ଖୋର୍ଦ୍ଧା ଅଫିସ,୨।୧: ସରକାରୀ କାର୍ଯ୍ୟାଳୟରେ ପିସି କାରବାର ରୋକିବାକୁ ସରକାର ଗୁରୁତ୍ୱାରୋପ କରୁଛନ୍ତି। ତେବେ ସରକାରୀ କାର୍ଯ୍ୟାଳୟରେ ହାତ ଗୁଞ୍ଜା ନ ଦେଲେ ଫାଇଲ ଗୋଟିଏ ଟେବୁଲରୁ ଅନ୍ୟ ଏକ ଟେବୁଲକୁ ଘୁଞ୍ଚୁନି। ବିଶେଷତଃ ତହସିଲ ଏବଂ ସବ ରେଜିଷ୍ଟ୍ରାର ଅଫିସରେ ଦଲାଲଙ୍କ ରାଜ ଚାଲିଛି। ଖୋର୍ଦ୍ଧା ଜିଲା ଜଟଣୀ ତହସିଲରେ ଦେଖିବାକୁ ମିଳିଛି। କୌଣସି କାମରେ ତହସିଲକୁ ଆସୁଥିବା ଲୋକେ ନାହିଁ ନ ଥିବା ହଇରାଣ ହେଉଥିବା କେତେଜଣ ସ୍ଥାନୀୟ ଲୋକେ କହିଛନ୍ତି। ଜମିପଟ୍ଟା ପାଇବା ଲାଗି ଲୋକେ ବାରମ୍ବାର କାର୍ଯ୍ୟାଳୟକୁ ଦୌଡୁଛନ୍ତି। ତହସିଲ ଭିତରେ ଦଲାଲଙ୍କ ରାଜୁତି ଚାଲିଛି। ଦଲାଲଙ୍କ ଜରିଆରେ ଆସୁଥିବା ଲୋକଙ୍କ କାର୍ଯ୍ୟ ହେଉଥିବା ବେଳେ କୌଣସି ପ୍ରମାଣପତ୍ର ପାଇବା ଲାଗି ଆବେଦନ କରୁଥିବା ଲୋକଙ୍କୁ ବିଭିନ୍ନ ଆଳ ଦେଖାଇ କର୍ମଚାରୀ ଫେରାଇ ଦେଉଛନ୍ତି। ତଳୁ ଉପର ପର୍ଯ୍ୟନ୍ତ ଚାଲିଛି ଲାଞ୍ଚ କାରବାର। ଜମିପଟ୍ଟା ପାଇବା ଲାଗି ଜଣଙ୍କଠାରୁ ୨ରୁ ୫ହଜାର ଟଙ୍କା ଆଦାୟ କରାଯାଉଛି। ଟଙ୍କା ନ ଦେଲେ ଏଠାରେ କୌଣସି ସେବା ମିଳୁନି ବୋଲି ସ୍ଥାନୀୟ ବାସିନ୍ଦା କହିଛନ୍ତି। ଏନେଇ ତହସିଲଦାର ତପନ ମହାପାତ୍ରଙ୍କ ପ୍ରତିକ୍ରିୟା ମିଳିପାରିନାହିଁ। ଅନ୍ୟପଟେ ଭୁବନେଶ୍ୱର ଉପଜିଲାପାଳ ଦେବବ୍ରତ ସାହୁ କହିଛନ୍ତି, ଗଣମାଧ୍ୟମରୁ ଏଭଳି ଖବର ପାଇଛି। ଘଟଣାର ତଦନ୍ତ କରାଯିବ। ପ୍ରମାଣିତ ହେଲେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ।
