ଭୁବନେଶ୍ୱର,୨୬।୮: କେନ୍ଦ୍ର ସରକାର ୨୦୨୫-୨୬ ଆର୍ଥିକ ବର୍ଷ ପାଇଁ ପଞ୍ଚଦଶ ଅର୍ଥ ଆୟୋଗ (XV FC) ଅନ୍ତର୍ଗତ ଓଡ଼ିଶା, ମିଜୋରାମ ଓ ତ୍ରିପୁରାର ଗ୍ରାମୀଣ ସ୍ଥାନୀୟ ସଂସ୍ଥା (RLBs) ପାଇଁ ୨୮୪ କୋଟି ଟଙ୍କାରୁ ଅଧିକ ଅନୁଦାନ ମଞ୍ଜୁର କରିଛନ୍ତି।
ଓଡ଼ିଶାକୁ ୬,୦୮୫ଟି ଯୋଗ୍ୟ ଗ୍ରାମ ପଞ୍ଚାୟତ ଓ ୬୩ଟି ଯୋଗ୍ୟ ବ୍ଲକ ପଞ୍ଚାୟତ ପାଇଁ ୨୪୦.୮୧୪୯ କୋଟି ଟଙ୍କା, ମିଜୋରାମକୁ ୮୨୭ଟି ଯୋଗ୍ୟ ଗ୍ରାମ ପରିଷଦ ପାଇଁ ୧୪.୨୭୬୧ କୋଟି ଟଙ୍କା ଏବଂ ତ୍ରିପୁରାକୁ ୬୦୬ଟି ଗ୍ରାମ ପଞ୍ଚାୟତ, ୩୫ଟି ବ୍ଲକ ପଞ୍ଚାୟତ, ୮ଟି ଜିଲ୍ଲା ପରିଷଦ, ୫୮୭ଟି ଗ୍ରାମ କମିଟି ଓ ୪୦ଟି ବ୍ଲକ ଉପଦେଷ୍ଟା କମିଟି ପାଇଁ ୨୯.୭୫ କୋଟି ଟଙ୍କା ମଞ୍ଜୁର ହୋଇଛି।
ପଞ୍ଚାୟତୀ ରାଜ ଓ ଜଳ ଶକ୍ତି ମନ୍ତ୍ରଣାଳୟ ମାଧ୍ୟମରେ ଏହି ଅନୁଦାନ ଦୁଇଟି କିସ୍ତିରେ ପ୍ରଦାନ କରେ। ଅନ୍ଟାଇଡ୍ ଗ୍ରାଣ୍ଟ ସ୍ଥାନୀୟ ଆବଶ୍ୟକତା ପାଇଁ ବ୍ୟବହୃତ ହେବ, କିନ୍ତୁ ଦରମା ଓ ପ୍ରତିଷ୍ଠାନିକ ଖରଚ ପାଇଁ ନୁହେଁ। ଟାଇଡ୍ ଗ୍ରାଣ୍ଟ ସ୍ୱଚ୍ଛତା, ଓଡିଏଫ୍ ସ୍ଥିତି ରକ୍ଷଣାବେକ୍ଷଣ, ଗୃହସ୍ଥ ବର୍ଜ୍ୟ ପରିଚାଳନା, ପାନୀୟ ଜଳ ଯୋଗାଣ, ବର୍ଷା ଜଳ ସଂରକ୍ଷଣ ଓ ଜଳ ପୁନଃଚକ୍ରଣ ପାଇଁ ବ୍ୟବହୃତ ହେବ।
ଏହାପୂର୍ବରୁ ମାର୍ଚ୍ଚରେ କର୍ଣ୍ଣାଟକ ଓ ତ୍ରିପୁରା ପାଇଁ ୪୩୬ କୋଟି ଟଙ୍କାର ଦ୍ୱିତୀୟ କିସ୍ତି ମଞ୍ଜୁର ହୋଇଥିଲା। ଏହା ସହ ଗତ ମାସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ କେନ୍ଦ୍ରୀୟ କ୍ୟାବିନେଟ୍ ପ୍ରଧାନମନ୍ତ୍ରୀ କିଷାନ ସମ୍ପଦା ଯୋଜନା (PMKSY) ପାଇଁ ୬,୫୨୦ କୋଟି ଟଙ୍କା ଅନୁମୋଦନ କରିଛି।
