ଆବଶ୍ୟକ ସାମଗ୍ରୀ
ଆଳୁ- ୫ଟି, ବ୍ରେଡ- ୧୨ଟି, କଞ୍ଚାଲଙ୍କା-୨ଟି, ଧନିଆପତ୍ର- ଅଳ୍ପ, ଧନିଆ ଗୁଣ୍ଡ- ୧ ଚାମଚ, ଆମଚୁର ପାଉଡର- ଅଧା ଛୋଟ ଚାମଚ, ଲଙ୍କାଗୁଣ୍ଡ- ଅଧା ଛୋଟ ଚାମଚ, ଗରମ ମସଲା- ଅଧା ଛୋଟ ଚାମଚ, ଛାଣିବା ପାଇଁ ତେଲ, ଆବଶ୍ୟକ ଅନୁସାରେ ଲୁଣ।
ପ୍ରଣାଳୀ- ପ୍ରଥମେ ଆଳୁକୁ ପ୍ରେସର କୁକରରେ ସିଝାଇ ଦିଅନ୍ତୁ। ସିଝିଗଲା ପରେ ଆଳୁରୁ ଚୋପା ଛଡାଇ ଚକଟି ରଖି ଦିଅନ୍ତୁ। ଏବେ ଗ୍ୟାସରେ ପ୍ୟାନ୍ ଗରମ କରି ସେଥିରେ ୧ ଚାମଚ ତେଲ ପକାନ୍ତୁ। ତେଲ ଗରମ ହେଲେ ସେଥିରେ କଞ୍ଚାଲଙ୍କାକୁ ଛୋଟ ଛୋଟ କାଟି ପକାନ୍ତୁ। ଏହାପରେ ଧନିଆଗୁଣ୍ଡ ପକାନ୍ତୁ। ଅଳ୍ପ ଭାଜି ହୋଇଗଲେ ସେଥିରେ ଚକଟା ହୋଇ ଥିବା ଆଳୁ ପକାନ୍ତୁ। ଆଳୁରେ ଲୁଣ, ଆମଚୁର ପାଉଡର, ଲଙ୍କାଗୁଣ୍ଡ, ଗରମ ମସଲା ପକାଇ ଭଲଭାବେ ମିଶାନ୍ତୁ। ଏବେ ପ୍ୟାନକୁ ଚୁଲିରୁ ଓହ୍ଲାଇ ସେଥିରେ ଧନିଆ ପତ୍ରକୁ କାଟି ପକାଇ ଦିଅନ୍ତୁ। ଏବେ ଏହି ଆଳୁ ମସଲାକୁ ଥଣ୍ଡା ହେବା ପାଇଁ ଛାଡି ଦିଅନ୍ତୁ। ଥଣ୍ଡା ହେବା ପରେ ଏହାକୁ ଛୋଟ ଛୋଟ ଅଣ୍ଡା ଆକାରର ଗୁଳା କରି ରଖନ୍ତୁ।
ଏବେ ବ୍ରେଡର ଚାରିକଡ଼କୁ କାଟି ଦିଅନ୍ତୁ। ଅନ୍ୟ ଏକ ପାତ୍ରରେ କିଛି ପାଣି ନିଅନ୍ତୁ। ସେହି ପାଣିରେ ପ୍ରଥମେ ବ୍ରେଡକୁ ବୁଡାଇ ସଙ୍ଗେ ସଙ୍ଗେ ଉଠାଇ ଦିଅନ୍ତୁ। ଦୁଇ ହାତରେ ଚାପି ବ୍ରେଡରେ ଥିବା ଅତିରିକ୍ତ ପାଣିକୁ ବାହାର କରି ଦିଅନ୍ତୁ। ବ୍ରେଡ ଉପରେ ଅଣ୍ଡାଶେପ୍ ଥିବା ଆଳୁକୁ ରଖି ବ୍ରେଡର ଚାରିକଡ଼କୁ ଭଲଭାବେ ଚାପି ଦିଅନ୍ତୁ। ଏହିପରି ସବୁ ଆଳୁକୁ ରୋଲ୍ ଶେପ୍ ଦିଅନ୍ତୁ। କଡେଇରେ ତେଲ ଗରମ କରି ବ୍ରେଡ ରୋଲ ସବୁକୁ ବାଦାମୀ ହେବା ଯାଏ ଛାଣି ଦିଅନ୍ତୁ। ଏହାକୁ ଶସ୍ କିମ୍ବା ଚଟଣୀ ସହିତ ଖାଆନ୍ତୁ ଭଲ ଲାଗିବ।
