ଭଞ୍ଜନଗର,୧୩।୫(ବାବୁଲା ପ୍ରଧାନ)-ସେଣ୍ଟ୍ରାଲ ବୋର୍ଡ ଅଫ ସେକେଣ୍ଡାରୀ ଏଜୁକେଶନ (ସିବିଏସ୍ଇ) ପକ୍ଷରୁ ମଙ୍ଗଳବାର ଦଶମ ଶ୍ରେଣୀ ପରୀକ୍ଷାଫଳ ପ୍ରକାଶ ପାଇଛି। ଏଥିରେ ଗଞ୍ଜାମ ଜିଲା ଭଞ୍ଜନଗର କେନ୍ଦ୍ରୀୟ ବିଦ୍ୟାଳୟ ଏବଂ ସେଣ୍ଟଆନ୍ସ ଇଂରାଜୀ ମାଧ୍ୟମିକ ବିଦ୍ୟାଳୟ ପରୀକ୍ଷା ଫଳ ଭଲ ହୋଇଛି । ଯାହାକୁ ନେଇ ବିଦ୍ୟାଳୟ ଶିକ୍ଷୟତ୍ରୀ, ଶିକ୍ଷକ, ଛାତ୍ରୀଛାତ୍ର ଏବଂ ଅଭିଭାବକମାନେ ଖୁସିବ୍ୟକ୍ତ କରିଛନ୍ତି।
କେନ୍ଦ୍ରୀୟ ବିଦ୍ୟାଳୟର ଆଦର୍ଶ ମହାନନ୍ଦ ୯୫.୮୦ ପ୍ରତିଶତ ମାର୍କ ରଖି କ୍ଲାସ ଟପ୍ପର ହୋଇଛନ୍ତି। ସେ ହେଉଛନ୍ତି ପିତା ଦଣ୍ଡପାଣି ମହାନନ୍ଦ ଏବଂ ମାତା ଆଶାଲତା ଦିଗାଲଙ୍କ ପୁତ୍ର। ସେହିଭଳି ଜ୍ୟୋତିମୟୀ ସେଠୀ, ରୀତି ରଚୟିତା ମୁନି ୯୫ ପ୍ରତିଶତ ମାର୍କ ରଖି କ୍ଲାସରେ ଯୁଗ୍ମ ଦ୍ୱିତୀୟ ହୋଇଛନ୍ତି। ବିନାୟକ ତାରିଣୀ ୯୩.୮୦ ପ୍ରତିଶତ ମାର୍କ ରଖି ତୃତୀୟ ସ୍ଥାନରେ ଅଛନ୍ତି, ସୌମ୍ୟା ସେଫାଳିକା ସାହୁ ୯୩.୪୦ ପ୍ରତିଶତ, ବୈଭବ ପଟ୍ଟନାୟକ ୯୨.୬, ସ୍ପନ୍ଦନ ଶତପଥି ୯୨.୬, ଶିବ ଶଙ୍କର ବେହେରା ୯୨.୨ ଏବଂ ଅଂଶୁମାନ ସେଠୀ ୯୦.୬ ପ୍ରତିଶତ ମାର୍କ ରଖି ବିଦ୍ୟାଳୟର ସୁନାମ ରଖିଛନ୍ତି। ଚଳିତ ବର୍ଷ ବିଦ୍ୟାଳୟର ୯୭.୬୭ ପ୍ରତିଶତ ଛାତ୍ରୀଛାତ୍ର ପାସ ହୋଇଛନ୍ତି । ବିଦ୍ୟାଳୟ ଅଧ୍ୟକ୍ଷ ପ୍ରଦୀପ କମାନୁ, ବରିଷ୍ଠ ଶିକ୍ଷକ ସତ୍ୟବାନ ସାହୁ ସମସ୍ତ କୃତୀଛାତ୍ରୀ ଛାତ୍ରଙ୍କୁ ଶୁଭେଚ୍ଛା ଜଣାଇବା ସହ ସେମାନଙ୍କ ଉଜ୍ଜ୍ୱଳ ଭବିଷ୍ୟତ କାମନା କରିଛନ୍ତି। ବିଦ୍ୟାଳୟର ୪୩ ଜଣ ଛାତ୍ରୀଛାତ୍ର ପରୀକ୍ଷା ଦେଇଥିବା ବେଳେ ସେଥିମଧ୍ୟରୁ ୪୨ ଜଣ ପାସ ହୋଇଛନ୍ତି । ୯ ଜଣ ଛାତ୍ରୀଛାତ୍ର ୯୦ ପ୍ରତିଶତରୁ ଉଦ୍ଧର୍ବ ମାର୍କ ଉକ୍ତ ରଖିଛନ୍ତି।
ସେହିଭଳି ସେଣ୍ଟଆନ୍ସର ଭାବନା ପ୍ରିୟଦର୍ଶିନୀ ୯୩.୬୦ ପ୍ରତିଶତ ମାର୍କ ରଖି କ୍ଲାସରେ ଟପ୍ପର ହୋଇଛନ୍ତି। ସେ ହେଉଛନ୍ତି ପିତା କେ. ଶଙ୍କର ନାରାୟଣ ପାତ୍ର ଏବଂ ମାତା କେ. ପ୍ରତିମା ପାତ୍ର ଙ୍କ ଝିଅ। ସେଣ୍ଟଆନ୍ସର ଛାତ୍ରୀ ଜ୍ଞାନଦା ବେହେରା ୯୧.୩୦ ପ୍ରତିଶତ ମାର୍କ ରଖି ଦ୍ୱିତୀୟ ସ୍ଥାନରେ ଥିବା ବେଳେ ଛାତ୍ରୀ ସାଇଶ୍ୱରୀ ସାହୁ ୮୯ ପ୍ରତିଶତ ମାର୍କ ରଖି ତୃତୀୟ ସ୍ଥାନରେ ଅଛନ୍ତି। ବିଦ୍ୟାଳୟର ପାସ ହାର ୯୯ ପ୍ରତିଶତ ଅଛି। ବିଦ୍ୟାଳୟ ଅଧ୍ୟକ୍ଷା ସିଷ୍ଟର ସାନ୍ଥା କୁମାରୀ ସମସ୍ତ କୃତୀ ଛାତ୍ରୀଛାତ୍ରଙ୍କୁ ଶୁଭେଚ୍ଛା ଜଣାଇଛନ୍ତି। ପୂର୍ବ ବର୍ଷ ଅପେକ୍ଷା ଚଳିତ ବର୍ଷ ଉକ୍ତ ଦୁଇ ଶିକ୍ଷାନୁଷ୍ଠାନର ପରୀକ୍ଷା ଫଳ ଆହୁରି ଭଲ ହୋଇଛି ।
