କେନ୍ଦୁଝର/ବଡ଼ବିଲ୭।୬(ନରେଶ ଚନ୍ଦ୍ର ପଟ୍ଟନାୟକ/ଜୟନ୍ତୀ ରଣା): କେନ୍ଦୁଝର ଜିଲା ବଡ଼ବିଲ ଥାନା ଅଧୀନ ଝାଡ଼ଗାଁରେ ଏକ ଜଘନ୍ୟ ହତ୍ୟାକାଣ୍ଡ ଘଟିଛି। ପ୍ରେମିକାଙ୍କୁ ଗଳାକାଟି ହତ୍ୟା ପରେ ପ୍ରେମିକ ଜଙ୍ଗଲରେ ପୋତିଦେଇଥିଲେ। ହତ୍ୟାକାଣ୍ଡର ୨୬ ଦିନ ପରେ ରବିବାର ପୋଲିସ ଘଟଣାର ପର୍ଦ୍ଦାଫାଶ କରିଛି। ଅଭିଯୁକ୍ତ ପ୍ରେମିକଙ୍କୁ ଗିରଫ କରିବା ସହ ମାଜିଷ୍ଟ୍ରେଟ୍ଙ୍କ ଉପସ୍ଥିତିରେ ଜଙ୍ଗଲରୁ ଗଳିତ ମୃତଦେହ (କଙ୍କାଳ) ଜବତ କରିଛି। ଅଭିଯୁକ୍ତଙ୍କୁ ନେଇ ଘଟଣାର ସିନ୍ ରିକ୍ରିଏଶନ କରାଯାଇଛି।
ମିଳିଥିବା ସୂଚନା ମୁତାବକ, ବଡ଼ବିଲ ଥାନା ଝାଡ଼ଗଁାରେ ରହୁଥିବା ଅନିତା ମହାକୁଡ଼ ମେ ୧୧ ତାରିଖ ସାରେ ନିଖୋଜ ହୋଇଯାଇଥିଲେ। ବିଭିନ୍ନ ସ୍ଥାନରେ ଖୋଜାଖୋଜି ପରେ ଅନିତାଙ୍କର କୌଣସି ସନ୍ଧାନ ନ ମିଳିବାରୁ ପରିବାର ପକ୍ଷରୁ ୧୪ ତାରିଖରେ ନିଖୋଜ ରିପୋର୍ଟ ଦିଆଯାଇଥିଲା। ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା।
ଅନିତାଙ୍କ ସହ ସେହି ଗ୍ରାମର ସଂଗ୍ରାମ ଆଲ୍ଡ଼ା ନାମକ ଯୁବକଙ୍କ ପ୍ରେମ ସମ୍ପର୍କ ଥିଲା। ଅନିତା ନିଖୋଜ ହେବାପରେ ସଂଗ୍ରାମଙ୍କ ହାବଭାବ ବଦଳିଯାଇଥିଲା। ପରିବାର ଲୋକେ ଏ ନେଇ ପୋଲିସକୁ କହିଥିଲେ। ରବିବାର ପୂର୍ବାହ୍ନରେ ପୋଲିସ ସଂଗ୍ରାମଙ୍କୁ ଥାନାକୁ ଆଣି ପଚରାଉଚରା କରିବାରୁ ଅନିତା ନିଖୋଜ ହେବା ପଛର ରହସ୍ୟ ଉନ୍ମୋଚିତ ହୋଇଥିଲା।
ଅନିତାଙ୍କୁ ପ୍ରେମିକ ସଂଗ୍ରାମ ନିକଟସ୍ଥ ଜଙ୍ଗଲକୁ ସାବେଳେ ଡାକିନେଇ ତଣ୍ଟିରେ ଛୁରି ଭୁସି ହତ୍ୟା କରି ସେଠାରେ ଛାଡ଼ି ଚାଲି ଆସିଥିଲେ। ରାତିରେ ମୃତଦେହକୁ ବାଇକ୍ ସମ୍ମୁଖରେ ରଖି ସେଠାରୁ ପ୍ରାୟ ୪ କି.ମି. ଦୂର ସିଦ୍ଧମଠ ସଂରକ୍ଷିତ ଜଙ୍ଗଲ କୋହ୍ଲରୋଇଦା ଜଙ୍ଗଲର ଉପର ପାଶର୍ବରେ ଥିବା ଏକ ଖାଲରେ ପୋତି ପତ୍ରରେ ଢାଙ୍କିଦେଇଥିଲେ। ଅନିତାଙ୍କ ଓଢ଼ଣି, ଚପଲ ଓ ଏକ ଛୋଟ ବାଲଟିକୁ ଅନ୍ୟ ଏକ ଖାଲରେ ପୋତିଦେଇଥିବା ସ୍ବୀକାର କରିଥିଲେ। ପୋଲିସ ଏ ନେଇ ଦୀର୍ଘ ୨୬ ଦିନ ପରେ ଅର୍ଥାତ୍ ରବିବାର ପରିବାର ବର୍ଗଙ୍କଠାରୁ ଅନ୍ୟ ଏକ ଏତଲା ନେଇ ବଡ଼ବିଲ ଥାନାରେ ହତ୍ୟା ମାମଲା(ନଂ. ୨୩୯/୨୦୨୬) ରୁଜୁ କରି ସଂଗ୍ରାମଙ୍କୁ ଗିରଫ କରିଥିଲା।
ଅଭିଯୁକ୍ତଙ୍କୁ ଘଟଣାସ୍ଥଳକୁ ନେଇ ହତ୍ୟାକାଣ୍ଡର ସିନ୍ ରିକ୍ରିଏଶନ କରିଛି। ଏଜିକ୍ୟୁଟିଭ ମାଜିଷ୍ଟ୍ରେଟ୍ ରାକେଶ ପଣ୍ଡାଙ୍କ ଉପସ୍ଥିତିରେ ଗଳିତ ମୃତଦେହ, ଓଢ଼ଣି, ଚପଲ ଓ ଛୋଟ ବାଲଟିକୁ ପୋଲିସ ଜବତ କରିଥିଲା। ପୋଲିସ ସାଇଣ୍ଟିଫିକ ଟିମ୍ ସହାୟତାରେ ତଦନ୍ତ ଜାରି ରଖିଥିବା ଥାନା ଅଧିକାରୀ ଅଶୋକ କୁମାର ନାୟକ କହିଛନ୍ତି।
