ଦିନ ଥିଲା ସମଗ୍ର ବିଶ୍ୱରେ ମ୍ୟାଲେରିଆ ଜ୍ୱର ତାହାର କାୟା ବିସ୍ତାର କରିଥିଲା। କିନ୍ତୁ ବର୍ତ୍ତମାନ ଏହି ସ୍ବାସ୍ଥ୍ୟ ସମସ୍ୟା କେତେ ନିୟନ୍ତ୍ରଣାଧୀନ ତାହା କହିବା ଅନାବଶ୍ୟକ। ଏଭଳି ଜ୍ୱର ନେଇ ପ୍ରାୟ ଅନେକେ ସଚେତନ। ପ୍ରାରମ୍ଭିକ ଅବସ୍ଥାରୁ ଔଷଧ ଖାଇବା ସହ ଉପଯୁକ୍ତ ଚିକିତ୍ସା କଲେ ସେଥିରୁ ସମ୍ପୂର୍ଣ୍ଣ ଆରୋଗ୍ୟ ମିଳିପାରୁଛି। ତଥାପି କେତେକେ ଏହାକୁ ଗୁରୁତ୍ୱ ଦେଉନାହାନ୍ତି। ଫଳରେ ଯେତେବେଳେ ମ୍ୟାଲେରିଆ ଜ୍ୱର ଗମ୍ଭୀର ଆକାର ଧାରଣ କରୁଛି ସେତେବେଳେ ତାହା ଅନେକ ସମୟରେ ମୃତ୍ୟୁର କାରଣ ସାଜୁଛି। ତେଣୁ ମ୍ୟାଲେରିଆ ବିଷୟରେ ଅଧିକ ଜନସଚେତନତା ସୃଷ୍ଟି କରାଯିବାକୁ ପ୍ରତିବର୍ଷ ଉଦ୍ୟମ କରାଯାଉଛି। ଏଥିଲାଗି ପ୍ରତ୍ୟେକ ବର୍ଷ ଏପ୍ରିଲ ୨୫ ତାରିଖକୁ ‘ବିଶ୍ୱ ମ୍ୟାଲେରିଆ ଦିବସ’ ଭାବରେ ପାଳନ କରାଯାଇଆସୁଛି। ଚଳିତ ବର୍ଷ ବିଶ୍ୱ ସ୍ବାସ୍ଥ୍ୟ ସଙ୍ଗଠନ ‘ଜିରୋ ମ୍ୟାଲେରିଆ’ ବା ମ୍ୟାଲେରିଆକୁ ଶୂନରେ ପହଞ୍ଚାଇବା ଉପରେ ଗୁରୁତ୍ୱ ଦେଇଛି। ଏ ବର୍ଷ ବିଶ୍ୱ ମ୍ୟାଲେରିଆ ଦିବସ ଅବସରରେ ଉକ୍ତ ସଙ୍ଗଠନ ପକ୍ଷରୁ ଘୋଷିତ ସ୍ଲୋଗାନଟି ହେଉଛି ‘ଟାଇମ୍ ଟୁ ଡେଲିଭର ଜିରୋ ମ୍ୟାଲେରିଆ : ଇନ୍ଭେଷ୍ଟ, ଇନୋଭେଟ, ଇମ୍ପ୍ଲିିମେଣ୍ଟ’।
ସାଧାରଣତଃ ମ୍ୟାଲେରିଆ ଜ୍ୱର ମାଈ ଏନୋଫିଲିସ୍ ମଶା ଯୋଗୁ ବ୍ୟାପିଥାଏ। ଆକ୍ରାନ୍ତ ବ୍ୟକ୍ତିଙ୍କୁ ଏହି ମଶା କାମୁଡ଼ିବା ପରେ ଯଦି ସୁସ୍ଥ ଲୋକଙ୍କୁ କାମୁଡ଼େ ତେବେ ସେ ମ୍ୟାଲେରିଆ ଦ୍ୱାରା ଆକ୍ରାନ୍ତ ହୋଇଥାଆନ୍ତି। ମ୍ୟାଲେରିଆର ଏହି ପରଜୀବୀ ବା ପାରାସାଇଟ୍କୁ ଜଣେ ଆର୍ମି ସର୍ଜନ ଡା. ରୋନାଲ୍ଡ ରସ୍ ଆବିଷ୍କାର କରିଥିଲେ।
ବର୍ତ୍ତମାନ ସମଗ୍ର ବିଶ୍ୱରେ ମ୍ୟାଲେରିଆ ନିୟନ୍ତ୍ରଣାଧୀନ ହୋଇପାରିଛି। କାରଣ ଏହାର ଲକ୍ଷଣ ପ୍ରକାଶ ପାଇବା ମାତ୍ରେ ଚିକିତ୍ସା କରାଇ ନେଲେ ତାହା ଗୁରୁତର ଆକାର ଧାରଣ କରି ନ ଥାଏ। ଯଦି ମ୍ୟାଲେରିଆର ଲକ୍ଷଣ ପ୍ରକାଶ ପାଏ ଆଉ ଆବଶ୍ୟକ ସମୟରେ ଚିକିତ୍ସା ନ କରାନ୍ତି ତେବେ ତାହା ମୃତ୍ୟୁକୁ ଡାକିଆଣିବା ଆଶଙ୍କା ରହିଛି। ଆମ ରାଜ୍ୟରେ ମଧ୍ୟ ଏହି ରୋଗ ପ୍ରାୟ ନିୟନ୍ତ୍ରଣରେ ଅଛି। ମ୍ୟାଲେରିଆ ଦ୍ୱାରା ଲୋକମାନେ କିପରି ଅଧିକ ଆକ୍ରାନ୍ତ ନ ହେବେ ସେ ନେଇ ରାଜ୍ୟ ସରକାରଙ୍କ ପକ୍ଷରୁ ଅନେକ ପଦକ୍ଷେପ ନିଆଯାଇଛି। ମ୍ୟାଲେରିଆପ୍ରବଣ ଅଞ୍ଚଳରେ ଏହି ରୋଗ ବିଷୟରେ ଅଧିକ ଜନସଚେତନତା ସୃଷ୍ଟି କରାଯାଉଛି। ଏହାର ଲକ୍ଷଣ ସମ୍ପର୍କରେ ଅବଗତ ହୋଇ ଚିକିତ୍ସା କରାଇବା ବ୍ୟତୀତ ଆଉ କେତୋଟି କଥାକୁ ଗୁରୁତ୍ୱ ଦେବା ଆବଶ୍ୟକ। ସାଧାରଣତଃ ଅପରିଷ୍କାର ସ୍ଥାନରେ ଏହି ମଶା ତାହାର ବଂଶ ବିସ୍ତାର କରିଥାଆନ୍ତି। ତେଣୁ ରହୁଥିବା ବାସସ୍ଥାନ ଚାରିପଟ ଏବଂ ଭିତର ପରିଷ୍କାର ପରିଚ୍ଛନ୍ନ ରଖନ୍ତୁ। ସବୁବେଳେ ମଶାରି ଟାଙ୍ଗି ଶୁଅନ୍ତୁ। ଚଳିତ ବର୍ଷ ଉକ୍ତ ଦିବସ ଅବସରରେ ବିଶ୍ୱ ସ୍ବାସ୍ଥ୍ୟ ସଙ୍ଗଠନ ପକ୍ଷରୁ ଘୋଷିତ ସ୍ଲୋଗାନକୁ ସାକାର କରିବାକୁ ହେଲେ ସମସ୍ତଙ୍କର ସହଯୋଗ ଆବଶ୍ୟକ।
