ଓଟାୱା,୧୫ ।୨: କାନାଡାରେ କରୋନା ମହାମାରୀକୁ ନେଇ ଲାଗିଥିବା ପ୍ରତିବନ୍ଧକକୁ ବିରୋଧ କରି କରାଯାଉଥିବା ପ୍ରଦର୍ଶନକୁ ରୋକିବା ପାଇଁ ସେଠାରେ ସୋମବାରଠାରୁ ଏମରଜେନ୍ସି ଲାଗୁ କରାଯାଇଛି । ଏଏନ୍ଆଇର ସୂଚନା ଅନୁଯାୟୀ, କାନାଡାର ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ଦେଶରେ ଜରୁରୀକାଳୀନ ପରିସ୍ଥିତି ଅଧିନିୟମ ଲାଗୁ କରିଛନ୍ତି । କରୋନା ମହାମାରୀକୁ ନେଇ ଲାଗିଥିବା ପ୍ରତିବନ୍ଧକକୁ ବିରୋଧ କରି ସେଠାରେ ବିରୋଧ ପ୍ରଦର୍ଶନ ଚାଲିଛି । ଦେଶବ୍ୟାପୀ ଟ୍ରକ୍ ଡ୍ରାଇଭରମାନେ ଉଗ୍ର ପ୍ରଦର୍ଶନ କରିବାରୁ ପ୍ରଧାନମନ୍ତ୍ରୀ ଦେଶରେ ଏମରଜେନ୍ସି ଲାଗୁ କରିଛନ୍ତି । ୫୦ ବର୍ଷ ମଧ୍ୟରେ ଏହା ପ୍ରଥମଥର ଲାଗି କରାଯାଇଛି । ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ କହିଛନ୍ତି ଟ୍ରକ୍ ଡ୍ରାଇଭରମାନଙ୍କ ବିରୋଧକୁ ଶେଷ କରିବାକୁ ସେ ଦେଶରେ ଏମରଜେନ୍ସି ଲାଗୁ କରିଛନ୍ତି ଯାହା ଅତ୍ୟନ୍ତ ଜରୁରୀ ପରିସ୍ଥିତରେ ଲାଗୁ କରାଯାଇଥାଏ । ପ୍ରଧାନମନ୍ତ୍ରୀ କହିଛନ୍ତି ଏହାଦ୍ୱାରା ଜନତାଙ୍କର ସୁରକ୍ଷା ସହ ଅର୍ଥନୀତିର ବି ସୁରକ୍ଷା ହୋଇପାରିବ । ଆମେ ଅବୈଧ ଗତିବିଧିକୁ ଆଗକୁ ବଢିବାକୁ ଦେବୁନାହିଁ ବୋଲି ସେ କହିଛନ୍ତି ।
