ରାଞ୍ଚି,୨୯।୮: ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଚମ୍ପାଇ ସୋରେନ ୩୦ ଅଗଷ୍ଟ ଅର୍ଥାତ୍ ଶୁକ୍ରବାର ଭାଜପାରେ ଯୋଗଦେବାକୁ ଯାଉଛନ୍ତି। ଏହାପୂର୍ବରୁ ଚମ୍ପାଇ ସୋରେନ ଝାଡଖଣ୍ଡ ମୁକ୍ତି ମୋର୍ଚ୍ଚାର ପ୍ରାଥମିକ ସଦସ୍ୟତା ସମେତ ସମସ୍ତ ପଦବୀରୁ ଇସ୍ତଫା ଦେଇଛନ୍ତି। ଏହା ପରେ ଶିବୁ ସୋରେନଙ୍କୁ ଏକ ଭାବପ୍ରବଣ ଚିଠି ଲେଖିଛନ୍ତି। ନିଜ ଭାବନାକୁ ପ୍ରକାଶ କରି ଚମ୍ପାଇ ସୋରେନ ଲେଖିଛନ୍ତି ଯେ, ସେ ଦଳରୁ ଅଲଗା ହେବେ ବୋଲି ସେ କେବେ ସ୍ବପ୍ନରେ ମଧ୍ୟ ଭାବିନଥିଲେ। ଶିବୁ ସୋରେନଙ୍କୁ ଲେଖାଯାଇଥିବା ଚିଠିରେ ସେ ଲେଖିଛନ୍ତି – ଆପଣ ବର୍ତ୍ତମାନ ରାଜନୀତିଠାରୁ ଦୂରରେ ଅଛନ୍ତି ଏବଂ ଆପଣଙ୍କ ବ୍ୟତୀତ ଦଳରେ ଆଉ କେହି ନାହାଁନ୍ତି ଯାହାଙ୍କୁ ଆପଣ ନିଜର ଯନ୍ତ୍ରଣା ପ୍ରକାଶ କରିପାରିବେ।
ଚମ୍ପାଇ ସୋରେନ ତାଙ୍କ ଟୁଇଟ୍ରେ ଲେଖିଛନ୍ତି ଯେ ଆଜି ମୁଁ ପ୍ରାଥମିକ ସଦସ୍ୟତା ଏବଂ ଝାଡଖଣ୍ଡ ମୁକ୍ତି ମୋର୍ଚ୍ଚାର ସମସ୍ତ ପଦରୁ ଇସ୍ତଫା ଦେଇଛି। ଆଦିବାସୀ, ଦଳିତ, ପଛୁଆ ଲୋକ ଏବଂ ଝାଡଖଣ୍ଡର ସାଧାରଣ ଲୋକଙ୍କ ପ୍ରସଙ୍ଗରେ ଆମର ସଂଗ୍ରାମ ଜାରି ରହିବ। ଏହା ପରେ ଚମ୍ପାଇ ସୋରେନ ଏକ୍ସରେ ତାଙ୍କ ଇସ୍ତଫା ପତ୍ର ଶେୟାର କରିଥିଲେ।
ଚମ୍ପାଇ ଲେଖିଛନ୍ତି, ସମ୍ମାନିତ ଗୁରୁଜୀ, ନମସ୍କାର। ମୁଁ ଚମ୍ପାଇ ସୋରେନ, ଝାଡଖଣ୍ଡ ମୁକ୍ତି ମୋର୍ଚ୍ଚାର ବର୍ତ୍ତମାନର କାର୍ଯ୍ୟ ଶୈଳୀ ଏବଂ ନୀତିରେ ଅସନ୍ତୁଷ୍ଟ ହୋଇ ଦଳ ଛାଡିବାକୁ ବାଧ୍ୟ ହୋଇଛି। ଏହା ଅତ୍ୟନ୍ତ ଦୁଃଖର ସହିତ ମୋତେ କହିବାକୁ ପଡୁଛି ଯେ ଆପଣଙ୍କ ମାର୍ଗଦର୍ଶନରେ, ଦଳ ପାଇଁ ଯେଉଁ ସ୍ବପ୍ନ ଦେଖିଥିଲି ତାହା ପୂରଣ ହୋଇପାରିଲା ନାହିଁ। ଜେଏମଏମ ମୋ ପାଇଁ ଏକ ପରିବାର ପରି ଥିଲା ଏବଂ ମୁଁ କେବେ ସ୍ବପ୍ନରେ ମଧ୍ୟ ଭାବି ନଥିଲି ଯେ ମୋତେ ଦଳ ଛାଡିବାକୁ ପଡିବ। କିନ୍ତୁ, ଗତ କିଛି ଦିନର ଘଟଣା ହେତୁ ମୋତେ ଏହି କଷ୍ଟଦାୟକ ନିଷ୍ପତ୍ତି ନେବାକୁ ପଡିଛି।
ଚମ୍ପାଇ ଆହୁରି ଲେଖିଛନ୍ତି, ବର୍ତ୍ତମାନର ଆପଣଙ୍କର ସ୍ବାସ୍ଥ୍ୟ ସମସ୍ୟା ହେତୁ ଆପଣ ସକ୍ରିୟ ରାଜନୀତିରୁ ଦୂରରେ ଅଛନ୍ତି ଏବଂ ଆପଣଙ୍କ ବ୍ୟତୀତ ପାର୍ଟିରେ ଏପରି କୌଣସି ଫୋରମ ନାହିଁ ଯେଉଁଠାରେ ଆମେ ଆମର ଯନ୍ତ୍ରଣା ପ୍ରକାଶ କରିପାରିବୁ। ଏହି କାରଣରୁ ମୁଁ ଝାଡଖଣ୍ଡ ମୁକ୍ତି ମୋର୍ଚ୍ଚାର ପ୍ରାଥମିକ ସଦସ୍ୟ ଏବଂ ପଦରୁ ଇସ୍ତଫା ଦେଉଛ। ଆପଣଙ୍କ ମାର୍ଗଦର୍ଶନରେ, ମୁଁ ଝାଡଖଣ୍ଡ ଆନ୍ଦୋଳନ ସମୟରେ ଏବଂ ପରେ ଜୀବନରେ ବହୁତ କିଛି ଶିଖିବାର ସୁଯୋଗ ପାଇଛି । ଆପଣ ସର୍ବଦା ମୋର ମାର୍ଗଦର୍ଶକ ହୋଇ ରହିବେ, ତେଣୁ ମୁଁ ନମ୍ରତାର ସହିତ ଆପଣଙ୍କୁ ମୋର ଇସ୍ତଫା ଗ୍ରହଣ କରିବାକୁ ଅନୁରୋଧ କରୁଛି।
