ଭୁବନେଶ୍ୱର,୪।୧୦(ସତ୍ୟଜିତ୍ ରାଉତ)ରାଜଧାନୀରେ ହିଟ୍ ଆଣ୍ଡ୍ ରନ୍ ଘଟଣାର ୩ ଦିନ ପରେ ମଙ୍ଗଳବାର କମିଶନରେଟ୍ ପୋଲିସ ହାତରେ ଅଭିଯୁକ୍ତ କାର୍ ମାଲିକ ବିକାଶ ପାଲ୍ (୨୬) ଧରାପଡ଼ିଛନ୍ତି। ସେ କଟକ ଜିଲା ଆଠଗଡ଼ସ୍ଥିତ ସମ୍ପର୍କୀୟଙ୍କ ଘରୁ ଫେରି ନିଜ ଘରକୁ ଯାଉଥିବାବେଳେ ଶିରିପୁରଠାରେ କ୍ୟାପିଟାଲ ଥାନା ପୋଲିସ ଟିମ୍ ତାଙ୍କୁ ଗିରଫ କରିଛି। ଅଭିଯୁକ୍ତ ବିକାଶଙ୍କୁ ଭୁବନେଶ୍ୱର ଏସ୍ଡିଜେଏମ୍ କୋର୍ଟକୁ ଚାଲାଣ କରାଯାଇଥିଲା। ସେଠାରେ ଜାମିନ ନାମଞ୍ଜୁର ହେବା ପରେ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ସୂଚନା ଅନୁଯାୟୀ, ବିକାଶଙ୍କ ଘର ପୁରୀ ଜିଲା କାକଟପୁର ଥାନା ଅଞ୍ଚଳରେ ହୋଇଥିବା ବେଳେ ସେ ଏୟାରଫିଲ୍ଡ ଥାନା ଅନ୍ତର୍ଗତ ପୋଖରୀପୁଟ ଅଞ୍ଚଳରେ ପରିବାର ସହ ରହୁଛନ୍ତି। ସେ ଭୁବନେଶ୍ୱରସ୍ଥିତ କୋଟାକ୍ ମହିନ୍ଦ୍ରା ବ୍ୟାଙ୍କ୍ର ଏକ ଶାଖାରେ ଆସିଷ୍ଟାଣ୍ଟ୍ ମ୍ୟାନେଜର୍ ଭାବେ କାର୍ଯ୍ୟ କରନ୍ତି। ଶୁକ୍ରବାର ବିଳମ୍ବିତ ରାତି ପ୍ରାୟ ୧ଟା ବେଳେ ବିକାଶ ତାଙ୍କ କାର୍ ଯୋଗେ ଦ୍ରୁତ ଗତିରେ ଭୁବନେଶ୍ୱର ଏଜି ଛକରୁ ରାଜମହଲ ଆଡ଼କୁ ଆସୁଥିଲେ। ରାଜମହଲ ନିକଟରେ ଭାରସାମ୍ୟ ହରାଇ ତାଙ୍କ କାର୍ ଫୁଟ୍ପାଥ୍ରେ ଶୋଇଥିବା ଶ୍ରମିକ ଦୀନବନ୍ଧୁ ବରାଳଙ୍କ ଉପରେ ଚଢିଯାଇଥିଲା। ଫଳରେ ଦୀନବନ୍ଧୁଙ୍କ ମୃତ୍ୟୁ ଘଟିଥିବା ବେଳେ ସେଠାରେ ବିଶ୍ରାମ ନେଉଥିବା ୧୦ରୁ ଊର୍ଦ୍ଧ୍ୱ ଲୋକ ବର୍ତ୍ତିଯାଇଥିଲେ। ଏହି ଘଟଣା ପରେ ଲିଙ୍ଗିପୁର ବାଙ୍କୁଆଳସ୍ଥିତ ଦୟାନଦୀ ବନ୍ଧ ପାର୍ଶ୍ୱରେ ବିକାଶ କାର୍ ଛାଡ଼ି ଆଠଗଡ଼ସ୍ଥିତ ସମ୍ପର୍କୀୟଙ୍କ ଘରକୁ ଚାଲିଯାଇଥିଲେ। ସେ ମୋବାଇଲ ଫୋନ୍ ନେଇ ନ ଥିବାରୁ ତାଙ୍କ ସହ ଯୋଗାଯୋଗ କରିବା ପୋଲିସ ପାଇଁ କଷ୍ଟକର ହୋଇପଡ଼ିଥିଲା। ତେବେ ବିକାଶ ଘରକୁ ଫେରୁଥିବା ଖବର ପାଇ ପୋଲିସ ମଙ୍ଗଳବାର ତାଙ୍କୁ କାବୁ କରିଥିଲା। ଏ ସଂକ୍ରାନ୍ତରେ ପୋଲିସ ଆଇପିସି ଦଫା ୨୭୯, ୩୦୪ (କ)ରେ ଏକ ମାମଲା (ନଂ. ୫୮୨/୨୦୨୩) ରୁଜୁ କରି ତଦନ୍ତ ଚଳାଇଥିଲା।
