ନବରଙ୍ଗପୁର,୧୦ା୧୨(ବି.ପ୍ର.): ନବରଙ୍ଗପୁର ଜିଲାର ଲୋକ ମହୋତ୍ସବ ମଣ୍ଡେଇ ଡିସେମ୍ବର ଶନିବାର ଠାରୁ ଆରମ୍ଭ ହେଉଛି। ଏହା ୧୪ ପର୍ଯ୍ୟନ୍ତ ମହା ଆଡମ୍ବରରେ ଆୟୋଜନ କରାଯିବ। ତେବେ ଏହି ମହୋତ୍ସବରେ ପୌରାଧ୍ୟକ୍ଷ, ଉପାଧ୍ୟକ୍ଷା ଓ କାଉନସିଲର ମାନଙ୍କୁ ଅଣଦେଖା କରାଯାଇଥିବା ଅଭିଯୋଗ ହୋଇଛି। ଏହାର ପ୍ରତିବାଦରେ ନବରଙ୍ଗପୁର ପୌରାଧ୍ୟକ୍ଷ, ଉପାଧ୍ୟକ୍ଷା ଓ କାଉନସିଲର ମାନେ ଶୁକ୍ରବାର ପୌର କାର୍ଯ୍ୟାଳୟ ଠାରେ ପ୍ରତିବାଦ କରିଥିଲେ। ବିଗତ ମଣ୍ଡେଇ ମହୋତ୍ସବରେ ନବରଙ୍ଗପୁର ପୌରାଧ୍ୟକ୍ଷ ଏବଂ କାଉନସିଲରଙ୍କ ସହଯୋଗରେ ସହରରେ ବିଶାଳ ମଣ୍ଡେଇ ଶୋଭାଯାତ୍ରା ଆୟୋଜନ କରାଯାଉଥିଲା। ସମସ୍ତ କାଉନସିଲର ନିଜ ନିଜ ୱାର୍ଡରୁ ନିଜ ଖର୍ଚ୍ଚରେ ଶତାଧିକ ଲୋକଙ୍କୁ ନେଇ ବିଭିନ୍ନ ଲୋକନୃତ୍ୟର ଆୟୋଜନ କରିବା ସହ ମଣ୍ଡେଇ ଶୋଭାଯାତ୍ରାରେ ଅଂଶଗ୍ରହଣ କରି ଶୋଭାଯାତ୍ରାକୁ ସଫଳ କରୁଥିଲେ। ହେଲେ ଚଳିତ ବର୍ଷ ମଣ୍ଡେଇରେ ଏହାକୁ ଅଣଦେଖା କରାଯାଇଥିବା ଅଧ୍ୟକ୍ଷ, ଉପାଧ୍ୟକ୍ଷା ଓ ସମସ୍ତ କାଉନସିଲର ଅଭିଯୋଗ କରିଛନ୍ତି।
ଚଳିତ ଥର ମଣ୍ଡେଇରେ ପୌରାଧ୍ୟକ୍ଷ, ଉପାଧ୍ୟକ୍ଷାଙ୍କ ନାମ ମୁଖ୍ୟ ମଣ୍ଡେଇ ପର୍ବର ନିମନ୍ତ୍ରଣ ପତ୍ରରେ ରଖାଯାଇନାହିଁ। ଏହାକୁ ନେଇ ପୌରପାଳିକାର କାଉନସିଲର ମାନଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଜିଲାର ଲୁକାୟିତ କଳା ଓ ସଂସ୍କୃତିକୁ ଲୋକଲୋଚନକୁ ଆଣିବା ମଣ୍ଡେଇ ପର୍ବ ପାଳନର ମୁଖ୍ୟ ଉଦ୍ଦେଶ୍ୟ। ତେବେ ଜିଲା ପ୍ରଶାସନ ଏହି ମହାପର୍ବରେ ସେମାନଙ୍କୁ କହିଁକି ସାମିଲ କରିନାହିଁ ତାହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। କେଉଁ ଉଦ୍ଦେଶ୍ୟରେ ପୌରପାଳିକାକୁ ମଣ୍ଡେଇ ଶୋଭାଯାତ୍ରା ଆୟୋଜନର ଦାୟିତ୍ୱ ଦିଆଯାଇନାହିଁ ବୋଲି କାଉନସିଲର ମାନେ ପ୍ରଶ୍ନ କରିଛନ୍ତି। ନବରଙ୍ଗପୁର ଜିଲା ଲୋକ ମହୋତ୍ସବ ମଣ୍ଡେଇରେ ନବରଙ୍ଗପୁର ପୌରାଧ୍ୟକ୍ଷ, ଉପାଧ୍ୟକ୍ଷା ଓ କାଉନସିଲର ମାନେ ମହୋତ୍ସବ ପାଳନ ପାଇଁ ସମ୍ପୂର୍ଣ୍ଣ ସହଯୋଗ କରୁଛନ୍ତି। ସହରର ମୁଖ୍ୟ ସ୍ଥାନ ମାନଙ୍କରେ ମଣ୍ଡେଇ ଶୁଭେଚ୍ଛା ଫ୍ଲେକ୍ସ ଲଗାଇବା, ପୌରପାଳିକା ପକ୍ଷରୁ ଆର୍ଥିକ ସହାୟତା, ବିଭିନ୍ନ ପ୍ରତିଯୋଗିତାରେ ସହଯୋଗ, ସଫେଇ କାର୍ଯ୍ୟ ଆଦିରେ ସହଯୋଗ କରାଯାଉଛି। ହେଲେ ପ୍ରଶାସନ ପକ୍ଷରୁ ଏଭଳି ଅଣଦେଖା କରାଯିବାକୁ ନେଇ ଅଧ୍ୟକ୍ଷ କୁନୁ ନାୟକ, ଉପାଧ୍ୟକ୍ଷା ସୌମ୍ୟ ମହାପାତ୍ର ଓ କାଉନସିଲର ଏ . ସତୀଶ, ନଗେନ୍ଦ୍ର ପଟ୍ଟନାୟକ, କେଶବ ରାଜୁ , ଅମିତ ପ୍ରଧାନ, ଶର୍ମିଷ୍ଠା ଦେଓ, ଅଲେଖ ସୌରା, ସନ୍ତୋଷୀ ଜାନି, ପୁନମ୍ ସାହୁ, ଗୀତାଞ୍ଜଳି ଯାଦବ, ରାଜେଶ୍ୱରୀ, ଉଷାରାଣୀ ପ୍ରମୁଖ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି।
