ଲଇକେରା,୯।୨(ରଞ୍ଜନ କୁମାର ମେହେର): ଝାରସୁଗୁଡା ଜିଲା ଲଇକେରା ବ୍ଳକ ସ୍ଥିତ ଧୂକା ଚୌକଠାରେ ଭୟଙ୍କର ଦୁର୍ଘଟଣା ଘଟିଛି। ଏକ କାର ଭାରସାମ୍ୟ ହରାଇ ଗଛକୁ ପିଟିବାରୁ ୨ ଜଣଙ୍କ ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ଥିବା ସୂଚନା ମିଳିଛି। ମୃତକ ହେଲେ ପ୍ରମୋଦିନୀ ଚୌଧୁରୀ(୮୦), ସୁଶୀଲ ପଟେଲ( ୭୨)। ସେହିଭଳି ଗାଡ଼ି ଚଳାଉଥିବା କୁବେର ଚୌଧୁରୀ( ୬୩)ଙ୍କ ସ୍ଥିତି ଗୁରୁତର ହେବାରୁ ତାଙ୍କୁ ଭୁବନେଶ୍ୱର କ୍ୟାପିଟାଲ ହସ୍ପିଟାଲଙ୍କୁ ସ୍ଥାନାନ୍ତର କରାଯାଇଛି।
ସୂଚନା ଅନୁସାରେ, ଲଇକେରା ସାହାସପୁର ନିକଟସ୍ଥ ବନ୍ଧପାଲି ଗ୍ରାମରୁ କାର ଯୋଗେ ସମ୍ବଲପୁର ଜିଲା ଲଇଡାରେ ଥିବା ଏକ ବାହାଘରରେ ଯୋଗ ଦେବା ପାଇଁ ସାହାସପୁରର ସୁଶୀଲ, ବନ୍ଧପାଲିର ପ୍ରମୋଦିନୀ(୮୦) ଏବଂ ଡ୍ରାଇଭର୍ କୁବେର ଯାଇଥିଲେ। ସୋମବାର ଅପରାହ୍ନରେ ଫେରୁଥିବା ସମୟରେ ଲଇକେରା ସ୍ଥିତ ଧୂକାଚୌକଠାରେ କାରଟି ଭାରସାମ୍ୟ ହରାଇ ଗଛରେ ପିଟି ହୋଇ ଦୁର୍ଘଟଣା ଗ୍ରସ୍ତ ହୋଇଥିଲା। ଫଳରେ ତିନି ଜଣଙ୍କୁ ମୁଦ୍ରାଜୋର ସ୍ଥିତ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇଥିଲା। ସେଠାରେ ପ୍ରମୋଦିନୀଙ୍କୁ ମୃତ ଘୋଷିତ କରାଯାଇଥିବା ବେଳେ ସମସ୍ତଙ୍କୁ ଜିଲା ମୁଖ୍ୟ ଚିକିତ୍ସାଳୟ ସ୍ଥାନାନ୍ତର କରାଯାଇଥିଲା। ଜିଲା ମୁଖ୍ୟ ଡାକ୍ତରଖାନା ପହଞ୍ଚିବା ପରେ ସୁଶିଲଙ୍କୁ ମଧ୍ୟ ଡାକ୍ତର ମୃତ ଘୋଷିତ କରିଥିଲେ। କୁବେରଙ୍କ ସ୍ଥିତି ଗୁରୁତର ହେବାରୁ ତାଙ୍କୁ ଭୁବନେଶ୍ୱର କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଥିବା ସୂଚନା ମିଳିଛି। ଆସନ୍ତକାଲି ମୃତ ଦୁଇଜଣଙ୍କ ପୋଷ୍ଟମର୍ଟମ କରି ପରିବାରକୁ ହସ୍ତାନ୍ତର କରାଯିବ ବୋଲି ଲଇକେରା ଆଇଆଇସି କୃଷ୍ଣଚନ୍ଦ୍ର ମେହେର ସୂଚନା ଦେଇଛନ୍ତି।
