ବାଲେଶ୍ୱର ଅଫିସ, ୧୨ା୧୧: ବାଲେଶ୍ୱରରେ ଶୁକ୍ରବାର ପୂର୍ବାହ୍ନରେ ‘ଭାରତ ଯୋଡୋ ଯାତ୍ରା’ ଅନୁଷ୍ଠିତ ହୋଇଥିଲା। କଂଗ୍ରେସର କେନ୍ଦ୍ର ଓ ରାଜ୍ୟ ନେତୃବର୍ଗ ଏଥିରେ ସାମିଲ ହୋଇ ସହର ପ୍ରବେଶପଥ କୁରୁଡ଼ାଠାରୁ ଏକ ବିଶାଳ ପଦଯାତ୍ରାରେ ବାହାରି ଆଇଟିଆଇ ଛକ, ପୋଲିସ ଲାଇନ୍, ଷ୍ଟେଶନ ଛକ, ଫକୀରମୋହନ ଗୋଲେଇ, ବସ୍ଷ୍ଟାଣ୍ଡ ଦେଇ ଭୀମପୁରା ନିକଟରେ ପହଞ୍ଚିଥିଲେ। ପରେ ରେମୁଣା ଗୋଲେଇ ଦେଇ ବାଲେଶ୍ୱର ସୀମା କଳମା ପର୍ଯ୍ୟନ୍ତ ଯାଇଥିଲେ।
ନେତା ନବଜ୍ୟୋତି ପଟ୍ଟନାୟକଙ୍କ ତତ୍ତ୍ୱାବଧାନରେ ଏହି ଯାତ୍ରା ଅନୁଷ୍ଠିତ ହୋଇଥିଲା। ଭାରତର ଐକ୍ୟ, ଅଖଣ୍ଡତାକୁ ରକ୍ଷା କରିବା ସହ ଜାତି, ଧର୍ମ, ବର୍ଣ୍ଣ ନିର୍ବିଶେଷରେ ସମସ୍ତଙ୍କୁ ଗୋଟିଏ ସୂତ୍ରରେ ବାନ୍ଧିବା ଏହି ଯାତ୍ରାର ଉଦ୍ଦେଶ୍ୟ ବୋଲି ପିସିସି ସଭାପତି ଶରତ ପଟ୍ଟନାୟକ କହିଥିଲେ। ଭାରତ ଯୋଡ଼ୋ ଯାତ୍ରା ମାଧ୍ୟମରେ ବିଭିନ୍ନତା ଭିତରେ ଏକତା ସୃଷ୍ଟି କରିବା କହିବା ସହ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କୁ ଓଡ଼ିଶା କଂଗ୍ରେସ ପ୍ରଭାରୀ ଚେଲ୍ଲା କୁମାର ଟାର୍ଗେଟ କରିଥିଲେ। ଦେଶରେ ଲୋକଙ୍କୁ ମିଛ କହି ଶାସନ ଚଳାଇଛନ୍ତି କେନ୍ଦ୍ର ସରକାର। ମୁଦ୍ରା ସ୍ଥିତି ସ୍ଥିର ଅଛି ବୋଲି କହୁଛନ୍ତି ଏପଟେ ଦରଦାମ ବୃଦ୍ଧି ହୋଇଛି। ଗ୍ୟାସ, ପେଟ୍ରୋଲ ଓ ଖାଉଟି ସାମଗ୍ରୀର ଅହେତୁକ ବୃଦ୍ଧି ପାଇଛି। ଦେଶରେ ଜାତି ଜାତି ଭିତରେ ବିଭେଦତା ସୃଷ୍ଟି କରାଯାଉଛି ଓ ବେରୋଜଗାରୀଙ୍କ ସଂଖ୍ୟା ବୃଦ୍ଧି ହୋଇଛି। ସେହିଭଳି ରାଜ୍ୟରେ ମଧ୍ୟ କୌଣସି ନୂଆ ଶିଳ୍ପ ହୋଇପାରିଲା ନାହିଁ। ଚାଷୀ, ଯୁବକ ହତାଶ ହୋଇଥିବା ବେଳେ ବେକାରୀଙ୍କ ସଂଖ୍ୟା ବୃଦ୍ଧି ପାଇଛି। ଏହି ବାର୍ତ୍ତା ନେଇ ଆମେ ଭାରତ ଯୋଡ଼ୋ ମାଧ୍ୟମରେ ଲୋକଙ୍କ ନିକଟରେ ପହଞ୍ଚିବୁ ବୋଲି ବିଧାୟକ ତଥା ବରିଷ୍ଠ ବିଧାୟକ ସୁର ରାଉତରାୟ କହିଥିଲେ। ଏହି ପଦଯାତ୍ରାରେ ହଜାର ହଜାର କର୍ମୀ ସାମିଲ ହୋଇଥିଲେ।
