ଢେଙ୍କାନାଳ ଅଫିସ, ୧୫।୮:ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ଅବପାତର ରୂପ ନେଇଛି। ଏହାର ପ୍ରବାହରେ ୩ ଦିନ ହେଲା ଜାରି ରହିଥିବା ଲଗାଣ ବର୍ଷାରେ ଫୁଲି ଉଠିଛି ଓଡ଼ିଶାର ଦ୍ୱିତୀୟ ବୃହତ୍ତମ ନଦୀ ବ୍ରାହ୍ମଣୀ। ଫଳରେ ଢେଙ୍କାନାଳ ଜିଲାର ନଦୀକୂଳିଆ ଓ ତଳିଆ ଅଞ୍ଚଳରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ପଛକୁ ପଛ ଆଉ ଦୁଇଟି ଲଘୁଚାପ ଆସୁଥିବାବେଳେ ସ୍ଥିତି ସଙ୍ଗୀନ ହେବା ଆଶଙ୍କାକୁ ଏଡ଼ାଇ ଦିଆଯାଇପାରୁନାହିଁ। ବ୍ରାହ୍ମଣୀ ଫୁଲୁଥିବାରୁ ସଦର, ଓଡ଼ାପଡ଼ା, ଗଁଦିଆ, ପରଜଙ୍ଗ, କାମାକ୍ଷାନଗର, ଭୁବନ ବ୍ଲକର ନଦୀକୂଳିଆ ଗ୍ରାମରେ ବନ୍ୟାଜଳ ପ୍ରବେଶ ଆଶଙ୍କା ରହିଛି।
ଉପରମୁଣ୍ଡରେ ପ୍ରବଳ ବର୍ଷା ଯୋଗୁ ବ୍ରାହ୍ମଣୀ ନଦୀର ଜଳପତ୍ତନ କ୍ରମାଗତ ବୃଦ୍ଧି ପାଇବାରେ ଲାଗିଛି। ବିଭିନ୍ନ ସ୍ଥାନରେ ନଈ ଉଛୁଳିଛି। ଓଡ଼ାପଡ଼ା ବ୍ଲକର ଖୁଣ୍ଟଝରୀ ପଞ୍ଚାୟତ ବିଦାବନ୍ଧ, ଗୁଣ୍ଡିଚାପଡା ପଞ୍ଚାୟତ ବେଶାଳିଆ ଗ୍ରାମ ରାସ୍ତାର କଲଭର୍ଟ ଉପରେ ବଡଯୋରା ନାଳ ଉଛୁଳି ୩ଫୁଟ ଉଚ୍ଚତାର ବନ୍ୟା ପାଣି ଚାଲୁଛି। ଉଭୟ ଗ୍ରାମ ସହ ଢେଙ୍କାନାଳ ସହରକୁ ଯୋଗାଯୋଗ ବିଚ୍ଛିନ୍ନ ହୋଇଯାଇଛି। ଖୁଣ୍ଟଝରୀ, ବଳଭଦ୍ରପୁର, କୋରେଇଗାଡିଆ, ବେଶାଳିଆ ଗ୍ରାମବାସୀଙ୍କ ସମସ୍ୟା ବଢ଼ିଛି। ଜରୁରିକାଳୀନ ସେବା ସାଙ୍ଗକୁ ଯାତାୟାତ ଠପ୍ ହୋଇଯାଇଛି। ଜିଲା ଚିକିତ୍ସାଳୟକୁ ଆମ୍ବୁଲାନ୍ସ ଆସିବାରେ ସମସ୍ୟା ଉପୁଜିଛି। ଜିଲା ପ୍ରଶାସନ ସମ୍ଭାବ୍ୟ ବନ୍ୟା ପ୍ରଭାବିତ ଅଞ୍ଚଳବାସୀଙ୍କୁ ଯୁଦ୍ଧକାଳୀନ ଭିତ୍ତିରେ ଥଇଥାନ କରିବାକୁ ବିଦାବନ୍ଧ ଗ୍ରାମର ଅଜୟ କୁମାର ନାୟକ, ଲିଟନ ସାହୁ, ଜିତେନ୍ଦ୍ର ରାଉତ ପ୍ରମୁଖ ଦାବି କରିଛନ୍ତି ା
ଏ ସଂକ୍ରାନ୍ତରେ ଜିଲା ଜରୁରୀ ଓ ଆପାତକାଳୀନ ଅଧିକାରୀ ସ୍ନିଗ୍ଧାଛାୟା ମହାପାତ୍ର କୁହନ୍ତି, ପରିସ୍ଥିତି ଉପରେ ନଜର ରଖାଯାଇଛି। ସମସ୍ତ ସ୍ଥିତିର ମୁକାବିଲା ପାଇଁ ପ୍ରଶାସନ ସଜାଗ ରହିଛି। ବର୍ଷା ଯୋଗୁ ଓଡାପଡ଼ା ବ୍ଲକର ଜଣେ ବ୍ୟକ୍ତିଙ୍କ ଘର ଆଂଶିକ ଭାଙ୍ଗିଛି। ତାଙ୍କୁୁ ସହାୟତା ପ୍ରଦାନ କରାଯାଇଛି।
