ବଲାଙ୍ଗୀର ଅଫିସ, ୭ା୨: ରୋମାନିଆର ଗୁରା-ହୁମୋରୁଲୁଇଠାରେ ଆୟୋଜିତ ଆନ୍ତର୍ଜାତିକ ବ୍ୟଙ୍ଗ ରେଖାଚିତ୍ର ମହୋତ୍ସବର ୩୦ବର୍ଷ ପୂର୍ତ୍ତି ଉପଲକ୍ଷେ ବିଶ୍ୱର ବଛାବଛା କାର୍ଟୁନିଷ୍ଟଙ୍କୁ ମନୋନୀତ କରାଯାଇ ସମ୍ମାନିତ କରାଯାଇଛି । ଏହି ଅବସରରେ ଭାରତରୁ ବଲାଙ୍ଗୀର ନିବାସୀ ଆନ୍ତର୍ଜାତିକ ଖ୍ୟାତିସମ୍ପନ୍ନ ବ୍ୟଙ୍ଗ ଚିତ୍ରଶିଳ୍ପୀ ଅବନୀ ରଥଙ୍କୁ ଡିପ୍ଲୋମା ଡି ଏକ୍ସିଲେଣ୍ଟା ସମ୍ମାନରେ ସମ୍ମାନିତ କରାଯାଇଛି । ଏଭଳି ଏକ ମର୍ଯ୍ୟାଦାଜନକ ସମ୍ମାନ ପାଇ କାର୍ଟୁନିଷ୍ଟ ରଥ ଦେଶ ଓ ରାଜ୍ୟ ପାଇଁ ଗୌରବ ଆଣି ଦେଇଛନ୍ତି। ରୋମାନିଆର ଫେଷ୍ଟିଭେଲୁଲ ଇଣ୍ଟରନ୍ୟାଶନାଲ ଡି ଗ୍ରାଫିକା ସେଟିରିକା ଲିଟରେଚର ସେଟିରିକା ପକ୍ଷରୁ ଏହି ସମ୍ମାନ ପ୍ରଦାନ କରାଯାଇଛି। ରୋମାନିଆର ଆୟୋଜକ ଅନୁଷ୍ଠାନ ପକ୍ଷରୁ କାର୍ଟୁନିଷ୍ଟ ରଥଙ୍କ ବଲାଙ୍ଗୀର ବାସଭବନ ଠିକଣାରେ ଉକ୍ତ ସମ୍ମାନ ଓ ପ୍ରମାଣପତ୍ର ପ୍ରେରଣ କରାଯାଇଛି । ୨୦୧୨ ମସିହାରେ କାର୍ଟୁନିଷ୍ଟ ରଥଙ୍କ ‘ଅବସରବାଦୀ’ (ଅପର୍ଚ୍ୟୁନିଷ୍ଟ) ଶୀର୍ଷକ ଏକ ବ୍ୟଙ୍ଗଚିତ୍ରକୁ ରୋମାନିଆର ଆୟୋଜକ ଅନୁଷ୍ଠାନ ପକ୍ଷରୁ ମନୋନୀତ କରାଯାଇ ପୁରସ୍କୃତ କରାଯାଇଥିଲା। ଏହି ଅନୁଷ୍ଠାନର ୩୦ବର୍ଷ ପୂର୍ତ୍ତି ଅବସରରେ ବିଶ୍ୱସ୍ତରୀୟ କାର୍ଟୁନିଷ୍ଟମାନଙ୍କୁ ସମ୍ମାନିତ କରାଯାଇଛି। ତାଙ୍କର ଏହି କୃତିତ୍ୱ ସମ୍ପର୍କରେ ଜଣାପଡିବା ପରେ ବହୁ ଶୁଭେଚ୍ଛୁ ଓ କାର୍ଟୁନପ୍ରେମୀ ରଥଙ୍କୁ ଶୁଭେଚ୍ଛା ଓ ଅଭିନନ୍ଦନ ଜଣାଇଛନ୍ତି।
