ଲାଞ୍ଜିଗଡ଼,୮।୧୦(ରମେଶ ଚନ୍ଦ୍ର ନାୟକ): କଳାହାଣ୍ଡି ଜିଲା ଲାଞ୍ଜିଗଡ଼ ଥାନା ଛତ୍ରପୁର ପଞ୍ଚାୟତ ଭାଟଗୁଡ଼ା ଗାଁ ଶିବ ମନ୍ଦିର ନିକଟ ଏକ ବୁଲାଣିରେ ରବିବାର ଭାରସାମ୍ୟ ହରାଇ ଏକ ବୋଲେରୋ ଦୁର୍ଘଟଣା ଗ୍ରସ୍ତ ହୋଇଛି। ଏଥିରେ ଜୁନାଗଡ଼ ଥାନା କୁଟେନ ଗାଁର ବିରଞ୍ଚି ମାଝି (୪୫)ଙ୍କ ମୃତ୍ୟୁ ଘଟିଥିବା ବେଳେ ଆହତ ୪ଜଣଙ୍କୁ ଭବାନୀପାଟଣା ଜିଲା ମୁଖ୍ୟ ଚିକିତ୍ସାଳୟ ସ୍ଥାନାନ୍ତର କରାଯାଇଛି।
ମିଳିଥିବା ସୂଚନା ମୁତାବକ, ୫ଜଣ ଶ୍ରମିକ କମ୍ପାନୀରେ କାମ ସାରି କମ୍ପାନୀରେ ଭଡାରେ ଲାଗିଥିବା ଏକ ବୋଲେରୋରେ ଘରକୁ ଫେରୁଥିଲେ। ଭାଟଗୁଡା ଶିବ ମନ୍ଦିର ନିକଟରେ ବୋଲେରୋ ଭାରସାମ୍ୟ ହରାଇ ଓଲଟି ପଡ଼ିଥିଲା। ବୋଲେରୋରେ ବସିଥିବା ୫ଜଣ ଶ୍ରମିକଙ୍କ ମଧ୍ୟରୁ ବିରଞ୍ଚିଙ୍କ ମୃତ୍ୟୁ ଘଟିଛି। ଅନ୍ୟ ୪ଜଣ କେଟେନ ଗାଁର ଦୟାନିଧି ମାଝି ଓ ବଲାଙ୍ଗୀର ଜିଲାର ଜ୍ୟୋତିରଞ୍ଜନ କୁମାର, ଆଶୁତୋଷ କୁମାର, ଟିକଚନ ସେଠୀ ଗୁରୁତର ହୋଇଛନ୍ତି। ଖବର ପାଇ ଲାଞ୍ଜିଗଡ଼ ଥାନା ଅଧିକାରୀ ବିଜୟଲଷ୍ମୀ ହିକକାଙ୍କ ନେତୃତ୍ୱରେ ପୋଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ୫ଜଣଙ୍କୁ ଲାଞ୍ଜିଗଡ଼ ସିଏଚସିକୁ ଆଣିବା ପରେ ଡାକ୍ତର ବିରଞ୍ଚିଙ୍କୁ ମୃତ୍ୟୁ ଘୋଷଣା କରିଥିଲେ। ଅନ୍ୟ ୪ଜଣଙ୍କ ଅବସ୍ଥା ଗୁରୁତର ଥିବାରୁ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଲାଞ୍ଜିଗଡ଼ସ୍ଥିତ ବେଦାନ୍ତ ଲିମିଟେଡର ସହଯୋଗୀ କମ୍ପାନୀ ପିଏପିଏଲରେ କାମ କରୁଥିବା ୫ଜଣ ଶ୍ରମିକ ବୋଲି ଜଣାପଡିଛି। ବୋଲେରରେ ସ୍ଥାନୀୟ ହରେକୃଷ୍ଣପୁର ଗାଁର ରଘୁନାଥ ବିଶି ଡ୍ରାଇଭର ରହିଥିବା ବେଳେ ସେ ସୁରକ୍ଷିତ ଅଛନ୍ତି।
