ବିଶ୍ୱ ଫୁଟବଲର ସର୍ବୋଚ୍ଚ ପରିଚାଳନା ସଂସ୍ଥା ‘ଫିଫା’ ସର୍ବଭାରତୀୟ ଫୁଟବଲ ଫେଡେରେଶନ (ଏଆଇଏଫ୍ଏଫ୍)କୁ ବାସନ୍ଦ କରିଛି। ସମ୍ପ୍ରତି ଏଆଇଏଫ୍ଏଫ୍ ସୁପ୍ରିମକୋର୍ଟଙ୍କ ଦ୍ୱାରା ଗଠିତ କମିଟି ଅଫ୍ ଆଡ୍ମିନିଷ୍ଟ୍ରେଟର୍ସ (ସିଓଏ) ଦ୍ୱାରା ପରିଚାଳିତ ହେଉଥିବାବେଳେ କୌଣସି ତୃତୀୟ ପକ୍ଷର ହସ୍ତକ୍ଷେପକୁ ବରଦାସ୍ତ କରାଯିବନାହିଁ ବୋଲି ଫିଫା ସ୍ପଷ୍ଟ କରିଦେଇଛି। ଫିଫାର ଏପରି ବାସନ୍ଦରେ କିନ୍ତୁ ବିଚଳିତ ନୁହନ୍ତି ପୂର୍ବତନ ଭାରତୀୟ ଅଧିନାୟକ ବାଇଚୁଙ୍ଗ ଭୂତିଆ। ଫିଫାର ଏହି ନିଷ୍ପତ୍ତି କଠୋର ହୋଇଥିଲେ ହେଁ ଦେଶର କ୍ରୀଡ଼ା ବ୍ୟବସ୍ଥାରେ ଅନୁଶାସନ ଫେରାଇ ଆଣିବା ପାଇଁ ଏହା ପ୍ରକୃଷ୍ଟ ସମୟ ବୋଲି ସେ କହିଛନ୍ତି। ଏବେ ଘର ସଜାଡ଼ିବାର ବେଳ, ଦେଶର ଫୁଟ୍ବଲ ବ୍ୟବସ୍ଥାରେ ରହିଥିବା ତ୍ରୁଟିଗୁଡ଼ିକୁ ସୁଧାରିବା ପାଇଁ ଏହା ଉଚିତ ସମୟ ବୋଲି ପ୍ରକାଶ କରିଛନ୍ତି ଏହି ସ୍ପୋଟର୍ସ ଆଇକନ୍। ଫିଫା ନିୟମ ଉଲ୍ଲଂଘନ କାରଣରୁ ୮୫ ବର୍ଷର ଇତିହାସରେ ପ୍ରଥମଥର ପାଇଁ ଭାରତକୁ ଏଭଳି ବାସନ୍ଦାଦେଶର ସମ୍ମୁଖୀନ ହେବାକୁ ପଡ଼ିଛି। ଫିଫାର ଏହି ନିଷ୍ପତ୍ତି ଭାରତ ପାଇଁ ଶକ୍ତ ଧକ୍କା ବୋଲି ପୂର୍ବତନ ଅଧିନାୟକ ଶବିର୍ ଅଲୀ ପ୍ରକାଶ କରିଛନ୍ତି। ଏହାସହିତ ଏହି ବାସନ୍ଦାଦେଶ ଖୁବ୍ଶୀଘ୍ର ହଟିଯିବ ବୋଲି ସେ ଆଶା ପ୍ରକାଶ କରିଛନ୍ତି। ଫିଫା ପକ୍ଷରୁ ସମସ୍ତ ରାସ୍ତା ବନ୍ଦ କରାଯାଇ ନ ଥିବା ବେଳେ ଆଲୋଚନା ଦ୍ୱାରା ଏହି ସମସ୍ୟାର ସମାଧାନ ହେବ ବୋଲି ସେ କହିଛନ୍ତି। ଅନ୍ୟତମ ପୂର୍ବତନ ଖେଳାଳି ମେହତାବ ହୋସେନ୍ ଫୁଟ୍ବଲ ପରିଚାଳନାକୁ ବର୍ତ୍ତମାନର ସମସ୍ୟା ପାଇଁ ଦାୟୀ କରିଛନ୍ତି। ପୂର୍ବରୁ ପରିଚାଳନା କରୁଥିବା ଅଧିକାରୀ ଏବଂ ସିଓଏ ସମପରିମାଣରେ ଏହି ଘଟଣା ପାଇଁ ଦାୟୀ। ଯେତେବେଳେ ଫିଫା ପକ୍ଷରୁ ନିର୍ବାଚନ ପାଇଁ ଡେଡ୍ଲାଇନ ଧାର୍ଯ୍ୟ କରାଯାଇଥିଲା ସେତେବେଳେ ଏତେଦିନ ଧରି ନୀରବ ରହି ଏମାନେ କ’ଣ କରୁଥିଲେ ବୋଲି ମେହତାବ ପ୍ରଶ୍ନ କରିଛନ୍ତି।
ପ୍ରକାଶ ଯୋଗ୍ୟ ଯେ, ସିଓଏ ଦାୟିତ୍ୱ ଛାଡ଼ିବା ସହ ଏଆଇଏଫ୍ଏଫ୍ର କର୍ମକର୍ତ୍ତାମାନେ ଗଣତାନ୍ତ୍ରିକ ପ୍ରକ୍ରିୟାରେ ନିର୍ବାଚିତ ହେବେ ଏବଂ ଏହାର ସମ୍ବିଧାନ ଫିଫା ଓ ଏସିଆନ ଫୁଟବଲ କନ୍ଫେଡେରେଶନ (ଏଏଫ୍ସି) ଦ୍ୱାରା ସ୍ବୀକୃତ ହେବାପରେ ଯାଇ ବାସନ୍ଦ ଉଠି ପାରିବ। ବାସନ୍ଦ ନ ଉଠିଲେ ଭାରତ କୌଣସି ଅନ୍ତର୍ଜାତୀୟ ଟୁର୍ନାମେଣ୍ଟରେ ଅଂଶଗ୍ରହଣ କରିପାରିବ ନାହିଁ କିମ୍ବା ଦେଶରେ କୌଣସି ଅନ୍ତର୍ଜାତୀୟ ଟୁର୍ନାମେଣ୍ଟ ଆୟୋଜନ କରିପାରିବ ନାହିଁ। ଫଳରେ ଭୁବନେଶ୍ୱର ସମେତ ଦେଶର ୩ଟି ଭେନ୍ୟୁରେ ହେବାକୁଥିବା ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ ଆୟୋଜନ ହୋଇପାରିବ ନାହିଁ। ଏହା ବ୍ୟତୀତ ଏସିଆ ଓ ସାଫ୍ ଚାମ୍ପିୟନଶିପ୍ରେ ଭାଗ ନେଇ ପାରିବ ନାହିଁ। କାରଣ ଭାରତର କୌଣସି ଖେଳାଳି ବିଦେଶରେ କିମ୍ବା ବିଦେଶର କୌଣସି ଖେଳାଳି ଭାରତରେ ଖେଳିପାରିବେ ନାହିଁ। ଫିଫା ନିୟମ ଉଲ୍ଲଂଘନ କାରଣରୁ ପୂର୍ବରୁ ପାକିସ୍ତାନ, ଜିମ୍ବାଓ୍ବେ, କେନିୟା, ବେନିନ୍, କୁଏତ୍, ଇଣ୍ଡୋନେସିଆ, ଗ୍ବାଟେମାଲା, ନାଇଜେରିଆ, ବ୍ରୁନେଇ ଓ ଇରାକ ଆଦି ଦେଶ ସମଦଶା ଭୋଗିଛି। ସଦସ୍ୟ ରାଷ୍ଟ୍ରଗୁଡ଼ିକ କୌଣସି ରାଜନୈତିକ କିମ୍ବା ଆଇନଗତ ହସ୍ତକ୍ଷେପରୁ ଦୂରେଇ ନ ରହିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଫିଫା ସ୍ପଷ୍ଟ କରିଛି।
ପରିବର୍ତ୍ତିତ ଘଟଣାକ୍ରମରେ ଗତ ବୁଧବାର ଥିବା ମାମଲାର ଶୁଣାଣିକୁ ସୁପ୍ରିମକୋର୍ଟ ୨୨ ତାରିଖ ପର୍ଯ୍ୟନ୍ତ ଘୁଞ୍ଚାଇ ଦେଇଛନ୍ତି।
”ଫିଫାର ନିଷ୍ପତ୍ତି କଠୋର ହୋଇଥିଲେ ହେଁ ଭାରତର କ୍ରୀଡ଼ା ବ୍ୟବସ୍ଥାରେ ଅନୁଶାସନ ଫେରାଇ ଆଣିବା ପାଇଁ ଏହା ପ୍ରକୃଷ୍ଟ ସମୟ। ଏବେ ଘର ସଜାଡ଼ିବାର ବେଳ, ଦେଶର ଫୁଟ୍ବଲ ବ୍ୟବସ୍ଥାରେ ରହିଥିବା ତ୍ରୁଟି ସୁଧାରିବା ପାଇଁ ଏହା
ଉଚିତ ସମୟ“
-ବାଇଚୁଙ୍ଗ ଭୂତିଆ, ପୂର୍ବତନ ଭାରତୀୟ ଫୁଟବଲ ଅଧିନାୟକ
