ନୂଆଦିଲ୍ଲୀ,୧୬।୩: ଦିଲ୍ଲୀ ବିଧାନସଭାର ବଜେଟ ଅଧିବେଶନ ଶୁକ୍ରବାରରୁ ଆରମ୍ଭ ହେବାକୁ ଯାଉଛି। ବଜେଟ ଅଧିବେଶନର ପ୍ରଥମ ଦିନରେ ଦିଲ୍ଲୀର ଉପରାଜ୍ୟପାଳ ବିନୟ କୁମାର ସାକ୍ସେନା ନିଜର ଅଭିଭାଷଣ ରଖିବେ। ଏହାପରେ ମଙ୍ଗଳବାର ଅର୍ଥାତ୍ ମାର୍ଚ୍ଚ ୨୧ରେ ବଜେଟ ଉପସ୍ଥାପନ କରାଯିବ ବୋଲି ସୂଚନା ରହିଛି।ଏହା ଦିଲ୍ଲୀର ଅରବିନ୍ଦ କେଜ୍ରିିୱାଲ ସରକାରଙ୍କ ପ୍ରଥମ ବଜେଟ ହେବ ଯେଉଁଥିରେ ମନୀଷ ସିସୋଡିଆ ଉପସ୍ଥାପନ କରିବେ ନାହିଁ। ସୂଚନା ମୁତାବକ, ସିସୋଡିଆ ଗିରଫ ହେବା ପରେ ଏବଂ ତାଙ୍କ ଇସ୍ତଫା ପରେ କୈଳାଶ ଗେହଲୋଟଙ୍କୁ ଅର୍ଥମନ୍ତ୍ରୀ କରାଯାଇଛି। ଏଭଳି ପରିସ୍ଥିତିରେ କୈଳାଶ ଗେହଲୋଟ ଚଳିତ ବର୍ଷର ବଜେଟ ଉପସ୍ଥାପନ କରିବେ। ଏହି ବଜେଟ ଅଧିବେଶନ ସକାଳ ୧୧ଟାରୁ ଆରମ୍ଭ ହେବ। ବଜେଟ ଅଧିବେଶନ ଉପରାଜ୍ୟପାଳ ସାକ୍ସେନାଙ୍କ ଭାଷଣରୁ ଆରମ୍ଭ ହେବ। କିନ୍ତୁ କେଜ୍ରିିୱାଲ ସରକାର ଏବଂ ଉପରାଜ୍ୟପାଳଙ୍କ ମଧ୍ୟରେ ଗତ କିଛି ସମୟରୁ ବିବାଦ ଲାଗି ରହିଛି। ଏହାକୁ ଦୃଷ୍ଟିରେ ରଖି ଉପରାଜ୍ୟପାଳଙ୍କ ଭାଷଣ ଉପରେ ସମସ୍ତଙ୍କ ନଜର ରହିବ। ଅନ୍ୟପଟେ ଦୁର୍ନୀତି ମାମଲାରେ କେଜ୍ରିିୱାଲ ସରକାରରେ ମନ୍ତ୍ରୀ ଥିବା ମନୀଷ ସିସୋଡିଆ ଏବଂ ସତ୍ୟେନ୍ଦ୍ର ଜୈନ ଗିରଫ ହେବା ପରଠାରୁ ଭାଜପା ଆମ ଆଦମୀ ପାର୍ଟି (ଏଏପି)କୁ ଟାର୍ଗେଟ କରିଆସୁଛି। ଫଳରେ ଭାଜପା ମଧ୍ୟ ଏହି ବଜେଟ ଅଧିବେଶନରେ ରାଜ୍ୟ ସରକାରଙ୍କ ବିରୋଧରେ ଏକ ଅନାସ୍ଥା ପ୍ରସ୍ତାବ ଆଣିବାକୁ ଯୋଜନା କରିଛି। ଏଥିସହ ଭାଜପା ସମସ୍ତ ପ୍ରସଙ୍ଗରେ ଆଲୋଚନା ପାଇଁ ବଜେଟ ଅଧିବେଶନର ଦିନକୁ ବୃଦ୍ଧି କରିବାକୁ ଦାବି କରିଛି।
