ସାତମାଇଲ, ୧୪।୪(ଡି.ଏନ୍.ଏ.): ଦୁର୍ଘଟଣା ପରେ ଟ୍ରକ୍ ଭିତରେ ଫସି ରହିଥିଲେ ହେଲ୍ପର ଏବଂ ଡ୍ରାଇଭର। ହେଲେ ସେମାନଙ୍କୁ ଉଦ୍ଧାର କରିବା ପରିବର୍ତ୍ତେ ଲୋକମାନେ ବୋହିଚାଲିଲେ ପେଟି ପେଟି ବିୟର। ବିପଦ ବେଳେ ସହାୟତାର ହାତ ବଢ଼ାଇବା ବଦଳରେ ବ୍ୟକ୍ତିଗତ ଲାଭ ପାଇଁ ମାନବିକତା ଭୁଲିଯିବାର ସମ୍ବେଦନଶୀଳ ଚିତ୍ର ଆସିଛି ଢେଙ୍କାନାଳ ଜିଲା ହିନ୍ଦୋଳ ବ୍ଲକ ବାଲିମୀ ଥାନା ଅଞ୍ଚଳରୁ।
ପୋଲିସ ପକ୍ଷରୁ ମିଳିଥିବା ସୂଚନା ଅନୁଯାୟୀ, ବୁଧବାର ଅପରାହ୍ନ ପ୍ରାୟ ସାଢ଼େ ୪ଟା ବେଳେ ଏକ ବିୟର ବୋଝେଇ ଟ୍ରକ୍ (ନଂ. ଓଆର୍ ୦୫ୟୁ ୦୧୯୫) କଟକ ଚୌଦ୍ୱାରରୁ ପୁରୁଣା କଟକ-ସମ୍ବଲପୁର ରାସ୍ତା ଦେଇ ଅନୁଗୋଳ ଅଭିମୁଖେ ଯାଉଥିଲା। ବାଲିମୀ ଥାନା ଗୁଳେହି ବ୍ରିଜ୍ ନିକଟରେ ସମ୍ମୁଖରୁ ଆସୁଥିବା ଏକ ବାଇକ୍ ଆରୋହୀଙ୍କୁ ରକ୍ଷା କରିବାକୁ ଯାଇ ଡ୍ରାଇଭର ଚନ୍ଦନ ସାହୁ ଗାଡ଼ି ଉପରୁ ନିୟନ୍ତ୍ରଣ ହରାଇଥିଲେ। ଫଳରେ ଟ୍ରକ୍ଟି ସୁରକ୍ଷା ବାଡ଼ ଭାଙ୍ଗି ବ୍ରିଜ୍ ତଳକୁ ଖସିପଡ଼ିଥିଲା। ଦୁର୍ଘଟଣା ପରେ ଉକ୍ତ ଗାଡ଼ିରେ ବିୟର ଥିବା ସ୍ଥାନୀୟ ଲୋକେ ଜାଣି ପାରିଥିଲେ। ଏହି ଖବର ପ୍ରଚାର ହେବା ପରେ ସ୍ବଳ୍ପ ସମୟ ମଧ୍ୟରେ ବହୁ ସଂଖ୍ୟାରେ ପୁରୁଷମହିଳା, ଛୋଟପିଲା ରୁଣ୍ଡ ହୋଇଯାଇଥିଲେ। ଗାଡ଼ିରେ ଫସି ରହିଥିବା ଡ୍ରାଇଭର, ହେଲ୍ପରଙ୍କୁ ଉଦ୍ଧାର କରିବା ବଦଳରେ ସମସ୍ତେ ପେଟି ପେଟି ବିୟର ବୋହି ନେଇଥିଲେ। ଫଳରେ ଖୁବ୍ କମ୍ ସମୟ ମଧ୍ୟରେ ଗାଡ଼ି ସମ୍ପୂର୍ଣ୍ଣ ଖାଲି ହୋଇଯାଇଥିଲା। ଦୁର୍ଘଟଣା ପରେ ବହୁ ବିୟର ବୋତଲ ଭାଙ୍ଗି ଏଣେତେଣେ ପଡ଼ିଥିବା ଦେଖିବାକୁ ମିଳିଛି। ସୂଚନା ପାଇ ହିନ୍ଦୋଳ ପୋଲିସ ପହଞ୍ଚତ୍ ଗାଡ଼ିଚାଳକ ଏବଂ ହେଲ୍ପରଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲା। ପ୍ରାଥମିକ ଚିକିତ୍ସା ପରେ ଉଭୟେ ସୁସ୍ଥ ଥିବା ଜଣାପଡ଼ିଛି। ଏ ନେଇ ଥାନାଧିକାରୀ ବ୍ରହ୍ମାନନ୍ଦ ପାତ୍ର କୁହନ୍ତି, ଅଦ୍ୟାବଧି ଥାନାରେ ଲିଖିତ ଅଭିଯୋଗ ହୋଇନାହିଁ। ପୋଲିସ ନିଜ ଆଡୁ ତଦନ୍ତ ଆରମ୍ଭ କରିଛି। ବିଧିବଦ୍ଧ ଭାବେ ଏତଲା ପରେ ପରବର୍ତ୍ତୀ ପଦକ୍ଷେପ ନିଆଯିବ।
ସୂଚନାଯୋଗ୍ୟ, ୫୫ନଂ. ଜାତୀୟ ରାଜପଥ କାମ ଚାଲିଥିବାବେଳେ ଉକ୍ତ ଅଣଓସାରିଆ ପୋଲ ଦେଇ ଦୈନିକ ଶତାଧିକ ଭାରିଯାନ ଚଳପ୍ରଚଳ କରୁଛି। ଫଳରେ ବ୍ରିଜ୍ ଏବଂ ଏହାର ନିକଟବର୍ତ୍ତୀ ଅଞ୍ଚଳରେ ଦୁର୍ଘଟଣା ବଢ଼ିବାରେ ଲାଗିଛି। ଏ ଦିଗରେ ପଦକ୍ଷେପ ନେବାକୁ ଦାବି ହେଉଥିଲେ ହେଁ ବିଭାଗୀୟ ଅଧିକାରୀ କର୍ଣ୍ଣପାତ କରୁନାହାନ୍ତି। ଏହାକୁ ନେଇ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଅସନ୍ତୋଷ ତୀବ୍ର ହେବାରେ ଲାଗିଛି।
