ବ୍ରହ୍ମଗିରି,୬।୮(ଡି.ଏନ୍.ଏ.): କୃଷ୍ଣପ୍ରସାଦ ବ୍ଲକ ବ୍ରହ୍ମଗିରି ଥାନା ଅନ୍ତର୍ଗତ ଏକ ଚିଙ୍ଗୁଡି ଘେରିକୁ ନେଇ ସିଆରା ଗ୍ରାମରେ ଶୁକ୍ରବାର ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ସହ ବୋମା ମାଡ ହୋଇଛି। ଏହି ସଂଘର୍ଷରେ ୩ଜଣ ଆହତ ହେବା ସହିତ ପୋଲିସ ୪ ଜଣଙ୍କୁ ଅଟକ ରଖିଛି। ମିଳିଥିବା ସୂଚନା ଅନୁଯାୟୀ, ଉକ୍ତ ଥାନା ଅନ୍ତର୍ଗତ ସିଆରା ଗ୍ରାମ ନିକଟରେ ସାତମାଣ ଖାର ନାମକ ଏକ ଚିଙ୍ଗୁଡି ଘେରି ରହିଛି । ଏହି ଘେରିଟି ୩.୩୦ ଏକର ବିଶିଷ୍ଟ। ଉକ୍ତ ଘେରିରେ ୧୮ ପରିବାରଙ୍କ ମାଲିକାନା ରହିଛି। କିନ୍ତୁ ଏହି ୧୮ଟି ପରିବାର ରାଜନୈତିକ ବିବାଦକୁ ନେଇ ଦୁଇ ଗୋଷ୍ଠୀରେ ବିଭକ୍ତ ହୋଇଛନ୍ତି । ଗୋଟିଏ ଗୋଷ୍ଠୀରେ ୪ଟି ପରିବାର ରହିଥିବା ସମୟରେ ଅନ୍ୟ ଗୋଷ୍ଠୀରେ ୧୪ ପରିବାର ରହିଛନ୍ତି । ଏମାନଙ୍କ ମଧ୍ୟରେ ବିବାଦ ଥିବା ସମୟରେ ୪ ପରିବାର ବିଶିଷ୍ଟ ଗୋଷ୍ଠୀ ପ୍ରଥମେ ଏହି ଘେରିରେ ଚିଙ୍ଗୁଡି ଚାଷ କରିବା ପାଇଁ କିଳାପାଡି କରି ଶୁଭ ଦେଇଥିଲେ। ପରବର୍ତ୍ତୀ ସମୟରେ ୧୪ ପରିବାର ଗୋଷ୍ଠୀ ଏହି ଘେରିରେ ଶୁଭ ଦେବାରେ ଗୁରୁବାର ବିବାଦ ଉପୁଜିଥିଲା। ପୁନର୍ବାର ଏହି ଘଟଣାକୁ ନେଇ ଶୁକ୍ରବାର ଦୁଇ ଗୋଷ୍ଠୀ ମଧ୍ୟରେ ଆକ୍ରମଣ ଓ ପ୍ରତିଆକ୍ରମଣ ହୋଇ ଶେଷରେ ବୋମାମାଡ ହୋଇଥିଲା। ଏହି ବୋମା ମାଡ ଓ ଆକ୍ରମଣ ଯୋଗୁ ୩ ଜଣ ଆହାତ ହୋଇଛନ୍ତି। ଜଣଙ୍କ ଅବସ୍ଥା ଗୁରୁତର ଥିବାରୁ ପୁରୀ ଜିଲା ମୁଖ୍ୟ ଚିକିତ୍ସାଳୟକୁ ପଠାଯାଇଛି। ଖବର ପାଇ ବ୍ରହ୍ମଗିରି ପୋଲିସ ଘଟଣାସ୍ଥଳରେ ପହଞ୍ଚତ୍ ପରିସ୍ଥିତ ନିୟନ୍ତ୍ରଣ କରିବା ସହିତ ୪ ଜଣଙ୍କୁ ଅଟକ ରଖି ପଚରାଉଚରା କରୁଛି। ଗାଁରେ ଏକ ପ୍ଲାଟୁନ ପୋଲିସ ଫୋର୍ସ ମୁତୟନ ରହିଛନ୍ତି।
