ଅମରପାଲି,୧୨।୬(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ଅଞ୍ଚଳରେ ଏବେ ଶାଳ (ସରଗୀ) ଫୁଲ ସଂଗ୍ରହ କାର୍ଯ୍ୟ ଜୋରଦାର ଭାବେ ଚାଲିଛି। ଆଦିବାସୀ ଓ ଜଙ୍ଗଲ ଉପରେ ନିର୍ଭରଶୀଳ ହଜାର ହଜାର ପରିବାର ସକାଳୁ ଜଙ୍ଗଲକୁ ଯାଇ ସରଗୀ ଫୁଲ ସଂଗ୍ରହ କରୁଥିବା ବେଳେ, ସରକାରୀ କ୍ରୟ ବ୍ୟବସ୍ଥା ଅଭାବରୁ ସେମାନେ ଅଭାବୀ ବିକ୍ରି କରିବାକୁ ବାଧ୍ୟ ହେଉଛନ୍ତି। ଏହାର ସୁଯୋଗ ନେଇ ଦଲାଲ ଓ ବେସରକାରୀ ବ୍ୟବସାୟୀମାନେ କିଲୋ ପ୍ରତି ମାତ୍ର ୧୫ରୁ ୨୦ ଟଙ୍କା ଦରରେ ଫୁଲ କିଣି ନେଉଥିବା ଅଭିଯୋଗ ହୋଇଛି।
ବୀରମହାରାଜପୁର ବ୍ଲକର ଦୁର୍ଜନତୈଲା, ବହଳପଦର, ଖଣ୍ଡହତା, ସଂଗ୍ରାମପୁର ଓ ପିତାମହୁଲ ପଞ୍ଚାୟତ ସମେତ ୫୦ରୁ ଅଧିକ ଗ୍ରାମର ଲୋକେ ଏବେ ବନଜାତ ଦ୍ରବ୍ୟ ସରଗୀ ଫୁଲ ସଂଗ୍ରହରେ ନିୟୋଜିତ ଅଛନ୍ତି। ସଂଗ୍ରହ ପରେ ଫୁଲକୁ ଶୁଖାଇ ଶାଳ ମଞ୍ଜି ସଂଗ୍ରହ କରାଯାଉଥିବା ବେଳେ, ଏହାର ସରକାରୀ କ୍ରୟ ବ୍ୟବସ୍ଥା ନଥିବାରୁ ସଂଗ୍ରହକାରୀମାନେ ଉପଯୁକ୍ତ ମୂଲ୍ୟ ପାଇପାରୁ ନାହାନ୍ତି।
ଗୁଦୁଗୁଦା ଗ୍ରାମର ରାତ୍ର ନାଏକଙ୍କ କହିବା ଅନୁଯାୟୀ, ସ୍ଥାନୀୟ ଦଲାଲମାନେ କିଲୋ ପ୍ରତି ୧୫ରୁ ୨୦ ଟଙ୍କା ଦରରେ ସରଗୀ ଫୁଲ କିଣି ନେଉଛନ୍ତି। ଅନ୍ୟପକ୍ଷରେ, ସରକାରଙ୍କ ପକ୍ଷରୁ ଏହାର ନ୍ୟୁନତମ ସହାୟକ ମୂଲ୍ୟ (ଏମଏସପି) କେତେ ରହିଛି ଏବଂ କେଉଁ ସଂସ୍ଥା କ୍ରୟ କରିବ, ସେ ସମ୍ପର୍କରେ ଗ୍ରାମାଞ୍ଚଳରେ କୌଣସି ସ୍ପଷ୍ଟ ସୂଚନା ପହଞ୍ଚିନାହିଁ।
ରାଜ୍ୟ ସରକାରଙ୍କ ଅଧୀନସ୍ଥ ଟ୍ରାଇବାଲ ଡେଭେଲପମେଣ୍ଟ କୋ-ଅପରେଟିଭ କର୍ପୋରେସନ ଅଫ ଓଡ଼ିଶା ଲିମିଟେଡ(ଟିଡିସିସିଓଏଲ୍) ମାଧ୍ୟମରେ ବନ ସୁରକ୍ଷା ସମିତି (ଭଏସଏସ), ସ୍ୱୟଂ ସହାୟକ ଗୋଷ୍ଠୀ କିମ୍ବା ପ୍ରାଥମିକ ବନଜାତ କ୍ରୟ କେନ୍ଦ୍ର ଦ୍ୱାରା ସରଗୀ ଫୁଲ କ୍ରୟ କରାଯିବାର ବ୍ୟବସ୍ଥା ଥିଲେ ମଧ୍ୟ, ସୁବର୍ଣ୍ଣପୁର ଜିଲାରେ ଏହାର କାର୍ଯ୍ୟକଳାପ ସମ୍ପର୍କରେ ଲୋକଙ୍କ ପାଖରେ କୌଣସି ସୂଚନା ନାହିଁ ବୋଲି ଭାଲୁଡୁଙ୍ଗୁରୀ ଗ୍ରାମର ସ୍ୱେଚ୍ଛାସେବୀ ଶେଷଦେବ ମାଝୀ କହିଛନ୍ତି।
ସ୍ଥାନୀୟ ଲୋକଙ୍କ ମତରେ, ଟିଡିସିସିଓଏଲ ଓ ଭିଏସଏସ ମାଧ୍ୟମରେ ଶୀଘ୍ର କ୍ରୟ କେନ୍ଦ୍ର ଖୋଲାଯାଇ ସରଗୀ ଫୁଲ କ୍ରୟ କରାଗଲେ ସଂଗ୍ରହକାରୀମାନେ ଉପଯୁକ୍ତ ମୂଲ୍ୟ ପାଇପାରିବେ। ଏହା ସହିତ ସରକାରଙ୍କ ପକ୍ଷରୁ ଏମଏସପି ଦର ସ୍ପଷ୍ଟ ଭାବେ ଘୋଷଣା ଓ ପ୍ରଚାର କରିବାକୁ ମଧ୍ୟ ଦାବି ଉଠିଛି।
ବଡ଼ବର୍ଡାକଟା ଗ୍ରାମର ଯୁବ ସ୍ୱେଚ୍ଛାସେବୀ ସୁଦାମ ଗାଈଗରିଆ କହିଛନ୍ତି, “ବୀରମହାରାଜପୁର ଅଞ୍ଚଳରେ ତୁରନ୍ତ ସରଗୀ ଫୁଲ କ୍ରୟ କେନ୍ଦ୍ର ଖୋଲାଯାଇ ସଂଗ୍ରହକାରୀଙ୍କଠାରୁ ଉଚିତ ମୂଲ୍ୟରେ କ୍ରୟ କରାଯାଉ। ନଚେତ୍ ଦଲାଲମାନେ ଲାଭବାନ ହେଉଥିବା ବେଳେ ପ୍ରକୃତ ହିତାଧିକାରୀ କ୍ଷତିଗ୍ରସ୍ତ ହେବେ।”
ସରଗୀ ଫୁଲ ସଂଗ୍ରହ ଋତୁ ଚାଲିଥିବା ବେଳେ ପ୍ରଶାସନ ଓ ସମ୍ପୃକ୍ତ ବିଭାଗ ତୁରନ୍ତ ହସ୍ତକ୍ଷେପ କରି ସୁବ୍ୟବସ୍ଥିତ କ୍ରୟ ବ୍ୟବସ୍ଥା କରିବାକୁ ସାଧାରଣରେ ଦାବି ହେଉଛି।
