ବେଙ୍ଗାଲୁରୁ, ୧୬ା୧୨: ବେଙ୍ଗାଲୁରୁବାସୀ ୨୦୨୩ରେ ଅନ୍ଲାଇନ ଫୁଡ୍ ଡେଲିଭରି ପ୍ଲାଟ୍ଫର୍ମ ‘ସ୍ବିଗି’ରେ ୮୫ ଲକ୍ଷ କେକ୍ ବରାଦ କରିଛନ୍ତି। ସେଥିମଧ୍ୟରୁ ଚକୋଲେଟ୍ ଫ୍ଲେଭର ଅଧିକ ପସନ୍ଦ କରାଯାଇଛି। ଏହି ସହରବାସୀଙ୍କ କେକ୍ ପ୍ରେମକୁ ଦୃଷ୍ଟିରେ ରଖି ସ୍ବିଗି ତା’ର ଓ୍ବେବ୍ସାଇଟ୍ରେ ଏକ ବ୍ଲଗ୍ ପୋଷ୍ଟ କରି ବେଙ୍ଗାଲୁରୁକୁ ‘କେକ୍ କ୍ୟାପିଟାଲ’ ଆଖ୍ୟା ଦେଇଛି। କେବଳ ଜନ୍ମଦିନ କି ବିବାହ ବାର୍ଷିକୀ ନୁହେଁ, ସବୁ ପ୍ରକାର ଆନନ୍ଦ ଉତ୍ସବକୁ ଏବେ କେକ୍ କାଟି ପାଳିବାର ଟ୍ରେଣ୍ଡ ସାରା ଦେଶରେ ଦେଖିବାକୁ ମିଳୁଛି। ଏହାକୁ ଦୃଷ୍ଟିରେ ରଖି ବେକିଂ କମ୍ପାନୀଗୁଡ଼ିକ ଅନେକ ପ୍ରକାର ବିଷୟବସ୍ତୁ, ରଙ୍ଗ, ଆକୃତି, ସ୍ବାଦ ଓ ମହକରେ ପ୍ରସ୍ତୁତ କରୁଛନ୍ତି ଭଳିକି ଭଳି କେକ୍। ଏହାକୁ ସ୍ବିଗି ଭଳି ଅନ୍ଲାଇନ ଡେଲିଭରି ସଂସ୍ଥାଗୁଡ଼ିକ ଲୋକଙ୍କ ଘରେ ସୁଲଭ ମୂଲ୍ୟରେ ପହଞ୍ଚାଇପାରୁଥିବାରୁ ଏହି ବ୍ୟବସାୟ ସଫଳତାର ଶିଖର ଛୁଇଁପାରୁଛି। ବେଙ୍ଗାଲୁରୁରେ ଅନେକ କେକ୍ ପ୍ରସ୍ତୁତକାରୀ ସଂସ୍ଥା ଥିବାବେଳେ ନୂଆ ନୂଆ ସଂସ୍ଥା ଏହି ବ୍ୟବସାୟରେ ଯୋଡ଼ି ହେଉଛନ୍ତି। ପ୍ରତିବର୍ଷ ଲୋକଙ୍କ କେକ୍ ଚାହିଦା ବଢ଼ୁଥିବା ଲକ୍ଷ୍ୟ କରାଯାଉଛି ବୋଲି କହିଛନ୍ତି ବେଙ୍ଗାଲୁରୁର କେକ୍ ଶୋ ଅର୍ଗାନାଇଜର ଗୌତମ। ସ୍ବିଗିର ତଥ୍ୟ ଅନୁଯାୟୀ ୨୦୨୩ ଭାଲେଣ୍ଟାଇନ୍ସ ଡେ’ରେ ଦେଶରେ ପ୍ରତି ମିନିଟ୍ରେ ୨୭୧ଟି କେକ୍ ବରାଦ କରାଯାଇଥିଲା। ଚଳିତବର୍ଷ ଜାନୁୟାରୀରୁ ନଭେମ୍ବର ମଧ୍ୟରେ ହୋଇଥିବା ବରାଦକୁ ନେଇ ସ୍ବିଗି ତା’ର ରିପୋର୍ଟ ପ୍ରକାଶ କରିଛି। ତେବେ ନାଗପୁରର ଜଣେ ଗ୍ରାହକ ସ୍ବିଗିରେ ଗୋଟିଏ ଦିନରେ ୯୨ଟି କେକ୍ ଅର୍ଡର କରିଛନ୍ତି।
ଅନ୍ୟପକ୍ଷରେ ୨୦୨୩ରେ ଅନ୍ୟାନ୍ୟ ଖାଦ୍ୟ ବ୍ୟଞ୍ଜନ ମଧ୍ୟରୁ ବିରିୟାନୀ ହେଉଛି ସର୍ବାଧିକ ବରାଦ ହୋଇଥିବା ଡିଶ୍। ସ୍ବିଗିର ରିପୋର୍ଟ ଅନୁଯାୟୀ ବିରିୟାନୀ କ୍ରମାଗତ ୮ ବର୍ଷ ହେଲା ଅନ୍ଲାଇନ ଅର୍ଡର ହେବା ଖାଦ୍ୟ ମଧ୍ୟରେ ଶୀର୍ଷରେ ରହିଛି। ଏହି ବର୍ଷ ପ୍ରତି ୧ ସେକେଣ୍ଡରେ ୨.୫ ପ୍ଲେଟ୍ ବିରିୟାନୀ ଅର୍ଡର ହୋଇଥିବା ସ୍ବିଗି ତା’ର ବ୍ଲଗ୍ରେ ଦର୍ଶାଇଛି। ତେବେ ପ୍ରତି ୫.୫ ପ୍ଲେଟ୍ ଚିକେନ ବିରିୟାନୀ ତୁଳନାରେ ୧ ପ୍ଲେଟ୍ ଭେଜ୍ ବିରିୟାନୀ ବରାଦ ହୋଇଥିବା ଜଣାପଡ଼ିଛି। ସେହିପରି ପ୍ରତି ୬ ପ୍ଲେଟ୍ ମଧ୍ୟରୁ ଗୋଟିଏ ପ୍ଲେଟ୍ ବିରିୟାନୀ ହାଇଦ୍ରାବାଦରୁ ଅର୍ଡର ହୋଇଛି। ଅକ୍ଟୋବର ୧୪ରେ ଅନୁଷ୍ଠିତ ଭାରତ-ପାକିସ୍ତାନ ବିଶ୍ୱକପ୍ କିକ୍ରେଟ୍ ମ୍ୟାଚ୍ ବେଳେ ଭାରତୀୟମାନେ ପ୍ରତି ମିନିଟ୍ରେ ୫୦ ପ୍ଲେଟ୍ ବିରିୟାନୀ ଅର୍ଡର କରିଥିଲେ। ବିଶେଷକରି ଚଣ୍ଡୀଗଡ଼ର ଗୋଟିଏ ପରିବାର ଉକ୍ତଦିନ ଏକାଥରରେ ୭୦ ପ୍ଲେଟ୍ ବିରିୟାନୀ ସ୍ବିଗି ମାଧ୍ୟମରେ ମଗାଇଥିଲେ।
