ନୂଆଦିଲ୍ଲୀ,୧୩।୩: ଜମ୍ମୁ-କଶ୍ମୀର ନ୍ୟାଶନାଲ ଫ୍ରଣ୍ଟ (ଜେକେଏନ୍ଏଫ୍)କୁ କେନ୍ଦ୍ର ସରକାର ୫ ବର୍ଷ ପାଇଁ ବ୍ୟାନ୍ କରିଛନ୍ତି। ଲୋକଙ୍କ ମଧ୍ୟରେ ଅସନ୍ତୋଷର ମଞ୍ଜି ବୁଣିବା ଏବଂ ଦେଶର ସୁରକ୍ଷା ଓ ସାର୍ବଭୌମତ୍ୱ ପ୍ରତି ବିପଦ ସୃଷ୍ଟି କରୁଥିବା କାର୍ଯ୍ୟରେ ସମ୍ପୃକ୍ତ ରହିବା ଅଭିଯୋଗରେ କଠୋରପନ୍ଥୀ ହୁରିୟାତ୍ କନ୍ଫରେନ୍ସର ଏହି ସହଯୋଗୀ ସଂଗଠନକୁ ଆତଙ୍କବାଦ ନିରୋଧୀ ଆଇନ (ୟୁଏପିଏ) ବଳରେ ବେଆଇନ ଘୋଷଣା କରାଯାଇଛି।
ନାୟିମ ଅହମଦ ଖାନ୍ଙ୍କ ନେତୃତ୍ୱରେ ଗଠିତ ଜେକେଏନ୍ଏଫ୍ ଏକ ବେଆଇନ ସଂଗଠନ ବୋଲି ସ୍ବରାଷ୍ଟ୍ର ମନ୍ତ୍ରଣାଳୟ ନିର୍ଦ୍ଦେଶନାମାରେ ଉଲ୍ଲେଖ କରାଯାଇଛି। ଆତଙ୍କବାଦୀଙ୍କୁ ପାଣ୍ଠି ଯୋଗାଇବା ମାମଲାରେ ବିଚ୍ଛିନ୍ନତାବାଦୀ ନେତା ଖାନ୍ଙ୍କୁ ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ) ୨୦୧୭ ଜୁଲାଇ ୨୪ରେ ଗିରଫ କରିଥିଲା।
ଏବେ ସେ ଜେଲରେ ଅଛନ୍ତି। ଜମ୍ମୁ-କଶ୍ମୀରକୁ ଭାରତରୁ ଅଲଗା କରିବା ଦିଗରେ ଜେକେଏନ୍ଏଫ୍ କାର୍ଯ୍ୟ କରୁଥିଲା। ଏହା ବ୍ୟତୀତ ଏହି ସଂଗଠନ ଆତଙ୍କବାଦୀଙ୍କୁ ସହାୟତା ଯୋଗାଇବା ସହ ଦେଶର ସାର୍ବଭୌମତ୍ୱ, ସୁରକ୍ଷା ଏବଂ ସଂହତି ପ୍ରତି ଚ୍ୟାଲେଞ୍ଜ ସୃଷ୍ଟି କରିଥିଲା ବୋଲି ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହା କହିଛନ୍ତି
