ମୁମ୍ବାଇରେ ବଲିଉଡର ପ୍ରସିଦ୍ଧ ଫିଲ୍ମ ନିର୍ମାତା ତଥା ନିର୍ଦ୍ଦେଶକ ବି.ଆର ଚୋପ୍ରାଙ୍କ ବଙ୍ଗଳା ବିକ୍ରି ହୋଇଛି। ୨୫,୦୦୦ ବର୍ଗଫୁଟ ଜମିରେ ନିର୍ମିତ ଏହି ବଙ୍ଗଳା ଜୁହୁ ଅଞ୍ଚଳରେ ଏକର ଜମିରେ ବ୍ୟାପିଛି। ଏହା ୧୮୩ କୋଟି ଟଙ୍କାରେ ବିକ୍ରି ହୋଇଛି। ଜଣେ ରିଏଲ ଇଷ୍ଟେଟ ଡେଭଲପର୍ ରବି ଚୋପ୍ରାଙ୍କ ସ୍ତ୍ରୀ ତଥା ବି.ଆର ଚୋପ୍ରାଙ୍କ ବୋହୂ ରେଣୁ ଚୋପ୍ରାଙ୍କଠାରୁ ବଙ୍ଗଳା କିଣିଛନ୍ତି। ଏଠାରେ ଏକ ପ୍ରିମିୟମ ଆବାସିକ ପ୍ରକଳ୍ପ ନିର୍ମାଣ ହେବାର ଯୋଜନା ରହିଛି।
୨୨ ଏପ୍ରିଲ ୧୯୧୪ ରେ ଜନ୍ମ ହୋଇଥିବା ବଳଦେବ ରାଜ ଚୋପ୍ରାଙ୍କ ଫିଲ୍ମ ପ୍ରତି ଆଗ୍ରହ ଥିଲା। ସେ ଏକ ଫିଲ୍ମ ସାମ୍ବାଦିକ ଭାବରେ କ୍ୟାରିୟର୍ ଆରମ୍ଭ କରିଥିଲେ। ବିଭାଜନ ପରେ ସେ ଦିଲ୍ଲୀ ଏବଂ ପରେ ମୁମ୍ବାଇ ପଳାଇଥିଲେ। ୧୯୪୯ ରେ, ସେ ତାଙ୍କର ପ୍ରଥମ ଫିଲ୍ମ ‘କରୱାଟ’ ର ପ୍ରଯୋଜନା କରିଥିଲେ। ଏହା ଫ୍ଲପ ହୋଇଥିଲା। ୧୯୫୧ରେ, ସେ ‘ଆଫସାନା’ ଫିଲ୍ମର ନିର୍ମାତା ତଥା ନିର୍ଦ୍ଦେଶକ ଭାବରେ ପୁନର୍ବାର ଭାଗ୍ୟ ପରୀକ୍ଷା କରିଥିଲେ। ଯାହା ବକ୍ସ ଅଫିସରେ ଏକ ମେଗା ହିଟ ହୋଇଥିଲା। ୧୯୫୫ ରେ, ସେ ନିଜର ଏକ ପ୍ରଡକ୍ସନ ହାଉସ, ବିଆର ଫିଲ୍ମସ ସ୍ଥାପନ କରିଥିଲେ। ତାଙ୍କର ପ୍ରଥମ ଫିଲ୍ମ ‘ନୟା ଦୌର’ ନିର୍ମାଣ ହୋଇଥିଲା। ଏହା ସୁପରହିଟ୍ ହୋଇଥିଲା। ସେ ୨୦୦୮ରେ ମୃତ୍ୟୁବରଣ କରିଥିଲେ। ବି.ଆର ଚୋପ୍ରା ଟିଭି ଶୋ ’ମହାଭାରତ’ ଯୋଗୁ ହିଁ ବେଶ ପ୍ରସିଦ୍ଧ ହୋଇଥିଲେ।
