ବାଲେଶ୍ୱର,୧୨ା୨(ବାଞ୍ଛାନିଧି ଦେ): ବାଲେଶ୍ୱର ଷ୍ଟେଶନରେ ଗୁରୁବାର ଟ୍ରେଡ୍ ୟୁନିଅନ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି। ସକାଳେ ବାଙ୍ଗିରିପୋଷି-ପୁରୀ ଏକ୍ସପ୍ରେସ ଟ୍ରେନ୍କୁ ଅଟକାଇ ପ୍ରତିବାଦ କରାଯାଇଛି।
ଏଥିସହ ସହରର ବିଭିନ୍ନ ସ୍ଥାନରେ ଆନ୍ଦୋଳନକାରୀଙ୍କ ବିକ୍ଷୋଭ ଜାରି ରହିଛି। କେନ୍ଦ୍ର ସରକାରଙ୍କ ଶ୍ରମିକ ସ୍ବାର୍ଥ ବିରୋଧୀ ୪ଟି ଶ୍ରମ କୋଡ୍ ବାତିଲ ଓ ଅନ୍ୟାନ୍ୟ ଦାବିରେ ଏହି ବନ୍ଦ ଡାକରା ଦିଆଯାଇଛି। କେନ୍ଦ୍ରୀୟ ଶ୍ରମିକ ସଂଗଠନ ସମୂହ ମିଳିତ ମଞ୍ଚ ଏବଂ ବାଲେଶ୍ୱର ଟିୟୁଏସିସି ପକ୍ଷରୁ ଟ୍ରେନ୍ ଅଟକାଇବା ସହ ସହରର ବିଭିନ୍ନ ସ୍ଥାନରେ ପିକେଟିଂ ଜାରି ରହିଛି। ଷ୍ଟେଶନ ଛକରେ ଆନ୍ଦୋଳନ ଓ ପ୍ରତିବାଦ ସମୟରେ ବାମପନ୍ଥୀ ନେତା ଗୌରାଙ୍ଗ ପାଣିଗ୍ରାହୀଙ୍କୁ କାର୍ ଧକ୍କା ଦେଇଥିଲା। ତାଙ୍କ ନାକ ଓ ମୁହଁରେ ଆଘାତ ଫଳରେ ସେ ଗୁରୁତର ହୋଇଛନ୍ତି। ପୋଲିସ ଭ୍ୟାନ ଯୋଗେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ଜିଲାପାଳଙ୍କ ଅଫିସରେ କଂଗ୍ରେସ କର୍ମୀ ଧସେଇ ପଶିଥିବା ଦେଖିବାକୁ ମିଳିଛି। ଅଫିସ ବନ୍ଦ କରିବାପାଇଁ କର୍ମଚାରୀଙ୍କୁ କୁହାଯାଇଥିଲା। ଶେଷରେ କାର୍ଯ୍ୟ ବନ୍ଦ କରି କର୍ମଚାରୀମାନେ ଅଫିସ ଛାଡ଼ିବାକୁ ବାଧ୍ୟ ହୋଇଥିଲେ। ସେହିପରି ଏକ ମଲ୍ ଖୋଲା ଥିବାରୁ ସେଠାରେ ଆନ୍ଦୋଳନକାରୀମାନେ ପହଞ୍ଚି ପ୍ରତିବାଦ କରିଥିଲେ। ତୁରନ୍ତ ମଲ ବନ୍ଦ କରିବା ପାଇଁ କର୍ତ୍ତୃପକ୍ଷଙ୍କୁ ଚେତାବନୀ ଦେଇଥିଲେ। ପରେ ସେଠାରେ ଥିବା ଗ୍ରାହକ ପଳାଇଥିଲେ। କର୍ମଚାରୀମାନେ ମଲ୍ ବନ୍ଦ କରିବାକୁ ବାଧ୍ୟ ହୋଇଥିଲେ।
