ବରଗଡ,୧୦।୨(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ କ୍ୟାନସର ରୋଗୀଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଏହି ଦୃଷ୍ଟିରୁ ବରଗଡ଼ କ୍ୟାନସର ହସପିଟାଲକୁ ଶୀଘ୍ର ପୂର୍ଣ୍ଣ କାର୍ଯ୍ୟକ୍ଷମ କରିବା ଦିଗରେ ତ୍ବରିତ ପଦକ୍ଷେପ ନେବାକୁ ବରଗଡ଼ ଲୋକସଭା ସାଂସଦ ସାଂସଦ ପ୍ରଦୀପ ପୁରୋହିତ ଚିଠା ଲେଖି ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି। ଚିଠିରେ ସେ ଉଲ୍ଲେଖ କରିଛନ୍ତି, ସରକାରୀ ତଥ୍ୟ ଅନୁଯାୟୀ, ୨୦୧୩ ମସିହାରେ ଓଡ଼ିଶାରେ କ୍ୟାନସର ରୋଗୀଙ୍କ ସଂଖ୍ୟା ୪୩ ହଜାର ୨୧୦ ଥିଲା। ୨୦୨୨ ମସିହା ବେଳକୁ ଏହା ୫୨ ହଜାର ୯୬୦କୁ ବୃଦ୍ଧି ପାଇଥିଲା । ସେହିପରି ସେତେବେଳେ ବେଳେ କ୍ୟାନସର ରୋଗୀଙ୍କ ମୃତ୍ୟୁ ୨୩ହଜାର ୮୮୬ରୁ ୨୯ ହଜାର ୨୮୭କୁ ବୃଦ୍ଧି ପାଇଥିଲା। (ଇସିଏମଆର୍ )ର ଜାତୀୟ କ୍ୟାନସର ପଞ୍ଜିକା କାର୍ଯ୍ୟକ୍ରମ ଅନୁଯାୟୀ, ୨୦୨୫ ମସିହା ସୁଦ୍ଧା ଏହି ସଂଖ୍ୟା ୫୫,୦୦୦ ଅତିକ୍ରମ କରିଥିବ ବୋଲି ଆଶା କରାଯାଉଛି। ପଶ୍ଚିମ ଓଡ଼ିଶାରେ ୨୦୨୧-୨୩ ମଧ୍ୟରେ ବରଗଡ଼, ସମ୍ବଲପୁର ଏବଂ ବଲାଙ୍ଗୀର ଭଳି ଜିଲା ସମେତ ପ୍ରାୟ ୨୨ହଜାର ୦୦୦ ନୂତନ ମାମଲା ରିପୋର୍ଟ ହୋଇଥିଲା, ଯେଉଁଥିରେ ବହୁ ସଂଖ୍ୟକ ଲୋକଙ୍କୁ ଚିକିତ୍ସା ପାଇଁ ରାଜ୍ୟ ବାହାରକୁ ଯିବାକୁ ବାଧ୍ୟ କରାଯାଇଥିଲା। ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ, କେନ୍ଦ୍ର ସରକାର ଆୟୁଷ୍ମାନ ଭାରତ ଭଳି ଯୋଜନା ମାଧ୍ୟମରେ ଗରିବ ଲୋକଙ୍କୁ ଉନ୍ନତ ସ୍ୱାସ୍ଥ୍ୟ ସୁରକ୍ଷା ଯୋଗାଇ ଦେଇଛନ୍ତି ଏବଂ ବର୍ତ୍ତମାନର କେନ୍ଦ୍ର ସରକାର “ସବକା ସାଥ, ସବକା ବିକାଶ” ର ପ୍ରତିବଦ୍ଧତା ସହିତ ସ୍ୱାସ୍ଥ୍ୟ ଭିତ୍ତି ଭୂମିକୁ ସୁଦୃଢ଼ କରୁଛନ୍ତି। ଏହି ପରିପ୍ରେକ୍ଷୀରେ, ବରଗଡ଼ ସାଂସଦ ପ୍ରଦୀପ ପୁରୋହିତ ଦାବି କରି କହିଛନ୍ତି, ୧୩୮ କୋଟି ଟଙ୍କା ବ୍ୟୟରେ ନିର୍ମିତ ବରଗଡ଼ କ୍ୟାନସର ହସ୍ପିଟାଲରେ ସମସ୍ତ ମଞ୍ଜୁର ପଦବୀ ତୁରନ୍ତ ପୂରଣ କରାଯାଉ ଏବଂ ଓଡ଼ିଶାର ଗରିବ ରୋଗୀମାନେ ସମୟୋଚିତ, ସୁଗମ ଏବଂ ଗୁଣାତ୍ମକ ଚିକିତ୍ସା ପାନ୍ତୁ ଏଥିସହ ପିଇଟି – ସିଟି ବିକିରଣ ଏବଂ ଆଇସିୟୁ ଭଳି ସେବା ମଧ୍ୟ ତୁରନ୍ତ ଆରମ୍ଭ କରାଯାଉ ବୋଲି ସେ ଦାବି କରିଛନ୍ତି।
