ଦିଗପହଣ୍ଡି,୨୯ା୯(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ସହରର ମା’ ବୁଢ଼ୀ ଠାକୁରାଣୀଙ୍କ ପୀଠରେ ଶାରଦୀୟ ମହୋତ୍ସବ ଆଶ୍ୱିନ ଶୁକ୍ଳପକ୍ଷ ମହାସପ୍ତମୀ ଯୁକ୍ତ ଅଷ୍ଟମୀ ତିଥି ସୋମବାର ଶୁଭାରମ୍ଭ ହୋଇଛି। ଏଥିପାଇଁ ସହର ଉତ୍ସବ ମୁଖର ହୋଇଛି। ବିଳମ୍ବିତ ସନ୍ଧ୍ୟାରେ ମୁଖ୍ୟ ପୁରୋହିତ ପଣ୍ଡିତ ସନାତନ ରଥ ଶର୍ମା ଓ ମା’ ବୁଢ଼ୀ ଠାକୁରାଣୀ ମନ୍ଦିରର ସେବାୟତ ଆଦିତ୍ୟ ପାତ୍ର, ଶମ୍ଭୁନାଥ ପାତ୍ର, ସୋମନାଥ ପାତ୍ର, ପ୍ରଫୁଲ୍ଲ ପାତ୍ର, ତାରିଣୀ ପାତ୍ର ପ୍ରଚଳିତ ରୀତି ନୀତି ଅନୁଯାୟୀ ସହରର ଅଧିଷ୍ଠାତ୍ରୀ ଦେବୀ ମା’ ବୁଢ଼ୀ ଠାକୁରାଣୀଙ୍କ ମହାସ୍ନାନ, ମାଜଣା, ସେବାପୂଜା କରିଥିଲେ। ଗନ୍ଧ, ପୁଷ୍ପ, ଧୂପ ଦୀପ ନୈବେଦ୍ୟ ଓ ମହା ଆଳତି, ବନ୍ଦାପନା ପରେ ମା’ଙ୍କୁ ଅସ୍ଥାୟୀ ଯାତ୍ରାପୀଠକୁ ଯିବାପାଇଁ ନିମନ୍ତ୍ରଣ କରାଯାଇଥିଲା। ମା’ଙ୍କ ମସ୍ତକରୁ ଫୁଲମଣ୍ଡା ଖସିବା ପରେ ଯାତ୍ରା ନିମନ୍ତେ ଆଜ୍ଞାମାଳ ଆସିଥିଲା। ଫୁଲମଣ୍ଡାକୁ ସୁସଜ୍ଜିତ ଚାଙ୍ଗୁଡ଼ି ତାଟକୁ ସେବାୟତଙ୍କ ମସ୍ତକରେ ସ୍ଥାନିତ କରାଯିବା ପରେ ଆତସବାଜି ରୋଷଣୀ, ନୃତ୍ୟ, ଗୀତରେ ମା’ ସାଆନ୍ତାଣୀ ବୁଢ଼ୀ ଠାକୁରାଣୀ ଝୁଲି ଝୁଲି ଗୁଣ୍ଡିଚା ମନ୍ଦିର ଛକ ବଜାର ସାହି ମଧ୍ୟ ଦେଇ ଅସ୍ଥାୟୀ ଯାତ୍ରା ପୀଠରେ ବିଜେ କରିଥିଲେ। ପୂଜା ମଣ୍ଡପରେ ମା’ଙ୍କ ମୁଖ୍ୟ ଘଟ ଓ ପାର୍ଶ୍ୱଘଟଗୁଡ଼ିକୁ ସଂସ୍ଥାପନ କରାଯାଇ ମହାଷ୍ଟମୀ ପୂଜା ଭୋଗ ଲାଗି ପରେ ପହଡ଼ ବିଜେ ନୀତି ହୋଇଥିଲା। ଯାତ୍ରା ପରିଚାଳନା କମିଟି ସଭାପତି ବିକାଶ ପଶୁପାଳକ, ଉପସଭାପତି ଆଲୁ. ସୁଶାନ୍ତ, ସମ୍ପାଦକ ବିଚିତ୍ରାନନ୍ଦ ପଟ୍ଟନାୟକ, ସହ ସମ୍ପାଦକ ତଥା କାଉନସିଲର ଦୀପକ ମିଶ୍ର, କୋଷାଧ୍ୟକ୍ଷ ଆଶିଷ ପଟ୍ଟନାୟକ, ସହ କୋଷାଧ୍ୟକ୍ଷ କେ. ରାଜେନ୍ଦ୍ର, ଉପଦେଷ୍ଟା ତଥା ଏନଏସି ଅଧ୍ୟକ୍ଷ ପ୍ରଫୁଲ୍ଲ ପଣ୍ଡା, କାଉନସିଲର ନୀଳମାଧବ ଗୌଡ ଓ ଅନ୍ୟମାନେ ଉପସ୍ଥିତ ଥିଲେ। ପ୍ରତ୍ୟେହ ସନ୍ଧ୍ୟାରେ ମା’ଙ୍କ ଘଟ ବିଭିନ୍ନ ସାହି ପରିକ୍ରମା କରିବା କାର୍ଯ୍ୟକ୍ରମ ରହିଛି। ଯାତ୍ରାରେ ଭିଡ଼ ଓ ଶ୍ରଦ୍ଧାଳୁଙ୍କ ସୁରକ୍ଷା ପାଇଁ ଯାତ୍ରା କମିଟି ପକ୍ଷରୁ ସ୍ବେଚ୍ଛାସେବୀ ଓ ଦିଗପହଣ୍ଡି ଥାନା ପକ୍ଷରୁ ପୋଲିସ ମୁତୟନ କରାଯାଇଛି। ପ୍ରତ୍ୟେହ ସନ୍ଧ୍ୟାରେ ଯାତ୍ରା ପୀଠରେ ସାଂସ୍କୃତିକ କାର୍ଯ୍ୟକ୍ରମ ନାଟକ, ଅପେରା, ଥିଏଟର ପରିବେଷଣ ହେବ। ଅକ୍ଟୋବର ୭ରେ ଯାତ୍ରା ମହୋତ୍ସବ ଉଦ୍ଯାପିତ ହେବ।
