ଭୁବନେଶ୍ୱର,୧୩।୧୨(ବ୍ୟୁରୋ): ବାହାର ରାଜ୍ୟରୁ ଚୋରି, ଭୁବନେଶ୍ୱରରେ ବିକ୍ରି। ସକ୍ରିୟ ରହିଥିବା ଏକ ଆନ୍ତଃରାଜ୍ୟ କାର୍ ଚୋରି ର଼୍ୟାକେଟକୁ ଧରିଛି କମିଶନରେଟ୍ ପୋଲିସ। ରବିବାର ଶହୀଦନଗର ଥାନା ପୋଲିସ ଜଣେ ଅଭିଯୁକ୍ତଙ୍କୁ ଗିରଫ କରିବା ସହ ର଼୍ୟାକେଟର ରହସ୍ୟ ଉନ୍ମୋଚନ କରିଛି। ଗିରଫ ଅଭିଯୁକ୍ତ ହେଲେ ଚନ୍ଦକା ଥାନା ଗୋଠପାଟଣାରେ ରହୁଥିବା ଛତିଶଗଡ଼ କାଙ୍କେର ଜିଲା ସଦର ଥାନାଞ୍ଚଳର ଅବଦୁଲ୍ ସକୁର୍ ଜନ୍କବିର୍(୪୮)। ତାଙ୍କଠାରୁ ପୋଲିସ ଦୁଇଟି ଚୋରା କାର ଜବତ କରିଛି। ପୋଲିସ ଆଇପିସିର ୩୭୯/୪୧୧/୪୧୪/୪୮୨ ଦଫାରେ ଏକ ମାମଲା (ନଂ.୫୦୫/୨୧) ରୁଜୁ କରି ଅଭିଯୁକ୍ତଙ୍କୁ କୋର୍ଟ ଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଅବଦୁଲ୍ ମଧ୍ୟପ୍ରେଦଶ ଓ ଛତିଶଗଡ଼ରୁ ୪୦ଟି ଚୋରା କାର୍ ଆଣି ଭୁବନେଶ୍ୱରରେ ବିକ୍ରି କରିଛି। ଏହି ର଼୍ୟାକେଟ୍ରେ ଦୁଇ ରାଜ୍ୟର ଲୁଟେରା ଗ୍ୟାଙ୍ଗ୍ ସମ୍ପୃକ୍ତ ଥିବା ପୋଲିସ ଜାଣିବାକୁ ପାଇଛି। ତେବେ ଏଥିରେ ଓଡ଼ିଶାରୁ କେହି ସାମିଲ ଅଛନ୍ତି ନା ନାହିଁ ସେନେଇ ପୋଲିସ ଖୋଳତାଡ଼ ଚଳାଇଛି।
ଜବତ ଫାଇନାନ୍ସ ଗାଡ଼ିର ନମ୍ବର ଲଗାଇ ବିକୁଥିଲେ
ଅବ୍ଦୁଲ୍ ବିଭିନ୍ନ ଫାଇନାନ୍ସ କମ୍ପାନୀରେ ପଡ଼ି ରହି ନଷ୍ଟ ହେଉଥିବା ଜବତ କାର୍କୁ କିଣି ବିକ୍ରି କରୁଥିଲେ। ଏହି ସମୟରେ ଛତିଶଗଡ଼ ଓ ମଧ୍ୟପ୍ରଦେଶରେ ଗାଡି ଲୁଟେରାଙ୍କ ସହ ତାଙ୍କର ପରିଚୟ ହୋଇଥିଲା। ସେଠାରୁ ଚୋରି କାର୍କୁ ଭୁବନେଶ୍ୱରରେ ବିକ୍ରି କରିବାକୁ ସେମାନେ ଅଦବୁଲ୍କୁ ଅଫର୍ ଦେଇଥିଲେ। ଅଧିକ ଟଙ୍କା ରୋଜଗାର କରିବା ଲୋଭରେ ଅବଦୁଲ ଉକ୍ତ ଗ୍ୟାଙ୍ଗ୍ ସହ ଯୋଡ଼ି ହୋଇ ଚୋରି ଗାଡ଼ି ବିକ୍ରିର ନୂଆ ବ୍ୟବସାୟ ଆରମ୍ଭ କରିଥିଲେ। ଅବଦୁଲ୍ ଫାଇନାନ୍ସ କମ୍ପାନୀରୁ ଆଣୁଥିବା ଭଙ୍ଗା କାରର ନମ୍ବର ପ୍ଲେଟ୍ କାଢି ରଖୁଥିଲେ। ତେବେ ଲୁଟେରାମାନେ ଯେଉଁ ଚୋରା କାର୍ ଦେଉଥିଲେ ସେଥିରେ ସେ ଉକ୍ତ ନମ୍ବର ଲଗାଇ ବିକ୍ରି କରୁଥିଲେ। ଚୋରା କାର୍ର ବିକ୍ରି ଟଙ୍କାକୁ ସେ ଲୁଟେରା ଗ୍ୟାଙ୍ଗକୁ ଦେବା ସହ ନିଜ କମିଶନ ମଧ୍ୟ କାଟି ରଖୁଥିଲେ।
ଅଭିଯୁକ୍ତଙ୍କୁ ରିମାଣ୍ଡରେ ନେବ ମଧ୍ୟପ୍ରଦେଶ ପୋଲିସ
କମିଶନରେଟ ପୋଲିସ ଅବଦୁଲଙ୍କୁ ଧରିବା ପରେ ମଧ୍ୟପ୍ରଦେଶ ପୋଲିସକୁ ଖବର ଦେଇଥିଲା। ମଧ୍ୟପ୍ରଦେଶ ପୋଲିସ ଶହୀଦନଗର ଥାନାରେ ପହଞ୍ଚତ୍ ତଦନ୍ତ କରିବା ସହ ସେଠାରେ ସକ୍ରିୟ ଥିବା କାର୍ ଲୁଟେରା ଗ୍ୟାଙ୍ଗଙ୍କ ସମ୍ପର୍କରେ ତଥ୍ୟ ହାସଲ ପାଇଁ ଅଭିଯୁକ୍ତ ଅବ୍ଦୁଲକୁ ରିମାଣ୍ଡରେ ନେବ ବୋଲି ଜଣାପଡିଛି।
