ଖୋର୍ଦ୍ଧା,୩ା୧୦(ପ୍ରଭାତ ପାଣିଗ୍ରାହୀ):ଥାନାରେ ସ୍ବଚ୍ଛତା ଆଣିବା ନିମନ୍ତେ ସିସିଟିିଭି ଲଗାଇବା ପାଇଁ ସୁପ୍ରିମକୋର୍ଟଙ୍କ ନିର୍ଦ୍ଦେଶ ରହିଛି। ସିିସିଟିଭି ଲାଗିଲେ ଲୋକମାନଙ୍କ ପ୍ରତି ପୋଲିସର ବ୍ୟବହାର ଜଣାପଡ଼ିବ। ହେଲେ ଏବେ ବି ରାଜ୍ୟର ବିଭିନ୍ନ ଥାନାରେ ସିସିଟିଭି ଲାଗି ନ ଥିବା ଜଣାପଡ଼ିଛି। ଭରତପୁର ଥାନାରେ ମେଜର ଓ ତାଙ୍କ ବାନ୍ଧବୀଙ୍କୁ ନିର୍ଯାତନା ଘଟଣା ପରେ ଏହି ସତ୍ୟ ସାମ୍ନାକୁ ଆସିଛି। ଗତ ୨୩ ତାରିଖରେ ହାଇକୋର୍ଟରେ ସରକାର ଦେଇଥିବା ତଥ୍ୟ ଅନୁସାରେ ଏବେ ବି ରାଜ୍ୟର ୬୫୦ ଥାନା ମଧ୍ୟରୁ ୫୭ଟି ଥାନାରେ ସିସିଟିଭି ଲାଗିନାହିଁ। ଆଉ ଯେଉଁଠି ବି ଅଛି ସେଠି ଥାଇ ନ ଥିବାଭଳି। କାରଣ ଅନେକ ଥାନାରେ ଆବଶ୍ୟକ ସଂଖ୍ୟାରେ ସିସିଟିଭି ଲାଗି ନାହିଁ। ଏପରି କି ଲାଗିଥିବା ସିସିଟିଭିର କାର୍ଯ୍ୟକାରିତାକୁ ନେଇ ଅନେକ ସ୍ଥାନରେ ପ୍ରଶ୍ନ ଉଠିଛି। ସାମ୍ପ୍ରତିକ ବିଶୃଙ୍ଖଳାକୁ ଦେଖି ପ୍ରତ୍ୟେକ ଥାନାରେ ସିସିଟିଭି ଲଗାଇବାକୁ ପୋଲିସ ବିଭାଗ ତତ୍ପର ହୋଇଉଠିଛି। ଯେଉଁଠି ଖରାପ ଅଛି ବୋଲି ଆଗରୁ ଜଣାଥିଲା, ସେସବୁ ସ୍ଥାନରେ ଏବେ ତରବରିଆ ଭାବେ ମରାମତି କାର୍ଯ୍ୟ ଚାଲିଛି।
ଖୋର୍ଦ୍ଧା ଜିଲାର ବିଭିନ୍ନ ଥାନାରେ ସିସିଟିଭି ଲାଗିବା ନେଇ ଧରିତ୍ରୀ ତରଫରୁ ଏକ ଅନୁଧ୍ୟାନ କରାଯାଇଥିଲା। ମିଳିଥିବା ରିପୋର୍ଟ ଅନୁସାରେ ଏହି ପୋଲିସ ଜିଲାରେ ୧୧ଟି ଥାନା ରହିଛି। ସଦର ଉପଖଣ୍ଡ ଅଧୀନରେ ଜଙ୍କିଆ,
ଖୋର୍ଦ୍ଧା ଆଦର୍ଶ ଥାନା, ଶିଳ୍ପାଞ୍ଚଳ ଥାନା, ବାଘମାରୀ, ବେଗୁନିଆ ଓ ବୋଲଗଡ଼ ଥାନା ରହିଥିବାବେଳେ ବାଲୁଗାଁ ଏସଡିପିଓ ଅଧୀନରେ ନିରାକାରପୁର, ଟାଙ୍ଗୀ, ବାଲୁଗାଁ, ବାଣପୁର ଓ ନାଚୁଣୀ ଥାନା ରହିଛି। ଖୋର୍ଦ୍ଧା ଶିଳ୍ପାଞ୍ଚଳ ଥାନାରେ ଆବଶ୍ୟକ ପରିମାଣର ସିସିଟିଭି ନ ଥିବା ଜଣାପଡ଼ିଛି। ଶିଳ୍ପାଞ୍ଚଳ ଥାନା ପୂର୍ବରୁ ଫାଣ୍ଡି ଥିଲା। ଗତବର୍ଷ ତାହା ଥାନାରେ ପରିବର୍ତ୍ତନ ହୋଇଛି। ସେଠାରେ ପୂର୍ବରୁ ମାତ୍ର ୨ଟି ସିସିଟିଭି ଲାଗିଥିଲା। ହେଲେ କିଛିଦିନ ପରେ ତାହା ଅଚଳ ହୋଇଯାଇଥିଲା। ଏବେ ଭରତପୁର ଥାନା ଘଟଣା ପରେ ଉକ୍ତ ସିସିଟିଭିକୁ ମରାମତି କରାଯାଇଛି ବୋଲି ଥାନା ଅଧିକାରିଣୀ ଗାୟତ୍ରୀ ମିଶ୍ର କହିଛନ୍ତି। ତେବେ ନିଜ ନାମ ଗୋପନ ରଖିବା ସର୍ତ୍ତରେ ଶିଳ୍ପାଞ୍ଚଳ ଥାନାର ଜଣେ ଥାନାବାବୁଙ୍କ କହିବା ହେଲା ଏଠାରେ ୬ଟି ସିସିଟିଭି ଲାଗିବା କଥା। ହେଲେ ମାତ୍ର ୨ଟି ସିସିଟିଭିରେ କାମ ଚଳାଇବାକୁ ପଡ଼ୁଛି। ଥାନା ଅଧିକାରୀଙ୍କ ପ୍ରକୋଷ୍ଠରେ ଗୋଟିଏ ସିସିଟିଭି ଲାଗିଥିବାବେଳେ ବାହାର ପାର୍ଶ୍ୱକୁ ଆଉ ଗୋଟେ ଲାଗିଛି। ଅନ୍ୟ ପୋଲିସ କର୍ମଚାରୀଙ୍କ ପ୍ରକୋଷ୍ଠରେ କିମ୍ବା ପୋଲିସ ହାଜତ ନିକଟରେ ସିସିଟିଭି ନାହିଁ। ଯଦି ଏହି ସବୁ ସ୍ଥାନରେ କୌଣସି ଅଘଟଣ ଘଟେ କିମ୍ବା ପୋଲିସ କୌଣସି ପ୍ରମାଣ ନଷ୍ଟ କରିବାକୁ ଚାହେଁ, ତେବେ ସେଥିପାଇଁ କିଏ ଉତ୍ତରଦାୟୀ ରହିବେ, ତାକୁ ନେଇ ନାନା ଚର୍ଚ୍ଚା। ସେହିପରି ଏବେ ନାଚୁଣୀ ଥାନା ନୂତନ କୋଠାରେ ଚାଲିଛି। ଓଡ଼ିଶା ପୋଲିସ ପକ୍ଷରୁ ନୂତନ ଭାବେ ନିର୍ମିତ କୋଠାରେ ସିସିଟିଭି ଖଞ୍ଜିବା ପାଇଁ ଦାୟିତ୍ୱ ନେଇଥିବା ସଂସ୍ଥା ସିସିଟିଭି ଖଞ୍ଜି ନ ଥିଲା। ପରବର୍ତ୍ତୀ ସମୟରେ ଏଠାରେ ସିସିଟିଭି ଖଞ୍ଜାଯାଇଥିବା ନାଚୁଣୀ ଥାନାଧିକାରୀ ଚନ୍ଦ୍ରଶେଖର ଜେନା କହିଛନ୍ତି। ଥାନାର ୩ କୋଠରି ଏବଂ ପରିସରରେ ସିସିଟିଭି କାର୍ଯ୍ୟକ୍ଷମ ରହିଥିବା ସେ କହିଛନ୍ତି।
ଏ ସମ୍ପର୍କରେ ଡିଆଇଜି ତଥା ଏସ୍ପି ଅବିନାଶ କୁମାର ସୁପ୍ରିମକୋର୍ଟଙ୍କ ଗାଇଡ୍ଲାଇନ ଅନୁସାରେ ଜିଲାର ସମସ୍ତ ଥାନାରେ ସିସିଟିଭି ଲାଗିଛି। ରାଜ୍ୟ ପୋଲିସ ମୁଖ୍ୟାଳୟ ପକ୍ଷରୁ ଆସିଥିବା ଏକ ଟିମ୍ ସମସ୍ତ ଥାନାରେ ଲାଗିଥିବା ସିସିଟିଭି ଯାଞ୍ଚ କରିଛି। କେତେକ ଥାନାରେ ଟେକ୍ନିକାଲ, ଇଣ୍ଟରନେଟ ସମସ୍ୟା ଯୋଗୁ ସିସିଟିଭି ଅଚଳ ରହିଥିବା ଜଣାପଡ଼ିବା ପରେ ଏହାକୁ ପୁନଃ ଯାଞ୍ଚ କରି କାର୍ଯ୍ୟକ୍ଷମ କରିବାକୁ ସଦର ଏବଂ ବାଲୁଗାଁ ଏସଡିପିଓଙ୍କୁ ନିର୍ଦ୍ଦେଶ ଦିଆଯାଇଛି। ଏନେଇ ସଦର ଏସଡିପିଓ ଅନିଲ ମିଶ୍ର କୁହନ୍ତି ଜଙ୍କିଆ, ଖୋର୍ଦ୍ଧା, ବାଘମାରୀ, ବେଗୁନିଆ ଓ ବୋଲଗଡ ଥାନାରେ ସିସିଟିଭି କାର୍ଯ୍ୟକ୍ଷମ ରହିଥିବା ବେଳେ ଶିଳ୍ପାଞ୍ଚଳ ଥାନାରେ ସିସିଟିଭି ଅଚଳ ରହିଥିଲା। ଏହାକୁ ଆବଶ୍ୟକ ମରାମତି କରାଯାଇଛି। ଏନେଇ ବରିଷ୍ଠ ଆଇନଜୀବୀ ଅଜିତ ପଟ୍ଟନାୟକ କୁହନ୍ତି, ସୁପ୍ରିମକୋର୍ଟଙ୍କ ଗାଇଡ୍ଲାଇନ ଅନୁସାରେ ସମସ୍ତ ଥାନାରେ ସିିସିଟିଭି ଲଗାଇବା ବାଧ୍ୟତାମୂଳକ ରହିଛି। ତେବେ କେତେକ ଥାନାରେ ଏହାର ବ୍ୟତିକ୍ରମ ଦେଖିବାକୁ ମିଳୁଛି। ଦୀର୍ଘ ଦିନ ଧରି ଅଚଳ ହୋଇ ରହୁଥିବା ସିସିଟିଭିକୁ କାର୍ଯ୍ୟକ୍ଷମ କରାଯାଉନାହିଁ। ସେହିପରି ପୂର୍ବତନ ବାର୍ ସଭାପତି ଶିଶିର ପରିଡ଼ା କୁହନ୍ତି, ଥାନାରେ ସିସିଟିଭି କାର୍ଯ୍ୟକ୍ଷମ ଅଛି କି ନାହିଁ, ଏହା ସ୍ବତନ୍ତ୍ର ଭାବେ ଯାଞ୍ଚ ହେବା ଦରକାର। ଅନେକ ସମୟରେ ଥାନାରେ ଅଭିଯୋଗକାରୀଙ୍କୁ ପୋଲିସ ଦୁର୍ବ୍ୟବହାର କରୁଥିବା ଘଟଣା ବଢ଼ିଚାଲିଛି। ଭାରତୀୟ ନାଗରିକ ସୁରକ୍ଷା ସଂହିତାରେ ଇଲେକ୍ଟ୍ରୋନିକ୍ସ ତଥ୍ୟକୁ ଗୁରୁତ୍ୱ ଦିଆଯାଉଛି। ତେବେ ପୋଲିସ ଜାଣିଶୁଣି ଥାନା ଆଗରେ ରହିଥିବା କ୍ୟାମେରାକୁ ଉପରମୁହଁା ରଖିବା, ଅଭିଯୋଗକାରୀଙ୍କ ସହ ଆଲୋଚନାବେଳେ ସିସିଟିଭିରେ ତାହା କଏଦ ନ ହେବା ପୋଲିସର ବିଶ୍ୱସନୀୟତା ଉପରେ ସନ୍ଦେହ ସୃଷ୍ଟି କରୁଛି। କଂଗ୍ରେସ ମୁଖପାତ୍ର ଅମିତ ମହାନ୍ତି ପ୍ରତ୍ୟେକ ଥାନାରେ ଅଭିଯୋଗକାରୀଙ୍କୁ କିଭଳି ବ୍ୟବହାର କରାଯାଉଛି, ତାହାର ଫୁଟେଜ ପଦାକୁ ଆସିବା ଦରକାର ବୋଲି କହିଛନ୍ତି। ଥାନା ଭିତରେ ପୋଲିସର କିଭଳି ବ୍ୟବହାର, ଆଚରଣ ରହୁଛି, ତାହା ସିସିଟିଭିରୁ ଜଣାପଡ଼ିଥାଏ। ଏଥିପ୍ରତି ସରକାର ଗୁରୁତ୍ୱ ଦେବା ଜରୁରୀ ବୋଲି ଅମିତ କହିଛନ୍ତି।
