ନୂଆଦିଲ୍ଲୀ, ୩୦।୩ : ତାରକା ଖେଳାଳି ରିଷଭ ପନ୍ତ ଦୁର୍ଘଟଣା ଜନିତ ଆହତ ସମସ୍ୟା ମଧ୍ୟ ଦେଇ ଗତି କରୁଥିବାରୁ ଆଗାମୀ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ପାଇଁ ଦିଲ୍ଲୀ କ୍ୟାପିଟାଲ୍ସ ଦଳରେ ଉଇକେଟ କିପରଙ୍କୁ ନେଇ ସମସ୍ୟା ଦେଖା ଦେଇଛି। ଏହି ସମସ୍ୟାର ସମାଧାନ ପାଇଁ ଦିଲ୍ଲୀ ଫ୍ରାଞ୍ଚାଇଜ୍ ଅନ୍କ୍ୟାପେଡ୍ ଭାରତୀୟ ଉଇକେଟ କିପର ଅଭିଷେକ ପୋରେଲଙ୍କ ସହ ଚୁକ୍ତି କରିବ ବୋଲି ଜଣାଯାଇଛି। ସେ ଗତ ସପ୍ତାହରେ ଅନ୍ୟ ଭାରତୀୟ ଉଇକେଟ କିପରଙ୍କ ସହ ଟ୍ରାଏଲ ଦେଇଥିଲେ। ପୋରେଲଙ୍କ ନାମ ଯଦିଓ ଆନୁଷ୍ଠାନିକଭାବେ ଘୋଷଣା କରାଯାଇନାହିଁ ତେବେ ଗତ ସପ୍ତାହେଧରି ପ୍ରାକ୍ଟିସ ଗେମ୍ ଗୁଡ଼ିକ ପରେ ଏହା ଏକପ୍ରକାର ନିଶ୍ଚିତ ହୋଇଛି। ଗତ କିଛି ସପ୍ତାହଧରି ପୋରେଲଙ୍କ ବ୍ୟତୀତ ଅନ୍ୟ ଭାରତୀୟ ଅନ୍କ୍ୟାପେଡ ଉଇକେଟ କିପର ଶେଲଡନ ଜ୍ୟାକଶନ, ଲୁଭନିଥ୍ ସିସୋଡିଆ ଓ ବିବେକ ସିଂ ଟ୍ରାଏଲ ଦେଇଥିଲେ। ଦିଲ୍ଲୀ କ୍ୟାପିଟାଲ୍ସ କ୍ରିକେଟ ଡାଇରେକ୍ଟର ସୌରଭ ଗାଙ୍ଗୁଲି, ମୁଖ୍ୟ କୋଚ୍ ରିକି ପଣ୍ଟିଂଙ୍କୁ ନେଇ ଗଠିତ କୋଚିଂ ଗ୍ରୁପ୍ର ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି ଟ୍ରାଏଲ ଗୁଡ଼ିକ ଅନୁଷ୍ଠିତ ହୋଇଥିଲା। ପୋରେଲ ଘରୋଇ କ୍ରିକେଟରେ ବେଙ୍ଗଲ ପକ୍ଷରୁ ଉଇକେଟ କିପିଂ କରିଥାନ୍ତି। ସେ ଜଣେ ଭଲ ଉଇକେଟ କିପର, ତେବେ କୌଣସି ଫର୍ମାଟରେ ବଡ଼ ସ୍କୋର କରିପାରି ନାହାନ୍ତି। ସୟଦ ମୁସ୍ତାକ ଅଲୀ କ୍ରିକେଟ ଟୁର୍ନାମେଣ୍ଟର ୩ ମ୍ୟାଚରେ ସେ ମାତ୍ର ୨୨ ରନ କରିଥିଲେ। ଏହା ମଧ୍ୟରେ ଗୋଟିଏ ଇନିଂସ ୨୦* ଥିଲା।
ପୋରେଲ ସାମିଲ ହେଲେ ଦିଲ୍ଲୀ ଦଳର ପ୍ରଥମ ପସନ୍ଦ ଉଇକେଟ କିପର ରହିବେ ସର୍ଫରାଜ ଖାଁ। ଘରୋଇ କ୍ରିକେଟରେ ଗତ ସିଜନଧରି ସର୍ଫରାଜ ଚମତ୍କାର ଫର୍ମରେ ଅଛନ୍ତି। କ୍ରମାଗତ ୨ ରଣଜୀ ସିଜନ (୨୦୧୯-୨୦ ଓ ୨୦୨୧-୨୨)ରେ ସେ ୯୦୦ରୁ ଊର୍ଦ୍ଧ୍ୱ ରନ ସ୍କୋର କରିଛନ୍ତି। ଗତ ସିଜନରେ ସେ ୬ ଇନିଂସରେ ୫୫୬ ରନ କରିଥିଲେ। ସୟଦ ମୁସ୍ତାକ ଅଲୀ ଟୁର୍ନାମେଣ୍ଟରେ ମୁମ୍ବାଇର ସଫଳତାରେ ସର୍ଫରାଜଙ୍କ ଭୂମିକା ଗୁରୁତ୍ୱପୂର୍ଣ୍ଣ ଥିଲା। ଗତ ସିଜନରେ ସେ ନିଜ ବେସ୍ ପ୍ରାଇସ୍ ୨୦ ଲକ୍ଷ ଟଙ୍କାରେ କିଣା ଯାଇଥିଲେ। ଲୋୟର ଅର୍ଡରରେ ବ୍ୟାଟିଂ ସୁଯୋଗ ପାଇଥିବା ସର୍ଫରାଜ ୬ ଗେମ୍ରେ ୯୧ ରନ ସ୍କୋର କରିଥିଲେ। ସୟଦ ମୁସ୍ତାକ ଅଲୀରେ ସର୍ଫରାଜ ମୁମ୍ବାଇ ପକ୍ଷରୁ ଉଇକେଟ କିପିଂ କରିଥାନ୍ତି। ତେଣୁ ପନ୍ତଙ୍କ ଅନୁପସ୍ଥିତିରେ ତାଙ୍କୁ ଏହି ଭୂମିକାଲାଗି ପ୍ରସ୍ତୁତ ରହିବାକୁ ଜାନୁୟାରୀରୁ ନିର୍ଦ୍ଦେଶ ଦିଆ ଯାଇଛି।
କ୍ୟାପିଟାଲ୍ସ ଦଳର ଅନ୍ୟ ଉଇକେଟ କିପିଂ ବିକଳ୍ପ ହେଲେ ଇଂଲଣ୍ଡର ଫିଲ୍ ସଲ୍ଟ। ଚଳିତବର୍ଷ ହୋଇଥିବା ନିଲାମରେ ତାଙ୍କୁ ବେସ୍ ପ୍ରାଇସ୍ ୨ କୋଟି ଟଙ୍କାରେ ଦିଲ୍ଲୀ କିଣିଥିଲା। ନିକଟରେ ଇଂଲଣ୍ଡ ଦଳର ବାଂଲାଦେଶ ଗସ୍ତରେ ଯଦିଓ ସେ ନିରାଶ କରିଥିଲେ ତେବେ ଘରୋଇ କ୍ରିକେଟରେ ୧୮୦ ଟି୨୦ ମ୍ୟାଚ ଖେଳିବାର ଦକ୍ଷତା ରଖିଛନ୍ତି। ୧୪୯.୭୯ ଷ୍ଟ୍ରାଇକ୍ ହାରରେ ସେ ୪୧୧୮ ରନ ସ୍କୋର କରିଛନ୍ତି। ଦିଲ୍ଲୀ କ୍ୟାପିଟାଲ୍ସ ଦଳ ଏପ୍ରିଲ ୧ରେ ଏହାର ପ୍ରଥମ ମ୍ୟାଚ ଲକ୍ଷ୍ନୌ ସୁପରଜାଏଣ୍ଟ୍ସ ସହିତ ଖେଳିବ।
