ଖୋର୍ଦ୍ଧା ଅଫିସ, ୧୩।୮: ଖୋର୍ଦ୍ଧା ସଦର ଥାନା ଅଧୀନ ଦଳେଇପୁଟ ଗ୍ରାମର ହୃଦାନନ୍ଦ ସ୍ବାଇଁଙ୍କ ଘର ଉପରକୁ ବୋମାମାଡ଼ ହୋଇଛି। ଏଥିରେ ୨ଜଣ ଆହତ ହୋଇଛନ୍ତି। ଖବର ପାଇ ପୋଲିସ ପହଞ୍ଚି ଅଫୁଟା ବୋମା ଓ ହୃଦାନନ୍ଦଙ୍କ ଘରର କ୍ଷତିଗ୍ରସ୍ତ ଝରକାର କିଛି ଅଂଶ ଜବତ କରିଛି। ଏ ନେଇ ହୃଦାନନ୍ଦ ବୁଧବାର ଥାନାରେ ଲିଖିତ ଅଭିଯୋଗ କରିଛନ୍ତି। ଦାଦାବଟିକୁ କେନ୍ଦ୍ର କରି ବୋମାମାଡ଼ ହୋଇଥିବା ସେ ଏତଲାରେ ଦର୍ଶାଇଛନ୍ତି। ଥାନା ଅଧିକାରୀ ଅନିତା ସାହୁ କହିଛନ୍ତି, ଏ ସଂକ୍ରାନ୍ତରେ କେସ୍ ନଂ. ୧୩୮/୨୦ ରୁଜୁ ହୋଇଛି। ପୋଲିସ ସମ୍ପୃକ୍ତ ସ୍ଥାନର ସିସିଟିଭି ଫୁଟେଜ ଯାଞ୍ଚ କରି ତଦନ୍ତ ଜାରି ରଖିଛି। ଏହି ଘଟଣାରେ ଜଣଙ୍କୁ ଗିରଫ କରାଯାଇଛି। ସେ ହେଲେ ପ୍ରଦୀପ ବେହେରା ଓରଫ କାଳୁ (୨୭)। ଅନ୍ୟ ଅଭିଯୁକ୍ତମାନଙ୍କୁ ଧରିବା ପାଇଁ ଛାନ୍ଭିନ୍ ଚାଲିଛି।
ଅଭିଯୋଗରେ ଦର୍ଶାଯାଇଛି, ଦଳେଇପୁଟରେ ହୃଦାନନ୍ଦଙ୍କର ଦୁଇମହଲା କୋଠା ରହିଛି। ତଳେ ଭଡ଼ାଟିଆ ଓ ଉପର ମହଲାରେ ତାଙ୍କ ପରିବାର ରହୁଛନ୍ତି। ମଙ୍ଗଳବାର ରାତି ପ୍ରାୟ ୧୧ଟାରେ ତାଙ୍କ ପରିବାର ଲୋକେ ଖାଇ ସାରି ଶୋଇବାକୁ ଯାଉଥିଲେ। ଏହି ସମୟରେ ସେହି ଅଞ୍ଚଳର ୩ଜଣ ଯୁବକ ହଠାତ୍ ବାହାର ପାଚେରି ପଟୁ ସିରିଜ୍ ବୋମାମାଡ଼ କରି ଫେରାର ହୋଇଯାଇଥିଲେ। ୨ଟି ବୋମା ଝରକା କବାଟରେ ବାଜିଥିବାବେଳେ ଗୋଟିଏ ଅଫୁଟା ରହିଯାଇଥିଲା। ଭଡ଼ା ରହୁଥିବା ପରିବାରର ଦୁଇଜଣ ବ୍ୟକ୍ତି ବୋମାମାଡ଼ରେ ଆହତ ହୋଇଛନ୍ତି। କିଛିଦିନ ତଳେ ସେହି ଅଞ୍ଚଳର ଜଣେ ଦୁର୍ବୃତ୍ତ ଓ ତାଙ୍କ ସହଯୋଗୀ ହୃଦାନନ୍ଦଙ୍କ ଘର ପାଖ ଏକ ପାଚେରି ଭାଙ୍ଗି ଦେଇଥିଲେ। ପରେ ୧ ଲକ୍ଷ ଟଙ୍କା ବଟି ମାଗିଥିଲେ। ହୃଦାନନ୍ଦ ବଟି ଦେବାକୁ ମନା କରିବାରୁ ସେମାନେ ପରିବାର ଲୋକଙ୍କୁ ହତ୍ୟା ଧମକ ଦେଇଥିଲେ। ମଙ୍ଗଳବାର ପୁଣି ଥରେ ଆସି ଗାଳିଗୁଲଜ କରିବା ସହ ବଟି ମାଗିଥିଲେ। ଅମଙ୍ଗ ହେବାରୁ ବୋମା ପକାଇ ଉଡ଼ାଇ ଦେବାକୁ ଧମକ ଦେଇଥିଲେ ବୋଲି ଏତଲାରେ ଉଲ୍ଲେଖ ରହିଛି। ଅନ୍ୟପକ୍ଷରେ ଖୋର୍ଦ୍ଧା ସଦର ଥାନା ଅଞ୍ଚଳରେ ଆଇନଶୃଙ୍ଖଳା ପରିସ୍ଥିତି ବିପର୍ଯ୍ୟସ୍ତ ହୋଇପଡ଼ିଥିବା ଏବଂ ପୋଲିସକୁ ଅପରାଧୀ ଖୋଲା ଚ୍ୟାଲେଞ୍ଜ ଦେଉଥିବା ଏହି ଘଟଣାରୁ ସ୍ପଷ୍ଟ ହେଉଛି ବୋଲି ସାଧାରଣରେ ଆଲୋଚନା ଚାଲିଛି।
