଟୁର୍ନାମେଣ୍ଟରେ ଡ୍ୟୁଟି କରିବାକୁ ମନା କରିଦେଇଛନ୍ତି।
ଜାତୀୟ ଗଣମାଧ୍ୟମ ରିପୋର୍ଟ ମୁତାବକ, ପାକିସ୍ତାର ପଞ୍ଜାବ ଅଞ୍ଚଳର ୧୦୦ରୁ ଅଧିକ ପୋଲିସ କର୍ମଚାରୀଙ୍କୁ ନିଲମ୍ବିତ କରାଯାଇଛି। କାରଣ ସେମାନେ ଚାମ୍ପିଅନ୍ସ ଟ୍ରଫି ସମୟରେ ଡ୍ୟୁଟି କରିବାକୁ ମନା କରିଦେଇଥିଲେ। ଏହି ପୋଲିସ କର୍ମଚାରୀମାନେ ଲାହୋରର ଗଦ୍ଦାଫି ଷ୍ଟାଡିୟମରୁ ହୋଟେଲ୍ ଯାଏ ଦଳର ସୁରକ୍ଷା ଲାଗି ନିୟୋଜିତ ହୋଇଥିଲେ। ତେବେ ସେ ଅଧିକ ସମୟ ଡ୍ୟୁଟି କରିବା ଯୋଗୁ ଅତ୍ୟଧିକ ବୋଝ ଅନୁଭବ କରୁଥିଲେ।
ପଞ୍ଜାବ ପୋଲିସର ଜଣେ ଅଧିକାରୀ କହିଛନ୍ତି, ପୋଲିସ କର୍ମଚାରୀମାନେ ଷ୍ଟାଡିୟମରୁ ହୋଟେଲ୍ଗୁଡ଼ିକ ମଧ୍ୟରେ ଖେଳାଳିମାନେ ଯାତ୍ରା କରିବା ସମୟରେ ସୁରକ୍ଷା ପ୍ରଦାନ କରିବାକୁ ନିୟୋଜିତ ହୋଇଥିଲେ। ହେଲେ ସେ ଅନୁପସ୍ଥିତ ରହିବା ସହ ନିଜ ଦାୟିତ୍ୱ ସମ୍ପାଦନ କରିବାକୁ ମନା କରିଥିଲେ। ଏନେଇ ଆଇଜିପି ପଞ୍ଜାବ ଉସମାନ ଅନଓ୍ବର ଙ୍କ ନିକଟରେ ଅଭିଯୋଗ ପହଞ୍ଚିବା ପରେ ସେ ପୋଲିସ କର୍ମଚାରୀଙ୍କ ଉପରେ କଠୋର କାର୍ଯ୍ୟାନୁଷ୍ଠାନର ଆଦେଶ ଦେଇଛନ୍ତି। ଯେତେବେଳେ ଅନ୍ତର୍ଜାତୀୟ ଟୁର୍ନାମେଣ୍ଟରେ ସୁରକ୍ଷା ପ୍ରସଙ୍ଗ ଉଠେ, ସେତେବେଳେ ଅବହେଳାର ପ୍ରଶ୍ନ ନ ଥାଏ ବୋଲି ସେ କହିଛନ୍ତି।
