ସୋନପୁର,୧୨।୬(ନି.ପ୍ର.) ଖୋର୍ଦ୍ଧା-ବଲାଙ୍ଗୀର ୫୭ ନମ୍ବର ଜାତୀୟ ରାଜପଥର ସୋନପୁର କୃଷି ବିଜ୍ଞାନ କେନ୍ଦ୍ର ନିକଟରେ ସୋମବାର ଏକ ସଡ଼କ ଦୁର୍ଘଟଣା ଘଟିଛି। ବରକନ୍ୟାଙ୍କୁ ଧରି ଫେରୁଥିବା ଏକ କାର ଗଛକୁ ଜୋରରେ ଧକ୍କା ଦେଇଛି। ଫଳରେ କନ୍ୟା ଅନିତା ପ୍ରଧାନ(୨୫), ବର ସୋନୁ ପ୍ରଧାନ(୩୦)ଙ୍କ ସମେତ ପୂଜକ ଦେବେନ୍ଦ୍ର ମିଶ୍ର, ଡ୍ରାଇଭର ଓ ବରକନ୍ୟାଙ୍କ ପରିବାରର ଅନ୍ୟ ୨ଜଣ ଗୁରୁତର ହୋଇଛନ୍ତି। ଗୁରୁତରଙ୍କୁ ସୁବର୍ଣ୍ଣପୁର ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ତେବେ ଅବସ୍ଥା ସଙ୍କଟାପନ୍ନ ହେବାରୁ ସମସ୍ତଙ୍କୁ ସଙ୍ଗେସଙ୍ଗେ ବୁର୍ଲା ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।
ସୂଚନା ଅନୁଯାୟୀ ବଲାଙ୍ଗୀର ଜିଲା ଟିଟିଲାଗଡରେ ରବିବାର ରାତିରେ ଅନିତା ଓ ସୋନୁଙ୍କ ବିବାହ ହୋଇଥିଲା। ବିବାହ ସାରି ବରଯାତ୍ରୀ ଦଳ ଓ ବରକନ୍ୟା ଆଗପଛ ହୋଇ ସମ୍ବଲପୁର ଫବ୍ସି ସ୍ଥିତ ବାସଭବନକୁ ଫେରୁଥିଲେ। ବରକନ୍ୟା, ପୂଜକ ଓ ପରିବାରବର୍ଗ ମହିନ୍ଦ୍ରା କେୟୁଭି କାର ନଂ. ଓଆର୧୭ପି-୮୨୪୩ରେ ସମ୍ବଲପୁର ଅଭିମୁଖେ ଯାଉଥିଲେ। ତେବେ କାର ଡ୍ରାଇଭର ଭାରସାମ୍ୟ ହରାଇ ଏକ ଚାକୁଣ୍ଡା ଗଛକୁ ଧକ୍କା ଦେଇଥିଲା। ସାନପୁର ଝିଙ୍କି ଅଞ୍ଚଳର ଲବ ପଟ୍ଟନାୟକ ଓ କିଛି ସ୍ବେଚ୍ଛାସେବୀ ଖବର ପାଇ କନ୍ୟା, ବର, ପୂଜକ ଓ ଅନ୍ୟ ଆହତଙ୍କୁ କାର ଭିତରୁ ବାହାର କରିଥିଲେ। ଖବର ପାଇ ସମ୍ବଲପୁର ଅଭିମୁଖେ ଯାଉଥିବା ବର ସୋନୁଙ୍କ ବାପା ଉଲୁଣ୍ଡା ନିକଟରୁ ଦୁର୍ଘଟଣା ସ୍ଥଳକୁ ଫେରିଥିଲେ। ତାଙ୍କ କାର୍ରେ ଆହତଙ୍କୁ ସୁବର୍ଣ୍ଣପୁର ଜିଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ତେବେ କାର ଡ୍ରାଇଭର ସେମିତି ଗଛରେ ଚାପି ହୋଇ ରହିଥିଲେ। କିଛି ଟ୍ରକ୍ ଡ୍ରାଉଭର ଓ ହେଲପର ତାଙ୍କୁ ବହୁ କଷ୍ଟରେ ସକାଳ ୫ଟା ୪୫ରେ ବାହାର କରିବାକୁ ସକ୍ଷମ ହୋଇଥିଲେ। ଦୁର୍ଘଟଣାରେ କନ୍ୟା ଅନିତାଙ୍କ ମୁଣ୍ଡ ଓ ମୁହଁରେ ଗଭୀର କ୍ଷତ ସୃଷ୍ଟି ହୋଇଛି। ବର ସୋନୁଙ୍କ ମୁଣ୍ଡ ଫାଟି ପ୍ରବଳ ରକ୍ତସ୍ରାବ ହୋଇଥିଲା। ସେହିପରି ପୂଜକ ଦେବେନ୍ଦ୍ରଙ୍କ ହାତ ଭାଙ୍ଗିବା ସହ ଶରୀରର ବିଭିନ୍ନ ସ୍ଥାନରେ କ୍ଷତ ସୃଷ୍ଟି ହୋଇଛି। ସ୍ଥାନୀୟ ଲୋକେ ୧୦୮ ଆମ୍ବୁଲାନ୍ସ ଓ ପିସିଆର ଭ୍ୟାନ୍କୁ ଫୋନ୍ କରିଥିଲେ । ମାତ୍ର ଆମ୍ବୁଲାନ୍ସ ଆସି ନ ଥିବା ଅଭିଯୋଗ ହୋଇଛି। ରାତି ପର୍ଯ୍ୟନ୍ତ ଦୁର୍ଘଟଣା ସମ୍ପର୍କରେ ସୋନପୁର ଥାନାରେ କୌଣସି ମାମଲା ରୁଜୁ ହୋଇନାହିଁ। ପୋଲିସ ଅଧିକାରୀ ସକାଳେ ତଦନ୍ତ ପାଇଁ ଚିକିତ୍ସାଳୟକୁ ଯିବା ପୂର୍ବରୁ ସମସ୍ତଙ୍କୁ ବୁର୍ଲା ସ୍ଥାନାନ୍ତର କରା ଯାଇଥିଲା । କୌଣସି ସୂଚନା ନ ଥିବାରୁ ପୋଲିସ ତଦନ୍ତରେ ବିଳମ୍ବ ହୋଇଥିବା କୁହାଯାଉଛି।
