ଧର୍ମଶାଳା ,୧୮।୭(ଶିବପ୍ରାସାଦ ମହାନ୍ତି): ଯାଜପୁର ଜିଲାର ବୌଦ୍ଧ କୀର୍ତ୍ତିରାଜି ଲାଙ୍ଗୁଡି ପର୍ଯ୍ୟଟନ ସ୍ଥଳୀ ଦିନକୁ ଦିନ ଅସୁରକ୍ଷିତ ହୋଇପଡ଼ିଛି। ପର୍ଯ୍ୟଟନ ବିଭାଗ ପକ୍ଷରୁ କୋଟି କୋଟି ଟଙ୍କା ଖର୍ଚ୍ଚ କରାଯାଇ ଏହାର ପୁନଃରୁଦ୍ଧାର କାର୍ଯ୍ୟ ଆରମ୍ଭ ହୋଇଥିଲେ ମଧ୍ୟ ଏହା ଅସମ୍ପୂର୍ଣ୍ଣ ହୋଇପଡିରହିଛି।
ବିଶ୍ୱ ଇତିହାସରେ ବୌଦ୍ଧ କୀର୍ତ୍ତିରାଜିକୁ ନେଇ ଯାଜପୁର ଜିଲା ଏକ ସନ୍ତ୍ରତ ପରିଚୟ ସୃଷ୍ଟି କରୁଥିବା ବେଳେ ସେଥିମଧ୍ୟରୁ ଧର୍ମଶାଳାର ଲାଙ୍ଗୁଡି ପର୍ଯ୍ୟଟନସ୍ଥଳୀ ଅନ୍ୟତମ। ପର୍ଯ୍ୟଟନ ବିଭାଗ ପକ୍ଷରୁ କୋଟି କୋଟି ଟଙ୍କା ବ୍ୟୟରେ ଏହାର ପୁନଃରୁଦ୍ଧାର କାର୍ଯ୍ୟ ଆରମ୍ଭ ହୋଇଥିଲା ।
ମିଳିଥିବା ସୂଚନା ଅନୁସାରେ, ଏହାର କାର୍ଯ୍ୟ ଶେଷ ହେବାର ସମୟ ସୀମା ସରିଯାଇଥିଲେ ବି ରଙ୍ଗଠାରୁ ନେଇ ଅନେକ କାମ ଅଧାରେ ଅଟକି ରହିଛି, ଯାହା ଫଳରେ ଲାଙ୍ଗୁଡି ବୌଦ୍ଧ ବିହାର ସମ୍ମୁଖ ଗେଟରେ ତାଲା ଝୁଲୁଛି। ଡିସେମ୍ବର ମାସ ଆସିଲେ ପର୍ଯ୍ୟଟକମାନଙ୍କ ଭିଡ ଦେଖିବାକୁ ମିଳୁଥିଲା। କିନ୍ତୁ କୁଆଡେ ହଜିଯାଇଛି ସେ ଡିସେମ୍ବର ମାସର ସ୍ମୃତି। କେହି ବି ଆସୁନାହାନ୍ତି ପର୍ଯ୍ୟଟକ। ସ୍ଥାନଟି ଏବେ ସମ୍ପୂର୍ଣ୍ଣ ଶୁନ୍ଶାନ ହୋଇଯାଇଛି।
ସେହିପରି ପାହାଡ ଉପର ଭାଗରେ ମଧ୍ୟ ଖନନବେଳେ ମିଳିଥିବା ବୌଦ୍ଧ କୀର୍ତ୍ତିରାଜଗୁଡ଼ିକ ଖୋଲା ଆକାଶ ତଳେ ଅସୁରକ୍ଷିତ ଭାବେ ପଡିରହିଛି। ଖାଲି ଏତିକି ନୁହେଁ, ପାହାଡ଼ ଚତୁଃପାର୍ଶ୍ୱରେ ଲଗା ଯାଇଥିବା ଲୁହାର ଗେଟଗୁଡ଼ିକ ମଧ୍ୟ ଦୃର୍ବୁତ୍ତ ଚୋରି କରି ନେଉଥିବା ବାରମ୍ବାର ଅଭିଯୋଗ ହୋଇ ଥିଲେ ବି ସୁରକ୍ଷାର ଅଭାବ ଦେଖାଦେଇଛି । ଏହାକୁ ସୁରକ୍ଷା ଦେବାକୁ ସ୍ଥାନୀୟ ଲୋକଙ୍କ ସହଯୋଗରେ ଏକ ସୁରକ୍ଷା ମଞ୍ଚ ଗଠନ କରାଯାଇଛି। ସେଥିପାଇଁ ଏହା ନିକଟରେ କିଛି ସ୍ଥାନକୁ ଅକ୍ତିଆର କରି ଘର ନିର୍ମାଣ କରା ଯାଇଛି। ଏହି ଘର ନିର୍ମାଣକୁ ନେଇ ସ୍ଥାନୀୟ ଲୋକେ ଅସନ୍ତୋଷ ପ୍ରକାଶ କରିଛନ୍ତି। ସେଠାରେ କିଛି ଅସାମାଜିକ ଲୋକ ଆଡ୍ଡା ଜମାଉଥିବାବେଳେ ପୋଲିସ ଜାଣି ନ ଜାଣିବାର ବାହାନା କରୁଥିବା ସ୍ଥାନୀୟ ଲୋକେ ମଧ୍ୟ ଅଭିଯୋଗ କରିଛନ୍ତି। ତେଣୁ ସ୍ଥାନୀୟ ବିଧାୟକ ଓ ପର୍ଯ୍ୟଟନ ବିଭାଗ ଏହା ଉପରେ ତୁତନ୍ତ ଦୃଷ୍ଟି ଦେବାକୁ ବୁଦ୍ଧିଜୀବୀମାନେ ଦାବି କରିଛନ୍ତି।
