ମୁମ୍ବାଇ,୧୮।୨ : ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେ ନିର୍ବାଚନ ଆୟୋଗ ଏକନାଥ ଶିନ୍ଦେଙ୍କ ନେତୃତ୍ୱରେ ଗଠିତ ଦଳକୁ ପ୍ରକୃତ ଶିବସେନା ଭାବରେ ସ୍ବୀକୃତି ଦେବାର ଗୋଟିଏ ଦିନ ପରେ ଉଦ୍ଧବ ତାଙ୍କ ଦଳର ନେତାଙ୍କ ସହ ଏକ ଆଲୋଚନା କରିଛନ୍ତି। ଶିବସେନାର ନାମ ଓ ନିର୍ବାଚନ ଚିହ୍ନ ନେଇ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ନିର୍ବାଚନ ଆୟୋଗଙ୍କୁ ପୁଣି ଥରେ ଟାର୍ଗେଟ କରିଛନ୍ତି। ଶିବସେନାର ନିର୍ବାଚନ ଚିହ୍ନ ବିଷୟରେ ସେ କହିଛନ୍ତି, ଆମର ଧନୁଷ ଚୋରି ହୋଇଛି କିନ୍ତୁ ମାନୁଷ ଆମ ସହିତ ଅଛନ୍ତି।
ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିବାକୁ ଉଦ୍ଧବ ତାଙ୍କ ସମର୍ଥକଙ୍କୁ ନିବେଦନ କରିଛନ୍ତି । କାରଣ ତାଙ୍କ ବିରୋଧୀମାନେ ଯେକୌଣସି ସମୟରେ ନିର୍ବାଚନ ଘୋଷଣା କରିପାରନ୍ତି।
ଏହି ବୈଠକରେ ନିଷ୍ପତ୍ତି ନିଆଯାଇଛି ଯେ ପାର୍ଟି କର୍ମୀମାନେ ଘର ଘର ବୁଲି ଲୋକଙ୍କୁ ଜଣାଇବେ ଯେ ସେମାନଙ୍କ ନିର୍ବାଚନ ଚିହ୍ନ ଚୋରି ହୋଇଛି। ଦଳ ସମର୍ଥକଙ୍କୁ ଲୋକଙ୍କ ମଧ୍ୟରେ ଯିବାକୁ ନିବେଦନ କରିଛନ୍ତି। ଶିବସେନା କାହାର ବୋଲି ଜନସାଧାରଣ ନିଷ୍ପତ୍ତି ନେବେ ବୋଲି ସେ କହିଛନ୍ତି।
ପ୍ରଧାନମନ୍ତ୍ରୀ ଭାବନ୍ତି ଯେ ସେ ଶିବସେନାକୁ ଧ୍ୱଂସ କରିବେ କିନ୍ତୁ ଶିବସେନା କେବେବି ଶେଷ ହେବ ନାହିଁ। ବୈଠକରେ ଦଳର ଭବିଷ୍ୟତ କାର୍ଯ୍ୟକ୍ରମ ଉପରେ ମଧ୍ୟ ଆଲୋଚନା କରାଯାଇଥିଲା। ଏହି ସଭାରେ ଦଳର ନେତା ତଥା ମୁଖପାତ୍ରଙ୍କ ସମେତ ଶିବସେନା ଉଦ୍ଧବ ବାଲାସାହେବ ଦଳର ସମସ୍ତ ବଡ ନେତା ଅଂଶଗ୍ରହଣ କରିଥିଲେ। ଉଦ୍ଧବଙ୍କ ବାସଭବନ ମାତୋଶ୍ରୀ ଠାରେ ଏହି ସଭା ଅନୁଷ୍ଠିତ ହୋଇଥିଲା। ନିର୍ବାଚନ ଆୟୋଗଙ୍କର ନିଷ୍ପତ୍ତିକୁ ଶିବସେନା ଉଦ୍ଧବ ଠାକରେ ଦଳ ପାଇଁ ଏକ ବଡ଼ ପ୍ରତିବନ୍ଧକ ବୋଲି ବିବେଚନା କରାଯାଉଛି।
ସୁପ୍ରିମକୋର୍ଟରେ ଆୟୋଗଙ୍କର ନିଷ୍ପତ୍ତିକୁ ଚ୍ୟାଲେଞ୍ଜ କରିବାକୁ ଉଦ୍ଧବ କହିଛନ୍ତି। ଅନ୍ୟପକ୍ଷରେ ନିର୍ବାଚନ ଆୟୋଗର ନିଷ୍ପତ୍ତିକୁ ଲୋକଙ୍କ ସତ୍ୟ ଏବଂ ବିଜୟ ବୋଲି ଏକନାଥ ଶିନ୍ଦେ କହିଛନ୍ତି।
