ଢାକା,୧୩।୨: ଦୀର୍ଘ ୨୦ ବର୍ଷର ଅପେକ୍ଷାର ଅନ୍ତ ଘଟାଇ ବାଂଲାଦେଶ ଜାତୀୟତାବାଦୀ ଦଳ (BNP) ପୁଣି ଥରେ ଦେଶର ଶାସନ ଗାଦିକୁ ଫେରିବାକୁ ଯାଉଛି। ବାଂଲାଦେଶର ୧୩ତମ ସାଧାରଣ ନିର୍ବାଚନରେ ବିଏନପି ସଂଖ୍ୟାଗରିଷ୍ଠତା ହାସଲ କରି ଏକ ବୃହତ ବିଜୟ ଆଡ଼କୁ ଅଗ୍ରସର ହେଉଛି। ଦେଶର ଏହି ନିର୍ଣ୍ଣାୟକ ଜନାଦେଶ ବାଂଲାଦେଶର ରାଜନୈତିକ ଚିତ୍ରକୁ ସମ୍ପୂର୍ଣ୍ଣ ବଦଳାଇ ଦେଇଛି।
ତାରିଖ୍ ରହମାନଙ୍କ ନେତୃତ୍ୱରେ ବିଏନପି ଶେଷଥର ପାଇଁ ୨୦୦୧ରେ ନିର୍ବାଚନ ଜିତିଥିଲା। ବର୍ତ୍ତମାନର ଭୋଟ୍ ଗଣତି ଅନୁଯାୟୀ, ଦଳ ଏକତରଫା ବିଜୟ ହାସଲ କରିଛି। ସ୍ଥାନୀୟ ଗଣମାଧ୍ୟମର ରିପୋର୍ଟ ଅନୁସାରେ, ବିଏନପି ମେଣ୍ଟ ପ୍ରାୟ ୨୦୯ଟି ଆସନରେ ବିଜୟୀ ହେଉଥିବା ଜଣାପଡ଼ିଛି। ସରକାର ଗଠନ ପାଇଁ ଆବଶ୍ୟକ ୧୫୧ ଆସନର ସୀମାକୁ ଦଳ ସହଜରେ ଅତିକ୍ରମ କରିସାରିଛି।
ଅନ୍ୟପଟେ, ଜମାତ-ଇ-ଇସଲାମି ଦଳକୁ ଏହି ନିର୍ବାଚନରେ ଶକ୍ତ ଧକ୍କା ଲାଗିଛି। ସଦ୍ୟତମ ତଥ୍ୟ ଅନୁଯାୟୀ, ଦଳ ମାତ୍ର ୫୬ଟି ଆସନରେ ସୀମିତ ରହିଛି।
ସାଧାରଣ ନିର୍ବାଚନ ସହିତ ଅନୁଷ୍ଠିତ ଜନମତ ସଂଗ୍ରହରେ ମଧ୍ୟ ଜନସାଧାରଣ ‘ଜୁଲାଇ ଚାର୍ଟର’ ବା ସାମ୍ବିଧାନିକ ସଂସ୍କାର ପ୍ରସ୍ତାବକୁ ସମର୍ଥନ କରିଛନ୍ତି। ‘ଦି ଡେଲି ଷ୍ଟାର’ର ରିପୋର୍ଟ ଅନୁସାରେ, ପ୍ରାୟ ୭୨.୯ ପ୍ରତିଶତ ଭୋଟର ଏହି ସଂସ୍କାର ସପକ୍ଷରେ ମତ ଦେଇଛନ୍ତି।
ନିର୍ବାଚନ ପ୍ରକ୍ରିୟା ମୋଟାମୋଟି ଭାବେ ଶାନ୍ତିପୂର୍ଣ୍ଣ ରହିଥିଲେ ହେଁ, କେତେକ ସ୍ଥାନରେ ସଂଘର୍ଷ ଘଟି ପ୍ରାୟ ୭୦ରୁ ଅଧିକ ଲୋକ ଆହତ ହୋଇଛନ୍ତି। ବିଶେଷ କରି ନୋଆଖାଲି ଜିଲ୍ଲାର ହାତିଆରେ ବିଏନପି ଓ ନ୍ୟାସନାଲ ସିଟିଜେନ ପାର୍ଟିର କର୍ମୀଙ୍କ ମଧ୍ୟରେ ହୋଇଥିବା ଗଣ୍ଡଗୋଳରେ ୩୧ ଜଣ ଆହତ ହୋଇଛନ୍ତି। ସୁରକ୍ଷା ପାଇଁ ସାରା ଦେଶରେ ସେନା ଓ ପୋଲିସ ସମେତ ପ୍ରାୟ ୧୦ ଲକ୍ଷ ସୁରକ୍ଷାକର୍ମୀ ନିୟୋଜିତ ହୋଇଥିଲେ।
ସମଗ୍ର ବାଂଲାଦେଶରେ ୬୦.୬୯% ମତଦାନ ହୋଇଛି। ୩୦୦ରୁ ୨୯୯ଟି ଆସନରେ ମତଦାନ ହୋଇଛି, କେବଳ ଶେରପୁର-୩ ଆସନରେ ପ୍ରାର୍ଥୀଙ୍କ ମୃତ୍ୟୁ ଯୋଗୁଁ ନିର୍ବାଚନ ସ୍ଥଗିତ। ଦୀର୍ଘ ୩୦ ବର୍ଷ ମଧ୍ୟରେ ପ୍ରଥମ ଥର ପାଇଁ ଆୱାମୀ ଲିଗ୍ ବିନା ବାଂଲାଦେଶରେ ସାଧାରଣ ନିର୍ବାଚନ ଅନୁଷ୍ଠିତ ହୋଇଛି।
ନିର୍ବାଚନର ଫଳାଫଳକୁ ସ୍ୱୀକାର କରି ଜମାତ-ଇ-ଇସଲାମି ମୁଖ୍ୟ ଶଫିକୁର ରହମାନ କହିଛନ୍ତି ଯେ, ତାଙ୍କ ଦଳ ସକାରାତ୍ମକ ରାଜନୀତି କରିବ ଏବଂ କେବଳ ବିରୋଧ କରିବା ପାଇଁ ରାଜନୀତି କରିବ ନାହିଁ।
