ନୂଆଦିଲ୍ଲୀ: ଦେଶରେ ଡିଜିଟାଲ କାରବାର ଏବେ ଦ୍ରୁତ ହୋଇଛି। ଇଣ୍ଟରନେଟ ଏବଂ ପ୍ରଯୁକ୍ତି ଉନ୍ନତ ହେବା ଯୋଗୁ ପୂର୍ବ ତୁଳନାରେ ଏବେ ଡିଜିଟାଲ ନେଣଦେଣକୁ ଲୋକେ ପସନ୍ଦ କରୁଛନ୍ତି। ହେଲେ ଏହା ସତ୍ତ୍ୱେ ଭାରତୀୟଙ୍କ ମଧ୍ୟରେ ରହିଥିବା ନଗଦ ମୋହ ତୁଟୁନି। ଏକ ରିପୋର୍ଟ ମୁତାବକ, ଏଟିଏମ୍ରୁ ଲୋକମାନେ ହାରାହାରି ପ୍ରାୟ ୫ ହଜାର ଟଙ୍କା ଉଠାଉଛନ୍ତି। ଫଳରେ ଘରୋଇ ବଜାରରେ ଏଟିଏମ୍ ଉଠାଣ କ୍ଷେତ୍ରରେ ବର୍ତ୍ତମାନ ନୂଆ ରେକର୍ଡ ସୃଷ୍ଟି ହୋଇଛି। ନଗଦ କାରବାର ପ୍ରତି ଲୋକଙ୍କର କେତେ ଭଲ ପାଇବା ରହିଛି ଏହା ଏଥିରୁ ଅନୁମାନ କରିହେବ।
ଅଗଷ୍ଟ ମାସ ଡାଟା ମୁତାବକ ଲୋକମାନେ ଏଟିଏମ୍ରୁ ହାରାହାରି ୪୯୫୯ ଟଙ୍କା ଉଠାଇଛନ୍ତି। ଲୋକମାନେ ଡେବିଟ କାର୍ଡରୁ ପ୍ରାୟ ୨୬ ଲକ୍ଷ କୋଟି ଟଙ୍କାର ରେକର୍ଡ ଉଠାଣ କରିଛନ୍ତି। ଏହା ମୋଟ ଘରୋଇ ଉତ୍ପାଦ (ଜିଡିପି)ର ପ୍ରାୟ ୧୨%। ଏବେ ଡିଜିଟାଲ ପେମେଣ୍ଟ ବଢୁଥିବା ବେଳେ ୟୁପିଆଇ ଟ୍ରାଞ୍ଜାକଶନ ସଂଖ୍ୟା ୨୦୦ କୋଟି ଛୁଇଁଛି। ଏଭଳି ଡାଟାକୁ ଦେଖିଲେ ଭାରତରେ ଲୋକମାନେ କ୍ୟାଶ୍କୁ ପ୍ରାଥମିକତା ଦେଉଥିବା ଅନୁମାନ କରିହେବ। ଗତ ବର୍ଷ ନଭେମ୍ବର ଡାଟାକୁ ଦେଖିଲେ ନଗଦ ଉଠାଣ ପ୍ରାୟ ୧୦% ବଢିଛି। ୟୁପିଆଇ ନେଣଦେଣ ପ୍ରାୟ ୨୦% ବଢିଛି।
ଭାରତୀୟ ଅର୍ଥ ବ୍ୟବସ୍ଥାରେ କ୍ୟାଶ୍ ବା ନଗଦ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି। ଏଟିଏମ୍ ବ୍ୟବସ୍ଥା ଯୋଗୁ ଲୋକମାନେ କ୍ୟାଶ୍ ଲାଭ କରିବାରେ ସୁବିଧା ଲାଭ କରୁଛନ୍ତି ବୋଲି ହିଟାଚି ପେମେଣ୍ଟ ସର୍ଭିସର ପରିଚାଳନା ନିର୍ଦ୍ଦେଶକ ରୁସ୍ତମ ଇରାନି ସୂଚନା ଦେଇଛନ୍ତି। କରୋନା ଲକ୍ଡାଉନ ଯୋଗୁ ଏପ୍ରିଲଠାରୁ ମେ ମାସ ମଧ୍ୟରେ କ୍ୟାଶ୍ ଉଠାଣ କ୍ଷେତ୍ରରେ ହ୍ରାସ ନଜରକୁ ଆସିଥିଲା। ମାତ୍ର ଏହା ପରଠାରୁ ନଗଦ ଉଠାଣ ପୁଣି ଥରେ ବଢୁଥିବା ନଜରକୁ ଆସିଛି। ଦିଓ୍ବାଲିରେ ମଧ୍ୟ ଲୋକମାନେ ଉଚ୍ଚ ପରିମାଣରେ ନଗଦ ଉଠାଣ କରିଥିବା ବିଟିଆଇ ପେମେଣ୍ଟସର ସିଇଓ କେ.ଶ୍ରୀନିବାସ ସୂଚନା ଦେଇଛନ୍ତି। ମହାମାରୀ ସମୟରେ ଲୋକମାନେ ନିଜ ପାଖରେ କ୍ୟାଶ୍ ମହଜୁଦ କରି ରଖିବା ଦେଖାଯାଇଥିଲା। ମାତ୍ର ଅର୍ଥ ବ୍ୟବସ୍ଥା ଖୋଲୁଥିବାରୁ ଏଟିଏମ୍ ନେଣଦେଣରେ ବୃଦ୍ଧି ପରିଲକ୍ଷିତ ହୋଇଛି।
