ବ୍ୟବସାୟ ପ୍ରତିଷ୍ଠାନରେ ନାହିଁ ଅଗ୍ନି ନିରାପତ୍ତା ବ୍ୟବସ୍ଥା
ରାୟଗଡ଼ା,୨୫ା୩(ସ୍ବ.ପ୍ର.): ରାୟଗଡ଼ା ସହରରେ ଥିବା ବିଭିନ୍ନ ବ୍ୟବସାୟ ପ୍ରତିଷ୍ଠାନରେ ଅଗ୍ନି ନିରାପତ୍ତା ବ୍ୟବସ୍ଥା କରାଯାଇନାହିଁ। ବ୍ୟବସାୟୀମାନେ ଅଗ୍ନିଶମ ବିଭାଗ ପକ୍ଷରୁ ସୁରକ୍ଷା ସାର୍ଟିଫିକେଟ ନ ନେଇ ମନଇଚ୍ଛା ଦୋକାନ, ସପିଙ୍ଗ ମଲ୍ ଆଦି କରିଛନ୍ତି। ଲୋକଙ୍କ ଜୀବନ ପ୍ରତି କାହାରି ଚିନ୍ତାନାହିଁ । ଯାହାକି ତଦନ୍ତ ସାପେକ୍ଷ। ଅଗ୍ନି ନିରାପତ୍ତା ସାର୍ଟିଫିକେଟ ବିନା ସହର ଓ ଉପକଣ୍ଠ ଅଞ୍ଚଳରେ ବ୍ୟବସାୟ ପ୍ରତିଷ୍ଠାନ ଚାଲିଥିବା ଅଗ୍ନିଶମ ଅଧିକାରୀ ସଂଗ୍ରାମ ହାଁସଦା ମଧ୍ୟ ସ୍ବୀକାର କରିଛନ୍ତି । ଏ ନେଇ ବାରମ୍ବାର ସଚେତନ କରାଯାଉଥିଲେ ମଧ୍ୟ ବ୍ୟବସାୟୀ ଶୁଣୁନାହାଁନ୍ତି । ରାୟଗଡ଼ାରେ ଏକ ପ୍ରକାର ଅସହାୟ ହୋଇପଡ଼ିଛି ଅଗ୍ନିଶମ ବିଭାଗ । ସହରର ସ୍ବାଗତ ରୋଡ଼, ତୃପ୍ତି ରୋଡ଼, ଆଇଓବି ରୋଡ଼, ଉମାଶଙ୍କର ରୋଡ଼, କପିଳାସ ରୋଡ଼ ସମେତ ବିଭିନ୍ନ ସ୍ଥାନରେ ଥିବା ସପିଙ୍ଗ ମଲ ଓ ବ୍ୟବସାୟିକ ପ୍ରତିଷ୍ଠାନଗୁଡ଼ିକ ମଧ୍ୟରୁ କୌଣସି ଗୋଟିଏରେ ଅଗ୍ନି ନିରାପତ୍ତା ବ୍ୟବସ୍ଥା ଠିକ ନାହିଁ। ଏପରିକି ତ୍ୱରିତ ପଦକ୍ଷେପ ଗ୍ରହଣ ପାଇଁ ୧୦୦ଲିଟର ଜଳ ସଂରକ୍ଷଣ ବ୍ୟବସ୍ଥା ମଧ୍ୟ କରାଯାଇନାହିଁ । ବହୁ ସପିଂ ମଲ ଓ ଦୋକାନ ବିଦ୍ୟୁତ୍ ନେବାପାଇଁ ବେଆଇନ ଭାବେ ରାସ୍ତାକଡ଼ରେ ସବ୍ ଟ୍ରାନ୍ସଫର୍ମର ରଖିଛନ୍ତି। ଦୋକାନ ଓ ସପିଙ୍ଗ ମଲଗୁଡ଼ିକ ଅନୁମୋଦିତ ପ୍ଲାନ ବଦଳରେ ମନଇଚ୍ଛା ନିର୍ମାଣ କରିଛନ୍ତି । ପୌର ପରିଷଦ ପକ୍ଷରୁ ଏହାର କୌଣସି ଯାଞ୍ଚ ହେଉନାହିଁ। ତେଣୁ ଅଘଟଣ ଘଟିବା ପୂର୍ବରୁ ସମସ୍ତ ଦୋକାନ, ସପିଙ୍ଗମଲ ଆଦିରେ ଅଗ୍ନି ନିର୍ାପତ୍ତା ବ୍ୟବସ୍ଥା ଗ୍ରହଣ କରିବାକୁ ବାଧ୍ୟତାମୂଳକ କରାଇବାକୁ ଦାବି ହେଉଛି।
ସ୍କ୍ରାପ୍ ଗୋଦାମରେ ଅଗ୍ନିକାଣ୍ଡ
ରାୟଗଡ଼ା: ରାୟଗଡ଼ା ସହର ଆର୍ଏମ୍ସି ଗୋଦାମ ନିକଟରେ ଥିବା ଏକ ସ୍କ୍ରାପ ଗୋଦାମରେ ଗୁରୁବାର ରାତିରେ ଭୟାବହ ଅଗ୍ନିକାଣ୍ଡ ଘଟିଛି । ଏଥିରେ ଲକ୍ଷାଧିକ ଟଙ୍କାର ସ୍କ୍ରାପ ପୋଡ଼ି ପାଉଁଶ ହୋଇଯାଇଛି । ସ୍କ୍ରାପ ଗୋଦାମ ମାଲିକ ନନ୍ଦ କିଶୋର ସାହୁ ଗୁରୁବାର ରାତିରେ ଗୋଦାମ ବନ୍ଦ କରି ଘରକୁ ଯାଇଥିଲେ। ରାତି ପ୍ରାୟ ୧ଟାରେ ଗୋଦାମରେ ନିଆଁ ଲାଗିଥିବା କେହିଜଣେ ଫୋନରେ କହିଥିଲେ। ଖବରପାଇ ଦମକଳ ବାହୀନି ତୁରନ୍ତ ସେଠାରେ ପହଞ୍ଚିଥିଲେ। ଦୁଇଟି ଦମକଳ ଗାଡି ଦୀର୍ଘ ସମୟ ପାଣି ସିଞ୍ଚନ କରିବା ପରେ ନିଆଁ ଆୟତ୍ତ ହୋଇଥିଲା । ଏଥିରେ ଲକ୍ଷାଧିକ ଟଙ୍କାର ପ୍ଲାଷ୍ଟିକ ପୋଡି ତରଳିଯାଇଛି। ନିଆଁ କିଭଳି ଲାଗିଲା ତାହା ସ୍ପଷ୍ଟ ହୋଇନାହିଁ। କେହି ଦୁବୃତ୍ତ ଏହି କାଣ୍ଡ ଭିଆଇଥିବା ଅନୁମାନ କରାଯାଉଛି। ଅନ୍ୟପକ୍ଷରେ ଗୋଦାମରେ ଲକ୍ଷାଧିକ ଟଙ୍କାର କାରବାର ହେଉଥିବା ବେଳେ ଅଗ୍ନି ନିରାପତ୍ତା ବ୍ୟବସ୍ଥା ନଥିବା ଅଗ୍ନିଶମ ବିଭାଗ ଅଧିକାରୀ ଜାଣିବାକୁ ପାଇଥିଲେ। ଏପରକି ଗୋଦାମରେ ପାଣି ମଧ୍ୟ ମହଜୁଦ ନାହିଁ। ଅତ୍ୟନ୍ତ ବିପଜ୍ଜନକ ଅବସ୍ଥାରେ ଏହି ଗୋଦାମ ରହିଥିବା ବେଳେ ନିକଟରେ ଜନବସତି ରହିଛି। ତେଣୁ ଆଗାମୀ ଦିନରେ ବଡ ଅଘଟଣ ସମ୍ଭାବନାକୁ ଏଡାଇ ହୋଇପାରୁନାହିଁ। ଆରଏମସିଏସ ଠାରୁ ଭଡାରେ ନେଇ ଏହି ଗୋଦାମ ଚାଲିଛି। ଏଠାରେ ପୁରୁଣା ପ୍ଲାଷ୍ଟିକ ବୋତଲ, ସାମଗ୍ରୀ ଆଦି ସ୍କ୍ରାପରେ କିଣାଯାଉଛି ।
