ବେଙ୍ଗାଲୁରୁ,୨୩।୮: ଅନଲାଇନ ଗେମିଂ ଉପରେ ଆଇନ ହେବା ମାତ୍ରେ ପ୍ରବର୍ତ୍ତନ ନିର୍ଦ୍ଦେଶାଳୟ ଏକ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଅନଲାଇନ ବେଟିଂ ଏବଂ ଗେମିଂ ରାକେଟ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରି ଇଡି କର୍ନାଟକର ଚିତ୍ରଦୁର୍ଗ ବିଧାୟକ କେସି ବୀରେନ୍ଦ୍ରଙ୍କୁ ଗ୍ୟାଙ୍ଗଟକରୁ ଗିରଫ କରିଛି। ସୂତ୍ର ଅନୁଯାୟୀ, କେନ୍ଦ୍ରୀୟ ସଂସ୍ଥା ବେଙ୍ଗାଲୁରୁ, ଚିତ୍ରଦୁର୍ଗ, ମୁମ୍ବାଇ, ଗୋଆ ଏବଂ ଗ୍ୟାଙ୍ଗଟକ ସମେତ ୩୧ଟି ସ୍ଥାନରେ ଚଢାଉ କରିଛି। ଗୋଆର ପାଞ୍ଚଟି ବଡ଼ କାସିନୋରେ ମଧ୍ୟ ଚଢାଉ କରାଯାଇଛି।
ଚଢାଉରେ ୧୨ କୋଟି ଟଙ୍କା ନଗଦ (୧ କୋଟି ବିଦେଶୀ ମୁଦ୍ରା ସମେତ), ୬ କୋଟି ସୁନା, ୧୦ କିଲୋ ରୂପା ଏବଂ ୪ଟି ଲଗଜରୀ କାର ମିଳିଛି। ଏହା ସହିତ ୧୭ଟି ବ୍ୟାଙ୍କ ଆକାଉଣ୍ଟ ଏବଂ ୨ଟି ଲକର ଫ୍ରିଜ କରାଯାଇଛି। ତଦନ୍ତରୁ ଜଣାପଡିଛି ଯେ, ବିଧାୟକ ଏବଂ ତାଙ୍କ ଭାଇ ଅନଲାଇନ ବେଟିଂ ସାଇଟ King567 ଏବଂ Raja567 ଚଳାଉଥିଲେ। ଦୁବାଇରୁ କମ୍ପାନୀଗୁଡ଼ିକ ମାଧ୍ୟମରେ ଟଙ୍କା ଦେଣନେଣ ହେଉଥିଲା ଏବଂ ଅବୈଧ ରୋଜଗାରକୁ ଧଳା ଦେଖାଇବାକୁ ଚେଷ୍ଟା କରାଯାଉଥିଲା। ବିଧାୟକ ଏକ କାସିନୋ ଲିଜ କରିବାକୁ ଗ୍ୟାଙ୍ଗଟକ ଆସିଥିଲେ। ସେତେବେଳେ ଇଡି ତାଙ୍କୁ ଧରିଥିଲା। ବର୍ତ୍ତମାନ ତାଙ୍କୁ ଟ୍ରାଞ୍ଜିଟ ରିମାଣ୍ଡରେ ବେଙ୍ଗାଲୁରୁ କୋର୍ଟକୁ ନିଆଯାଇଛି।
ସରକାରୀ ସୂତ୍ର ଏହି ସୂଚନା ଦେଇଛନ୍ତି। ବୀରେନ୍ଦ୍ର ପପ୍ପି ଚିତ୍ରଦୁର୍ଗ ବିଧାନସଭା ଆସନର ବିଧାୟକ। ଏହି କାର୍ଯ୍ୟାନୁଷ୍ଠାନ ପ୍ରିଭେନ୍ସନ ଅଫ ମନି ଲଣ୍ଡରିଂ ଆକ୍ଟ (PMLA) ର ବ୍ୟବସ୍ଥା ଅନୁଯାୟୀ କରାଯାଉଛି। ସୂତ୍ର ଅନୁସାରେ ଅନଲାଇନ ବେଟିଂ ଏବଂ ଗେମିଂ ସମ୍ପର୍କରେ ବିଧାୟକ ଏବଂ ଅନ୍ୟ କିଛି ଲୋକଙ୍କ ଘର ଖୋଜା ଚାଲିଛି।
