ଶ୍ରୀନଗର,୧୮।୧୧: ଜମ୍ମୁ-କଶ୍ମୀରର ହାଇଦରପୋରା କମ୍ପ୍ଲେକ୍ସରେ ସୁରକ୍ଷାକର୍ମୀଙ୍କ ଗୁଳିରେ ଦୁଇ ଆତଙ୍କବାଦୀଙ୍କ ସହ ୨ ବ୍ୟବସାୟୀ ପ୍ରାଣ ହରାଇଥିଲେ। ଶ୍ରୀନଗର ପୋଲିସ ଉଭୟ ବ୍ୟବସାୟୀ (ମହମ୍ମଦ ଅଲତାଫ ଭଟ ଓ ଡ. ମୁଦାସିର ଗୁଲ)ଙ୍କୁ ଆତଙ୍କବାଦୀଙ୍କ ସହୟକ ବୋଲି କହିବା ସହ ସେମାନଙ୍କ ମୃତଦେହ ଫେରାଇବାକୁ ମନା କରି ଦେଇଥିଲା। କିନ୍ତୁ ପରିବାରବର୍ଗଙ୍କ ସହ ସ୍ଥାନୀୟ ଲୋକେ ପ୍ରବଳ ବିରୋଧ ପ୍ରଦର୍ଶନ ପରେ ଗୁରୁବାର ସନ୍ଧ୍ୟାରେ ଦୁଇ ବ୍ୟବସାୟୀଙ୍କ ମୃତଦେହ ଫେରାଇ ଦେବାକୁ ନିଷ୍ପତ୍ତି ନିଆଯାଇଛି। ମିଳିଥିବା ସୂଚନା ମୁତାବକ, କବରରୁ ଦୁହିଁଙ୍କ ମୃତଦେହ ବାହାର କରାଯାଇଛି। ପରବର୍ତ୍ତୀ ସମୟରେ ପରିବାରବର୍ଗକୁ ଶବ ହସ୍ତାନ୍ତର କରାଯିବ।
ପୂର୍ବରୁ ଉକ୍ତ ଏନ୍କାଉଣ୍ଟରର ମାଜିଷ୍ଟ୍ରେଟ୍ ସ୍ତରୀୟ ତଦନ୍ତ କରିବାକୁ ନିର୍ଦ୍ଦେଶ ଦେଇଥିଲେ ରାଜ୍ୟପାଳ ମନୋଜ ସିହ୍ନା। ଶ୍ରୀନଗରର ଡେପୁଟି କମିଶନର ମହମ୍ମଦ ଏଜାଜ ଅସାଦଙ୍କୁ ଅତିରିକ୍ତ ଜିଲା ମାଜିଷ୍ଟ୍ରେଟ୍ ଭାବେ ଏବଂ ଖୁର୍ଶିଦ ଅହମ୍ମଦ ଶାହାଙ୍କୁ ତଦନ୍ତ ଅଧିକାରୀ ଭାବେ ନିଯୁକ୍ତ କରାଯାଇଛି।
