ସାଉଥାମ୍ପଟନ, ୭।୭(ପି.ଟି.): ବୁଧବାରଠାରୁ ଆରମ୍ଭ ହେବାକୁ ଯାଉଛି ଇଂଲଣ୍ଡ-ଓ୍ବେଷ୍ଟଇଣ୍ଡିଜ ପ୍ରଥମ କ୍ରିକେଟ ଟେଷ୍ଟ। ଘରୋଇ ଇଂଲଣ୍ଡ ଦଳ ୩ ଫାଷ୍ଟ ବୋଲର ଜେମ୍ସ ଆଣ୍ଡରସନ, ଜୋଫ୍ରା ଆର୍ଚର ଓ ମାର୍କ ଉଡ୍ଙ୍କୁ ନେଇ ପଡ଼ିଆକୁ ଓହ୍ଲାଇବା ସମ୍ଭାବନା ରହିଛି। ଏ କ୍ଷେତ୍ରରେ ଅଭିଜ୍ଞ ପେସର ଷ୍ଟୁଆର୍ଟ ବ୍ରଡ୍ ଚୂଡ଼ାନ୍ତ ଏକାଦଶରୁ ବାଦ୍ ପଡ଼ିବେ। ‘ଦି ଗାର୍ଡିଆନ’ର ରିପୋର୍ଟ ଅନୁସାରେ ୮ ବର୍ଷ ମଧ୍ୟରେ ବ୍ରଡ୍ ପ୍ରଥମଥରପାଇଁ ଘରୋଇ ପରିବେଶରେ ଟେଷ୍ଟ ଖେଳିବାକୁ ବଞ୍ଚତ୍ତ ହେବା ସମ୍ଭାବନା ସୃଷ୍ଟି ହୋଇଛି। କାରଣ ଇଂଲଣ୍ଡ ମ୍ୟାନେଜମେଣ୍ଟ ପେସ୍ ବିଭାଗରେ ଆଣ୍ଡରସନଙ୍କ ସହ ଆର୍ଚର ଓ ଉଡ୍ ଏବଂ ଏକମାତ୍ର ଅଫ୍ ସ୍ପିନର ଡମ୍ ବେସ୍ଙ୍କୁ ନେଇ ପଡ଼ିଆକୁ ଓହ୍ଲାଇବାକୁ ଚିନ୍ତା କରୁଛି। ଅଧିନାୟକ ଦାୟିତ୍ୱ ସମ୍ଭାଳିବାକୁ ଯାଉଥିବା ବେନ୍ ଷ୍ଟୋକ୍ସ ଜଣେ ଅଲରାଉଣ୍ଡର। ସେ ଆବଶ୍ୟକ ସମୟରେ ବୋଲିଂ କରି ପେସରଙ୍କ ଉପରୁ ଚାପ ହଟାଇବା ଦକ୍ଷତା ରଖିଛନ୍ତି। ଉଭୟ ଆର୍ଚର ଓ ଉଡ୍ ଆହତ ସମସ୍ୟାରୁ ମୁକୁଳି ଏବେ ଫିଟ୍ ଅଛନ୍ତି। ନିକଟରେ ଶେଷ ହୋଇଥିବା ଓ୍ବାର୍ମଅପ୍ ଗେମ୍ରେ ଅନ୍ୟତମ ଅଲରାଉଣ୍ଡର କ୍ରିସ୍ ଓ୍ବକ୍ସ ଭଲ ଖେଳିଥିଲେ ହେଁ ପ୍ରଥମ ଟେଷ୍ଟରେ ସୁଯୋଗ ପାଇବା ସମ୍ଭାବନା କମ୍। ବ୍ରଡ୍ ଶେଷଥରପାଇଁ ୨୦୧୨ରେ ଓ୍ବେଷ୍ଟଇଣ୍ଡିଜ ବିପକ୍ଷରେ ଘରୋଇ ଗେମ୍ ମିସ୍ କରିଥିଲେ। ସେତେବେଳେ ତାଙ୍କୁ ବିଶ୍ରାମ ଦିଆ ଯାଇଥିଲା। କ୍ୟାରିୟରରେ ସେ ୪୮୫ଟି ଉଇକେଟ ନେଇ ଇଂଲଣ୍ଡର ସର୍ବାଧିକ ଉଇକେଟ ହାସଲକାରୀଙ୍କ ମଧ୍ୟରେ ଆଣ୍ଡରସନଙ୍କ ପଛକୁ ଦ୍ୱିତୀୟ ସ୍ଥାନରେ ରହିଛନ୍ତି। ଇଂଲଣ୍ଡ ନିକଟ ଭବିଷ୍ୟତରେ ଓ୍ବେଷ୍ଟଇଣ୍ଡିଜ ଓ ପାକିସ୍ତାନ ବିପକ୍ଷରେ ୩ଟି ଟେଷ୍ଟ ଖେଳିବ। ତେଣୁ ପେସରଙ୍କ କ୍ଷେତ୍ରରେ ଦଳ ରୋଟେଶନ ପଦ୍ଧତି ଅବଲମ୍ବନ କରିବ ବୋଲି ରିପୋର୍ଟରୁ ପ୍ରକାଶ।
