ସାଓପାଓଲୋ,୨୮ା୪(ପି.ଟି): ବ୍ରାଜିଲିଆନ୍ ଫୁଟ୍ବଲ କିମ୍ବଦନ୍ତୀ ପେଲେଙ୍କ ନାମକୁ ବର୍ତ୍ତମାନ ଶବ୍ଦକୋଷରେ ସାମିଲ କରାଯାଇଛି। ‘ପେଲେ’ ଶବ୍ଦକୁ ଏକ ବିଶ୍ଳେଷଣ ଭାବେ ବ୍ୟବହାର କରାଯାଉଥିବା ବେଳେ ଏହାକୁ ଶ୍ରେଷ୍ଠର ପ୍ରତିଶବ୍ଦ ବୋଲି ମଧ୍ୟ କୁହାଯାଇଛି। ଏହା ସହିତ ସ୍ବତନ୍ତ୍ର ଶବ୍ଦ ପାଇଁ ମଧ୍ୟ ଏହାର ବ୍ୟବହାର କରାଯିବ। ବୁଧବାର ‘ମାଇକେଲ୍ସ ଡିକ୍ସନାରି’ ପକ୍ଷରୁ ପେଲେଙ୍କ ପାଇଁ ଏକ ଦସ୍ତଖତ ଅଭିଯାନ କରାଯାଇଥିଲା, ଯହିଁରେ ୧ ଲକ୍ଷ ୨୫ ହଜାର ଲୋକ ସାମିଲ ହୋଇଥିଲେ। ୩ଥର ବିଶ୍ୱକପ୍ ଚାମ୍ପିୟନ ପେଲେ ଡିସେମ୍ବର ୨୦୨୨ରେ ପ୍ରାଣ ହରାଇଥିଲେ।
ଶବ୍ଦକୋଷରେ ଦିଆଯାଇଥିବା ସଂଜ୍ଞା ଅନୁଯାୟୀ ପେଲେ ଶବ୍ଦର ପରିଭାଷା ହେଉଛି, ସେହି ବ୍ୟକ୍ତି ଯିଏ ଅସାଧାରଣ, ଗୁଣବତ୍ତାରେ ଶ୍ରେଷ୍ଠ, ଯାହାଙ୍କ ଶ୍ରେଷ୍ଠତ୍ୱ ସହ କେହି ସମାନ ହୋଇପାରିବେ ନାହିଁ। ଏହାସହିତ ଏହି ଶବ୍ଦଟି ଏଡସନ୍ ଆରାଣ୍ଟେସ୍ ଡୋ ନାସିମେଣ୍ଟୋଙ୍କ ଡାକନାମ ବୋଲି ମଧ୍ୟ ଶବ୍ଦକୋଷରେ ଉଲ୍ଲେଖ ରହିଛି। ବିଶ୍ୱର ସର୍ବକାଳୀନ ଶ୍ରେଷ୍ଠ ଆଥଲେଟ୍ ଅତୁଳନୀୟ, ବିରଳ। ଏହି ଶବ୍ଦକୁ ଶ୍ରେଷ୍ଠତ୍ୱର ଉଦାହରଣ ପାଇଁ ବ୍ୟବହାର କରାଯିବ ବୋଲି ମଧ୍ୟ କୁହାଯାଇଛି। ସାଣ୍ଟୋସ୍ ଏଫ୍ସି ନାମକ ଏକ କ୍ଲବ୍ରେ ପେଲେ ନିଜ କ୍ୟାରିୟରର ସର୍ବାଧିକ ସମୟ ଖେଳିଥିଲେ। ସେଠାରେ ଥିବା ଦି ପେଲେ ଫାଉଣ୍ଡେଶନ ପକ୍ଷରୁ ଏହି ପ୍ରକ୍ରିୟା ଆରମ୍ଭ କରାଯାଇଥିଲା। ପୂର୍ବରୁ କେବଳ ଦୃଷ୍ଟାନ୍ତ ମାଧ୍ୟମରେ ଶ୍ରେଷ୍ଠତ୍ୱକୁ ପେଲେଙ୍କ ସହ ତୁଳନା କରାଯାଉଥିବା ବେଳେ ପ୍ରଥମଥର ପାଇଁ ଏହାକୁ ଶବ୍ଦକୋଷରେ ସାମିଲ କରାଯାଇଛି।
