ନିିଶ୍ଚିନ୍ତକୋଇଲି,୬।୧୧(ଅଶୋକ କୁମାର ମହାପାତ୍ର): ନିଶ୍ଚିନ୍ତକୋଇଲି ବ୍ଲକ ୮ ନମ୍ବର କେନାଲ ଉପରେ ନିର୍ମାଣାଧୀନ ସେତୁ କାର୍ଯ୍ୟ ନିମ୍ନମାନର ହୋଇଥିବା ଅଭିଯୋଗ ହୋଇଛି। ଫଳରେ ସେତୁର ସ୍ଥାୟିତ୍ୱ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। କେନ୍ଦୁପାଟଣା ଜଳ ସମ୍ପଦ ବିଭାଗ ସହକାରୀ ନିର୍ବାହୀ ଯନ୍ତ୍ରୀଙ୍କ ଅଧୀନରେ ୮ ନମ୍ବର କେନାଲ ରହିଛି। ଏହି କେନାଲର ବୁହାଳୋ ପଞ୍ଚାୟତ ଅନ୍ତର୍ଗତ ଭୁବନଠାରେ ଉକ୍ତ ସେତୁ ନିର୍ମାଣ କରାଯାଇଛି। ସରକାରଙ୍କ ତରଫରୁ ଏହି ସେତୁ ନିର୍ମାଣ ପାଇଁ ପ୍ରଥମ ପର୍ଯ୍ୟାୟରେ ୧୪ ଲକ୍ଷ ଟଙ୍କା ମଞ୍ଜୁର କରାଯାଇଥିଲା। ତେବେ ସେତୁ ନିର୍ମାଣ ନିମନ୍ତେ କୌଣସି ସୂଚନା ଫଳକ ଲଗାଯାଇ ନ ଥିବା ସାଧାରଣରେ ଅଭିଯୋଗ ହୋଇଛି। ଫଳରେ ସେତୁ ନିର୍ମାଣରେ ପ୍ରକୃତରେ କେତେ ଟଙ୍କା ମଞ୍ଜୁର ହୋଇଛି ସେ ସମ୍ପର୍କରେ ସ୍ଥାନୀୟ ଲୋକଙ୍କ ମନରେ ସନ୍ଦେହ ପ୍ରକାଶ ପାଇଛି।
ଟେଣ୍ଡର ଅନୁଯାୟୀ ଏହି ସେତୁ ନିର୍ମାଣ ନିମନ୍ତେ ଠିକାଦାର ଚୟନ କରାଯାଇଥିଲା। ମାତ୍ର ସମ୍ପୃକ୍ତ ଠିକାଦାର ଅଟକଳ ଅନୁଯାୟୀ ଏହି ସେତୁ ନିର୍ମାଣ କରି ନ ଥିବା ଅଭିଯୋଗ ହୋଇଛି। ନିର୍ମାଣ କାର୍ଯ୍ୟରେ ଅତ୍ୟନ୍ତ ନିମ୍ନମାନର ସାମଗ୍ରୀ ବ୍ୟବହାର କରାଯାଇଥିବା ସ୍ଥାନୀୟ ଲୋକେ ନାମ ଗୋପନ ରଖି କହିଛନ୍ତି।
ଅପରପକ୍ଷରେ ଏହି ସେତୁରେ ଗମନାଗମନ ନିମନ୍ତେ କୌଣସି ସଂଯୋଗୀକରଣ ରାସ୍ତା ନିର୍ମାଣ କରାଯାଇ ନାହିଁ। ଫଳରେ ଏହି ସେତୁ ଦେଇ ସ୍ଥାନୀୟ ଲୋକେ ଯାତାୟାତ କରିପାରୁ ନ ଥିବା କହିଛନ୍ତି। ସେହିପରି ଏହି ସେତୁ ପାର୍ଶ୍ୱରେ ଥିବା ଗାର୍ଡୱାଲ ନିକଟରେ ଭୁଶୁଡି ପଡ଼ିିଥିଲା। ଏସମ୍ପର୍କରେ ରାଜ୍ୟର ପ୍ରମୁଖ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ଜଳ ସମ୍ପଦ ବିଭାଗ ପକ୍ଷରୁ ତପତ୍ରତା ପ୍ରକାଶ ପାଇଛି। ଲକ୍ଷ ଲକ୍ଷ ଟଙ୍କା ବ୍ୟୟରେ ଗାର୍ଡୱାଲ ନାମକୁ ମାତ୍ର ନିର୍ମାଣ କରାଯାଇଥିଲା ବେଳେ କେନାଲ ବନ୍ଧ ଏବେବି ବିପଦ ସଙ୍କୁଳ ଅବସ୍ଥାରେ ରହିଥିବା ଅଭିଯୋଗ ହୋଇଛି। ଫଳରେ ଯେକୌଣସି ସମୟରେ ବନ୍ଧ ଭୁଶୁଡିବା ଆଶଙ୍କାକୁ ଏଡାଇ ଦିଆଯାଇନପାରେ ବୋଲି ସାଧାରଣରେ ମତ ପ୍ରକାଶ ପାଇଛି। ଠିକାଦାର ନିର୍ମାଣ କରିଥିବା ସେତୁ ଓ ଗାର୍ଡ ୱାଲର କାର୍ଯ୍ୟର କୌଣସି ବିଭାଗୀୟ ଅଧିକାରୀ ତଦାରଖ କରି ନ ଥିବା ଅଭିଯୋଗ ହୋଇଛି।
ଏସମ୍ପର୍କରେ କେନ୍ଦୁପାଟଣା ଜଳ ସମ୍ପଦ ବିଭାଗ ସହକାରୀ ନିର୍ବାହୀଯନ୍ତ୍ରୀ ଅକ୍ଷୟ କୁମାର ମଲିକଙ୍କୁ ପଚାରିବାରୁ ଏହି ସେତୁ ପାଇଁ ମଞ୍ଜୁର ହୋଇଥିବା ଅର୍ଥ ଯଥେଷ୍ଟ ନୁହେଁ । ଅଧିକ ଅର୍ଥ ମଞ୍ଜୁର ହୋଇ ଆସିଲେ ସେତୁ ଓ ଗାର୍ଡୱାଲକୁ ପୁନର୍ବାର ନିର୍ମାଣ କରାଯିବ ବୋଲି ସେ ପ୍ରକାଶ କରିଛନ୍ତି।
