ଭଞ୍ଜନଗର,୧୩।୯(ଡି.ଏନ.ଏ): ଲଘୁଚାପ ପ୍ରଭାବରେ ଗଞ୍ଜାମ ଜିଲା ଭଞ୍ଜନଗର ଅଞ୍ଚଳରେ ୩ ଦିନ ହେଲା ବର୍ଷା ହେଉଛି। ସୋମବାର ଦିନତମାମ ଲଗାଣ ବର୍ଷା ହୋଇଛି। ଫଳରେ ବୋଡ଼ାନଦୀ ବନ୍ୟାଜଳରେ ବେଲଗୁଣ୍ଠା ନିକଟ ଚଢ଼େୟାପଲ୍ଲୀଠାରେ ହୋଇଥିବା ଅସ୍ଥାୟୀ କଲଭର୍ଟ ଭାସିଯାଇଛି। ଏଥିଯୋଗୁ ବେଲଗୁଣ୍ଠା-ବୁଗୁଡ଼ା, ବେଲଗୁଣ୍ଠା-ଆସିକା ଯୋଗାଯୋଗ ବିଚ୍ଛିନ୍ନ ହୋଇପଡ଼ିଛି। ବୁଗୁଡ଼ା, ବାଲିପଦର ଏବଂ ଆମ୍ବପୁଆ ଯିବାକୁ ଚାହୁଁଥିବା ଲୋକଙ୍କୁ ବର୍ତ୍ତମାନ ଜଗନ୍ନାଥପ୍ରସାଦ ରୋଡ୍ ଦେଇ ଅଧିକ ୧୨ କି.ମି. ଯିବାକୁ ପଡ଼ୁଛି। ନୟାଗଡ଼ ଏବଂ କନ୍ଧମାଳ ଜିଲାର କେତେକ ଅଞ୍ଚଳରେ ପ୍ରବଳ ବର୍ଷା ହୋଇଥିବାରୁ ଉକ୍ତ ଅଞ୍ଚଳରୁ ଆସୁଥିବା ବନ୍ୟାଜଳ ବଡ଼ନଦୀ ଓ ବୋଡ଼ାନଦୀ ଦେଇ ପ୍ରବାହିତ ହେଉଛି। ତେଣୁ ଏହି ୨ଟି ନଦୀର ଜଳସ୍ତର ବୃଦ୍ଧି ପାଇଛି। ବଡ଼ନଦୀ ଜଳସ୍ତର ବୃଦ୍ଧି ପାଇଥିବାରୁ ବନ୍ୟା ଆଶଙ୍କାରେ ସନ୍ଧ୍ୟାରେ ବେଲଗୁଣ୍ଠା ବ୍ଲକ ଇଙ୍ଗିନାଠିର ତଳିଆ ଅଞ୍ଚଳରେ ରହୁଥିବା ଲୋକଙ୍କୁ ବିଡିଓ ଶଶୀଭୂଷଣ ରଥଙ୍କ ତତ୍ତ୍ୱାବଧାନରେ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଉଛି।
