ବ୍ରହ୍ମପୁର,୧୫ା୧୦(ସୁବାସ ଚନ୍ଦ୍ର ପାଢ଼ୀ): ବ୍ରହ୍ମପୁରକୁ ଗଞ୍ଜେଇ ଚାଲାଣ ହେଉଥିବା ଅବକାରୀ ସଦର ରେଞ୍ଜ ଏସ୍ପି ପ୍ରବୀଣ କୁମାର ପ୍ରଧାନଖବର ପାଇଥିଲେ। ତାଙ୍କ ନିର୍ଦ୍ଦେଶରେ ଡିଏସ୍ପି ସ୍ନେହଲତା ନାୟକ ଓ କୁମୁଦ ରଞ୍ଜନ ନାୟକଙ୍କ ନେତୃତ୍ୱରେ ଏକ ଟିମ୍ ଗଠନ ହୋଇଥିଲା। ବୁଧବାର ସକାଳେ ବ୍ରହ୍ମପୁର ସହର ପ୍ରବେଶ ଜଗଦଳପୁର ଛକରେ ଟିମ୍ ପାଟ୍ରୋଲିଂ କରୁଥିଲା। ସନ୍ଦେହଜନକ ଭାବେ ଆସୁଥିବା ଏକ ପିକ୍ଅପ୍ ନଂ (ଓ ୦୫ଏ ଏନ-୮୬୬୩)କୁ ଅଟକାଇ ଯାଞ୍ଚ ବେଳେ ସେଥିରେ ୧୫ଟି ବସ୍ତାରେ ଗଞ୍ଜେଇ ଭର୍ତ୍ତି ହୋଇଥିବା ଜଣାପଡ଼ିଥିଲା। ଗାଡ଼ିଚାଳକ ତଥା ଗଞ୍ଜେଇ ଚାଲାଣକାରୀଙ୍କୁ କାବୁ କରିଥିଲା। ସେ ହେଲେ ଉତ୍ତରପ୍ରଦେଶର ପରଭେଜ ଆଲମ (୩୨)। ଜେରା ବେଳେ ସେ ଉକ୍ତ ଗଞ୍ଜେଇ ଗଜପତି ଅଞ୍ଚଳରୁ ଆଣି ବ୍ରହ୍ମପୁର ଦେଇ ଉତ୍ତରପ୍ରଦେଶ ଚାଲାଣ କରିଥାନ୍ତେ ବୋଲି ଟିମ ଆଗରେ ସ୍ବୀକାର କରିଛନ୍ତି। ଜବତ ଗଞ୍ଜେଇ ଓ ଗାଡ଼ିର ମୂଲ୍ୟ ପ୍ରାୟ ୫୨ ଲକ୍ଷ ହେବ ବୋଲି ଇନ୍ସପେକ୍ଟର ମନୀଷା ଭୋଳ ସୂଚନା ଦେଇଛନ୍ତି।
ଅବକାରୀ ପୋଲିସ ଏସଂକ୍ରାନ୍ତରେ ୧୧୮/୨୫-୨୬ରେ ଏକ ମାମଲା ରୁଜୁ କରିଛି। ଅଭିଯୁକ୍ତ ପରଭେଜଙ୍କୁ ଗିରଫ କରି କୋର୍ଟ ଚାଲାଣ କରିଛି। ଉକ୍ତ ଅଭିଯୁକ୍ତଙ୍କ ପୂର୍ବରୁ ଅପରାଧ ରେକର୍ଡ ଅଛି କି ନାହିଁ ସେ ନେଇ ତଦନ୍ତ ଜାରି ରହିଛି ବୋଲି ସେ କହିଥିଲେ। ଆଜିର ଏହି ଚଢ଼ାଉରେ ଇନ୍ସପେକ୍ଟର ଅର୍ଜୁନ ମଲ୍ଲିକ, ମନୀଷା ଭୋଳ, ବି. ମନୋଜ କୁମାର, ଏସ୍ଆଇ ସଙ୍ଗୀତା ମହାପାତ୍ର, ଏଏସ୍ଆଇ ସନ୍ତୋଷ କୁମାର ପାଢ଼ୀ, ଭୁବନୀ ବେହେରା, ଶିଶିରକାନ୍ତ ନାଏକ, ସୌମ୍ୟରଞ୍ଜନ ଜେନା ଓ ଅନ୍ୟାନ୍ୟ କର୍ମଚାରୀ ସାମିଲ ଥିଲେ।
