ଟ୍ବଲରେ ଖୁବ୍ ଶୀଘ୍ର ‘ବ୍ଲୁ କାର୍ଡ’ କାର୍ଯ୍ୟକାରୀ ହେବାକୁ ଯାଉଛି। ଏହି ନୂଆ ନିୟମ ବିଶେଷକରି ରେଫରିଙ୍କୁ ସାହାଯ୍ୟ କରିବ। ରିପୋର୍ଟ ଅନୁସାରେ ଏକ ହ୍ୟାଣ୍ଡବଲ୍ ମ୍ୟାଚରେ ରେଫରି ମାର୍ଟିନ ଥୋଏନ୍ ବ୍ଲୁ କାର୍ଡ ନିୟମକୁ କାର୍ଯ୍ୟକାରୀ କରିଥିଲେ। ଏହାକୁ ପ୍ରଣୟନ କରି ଇଣ୍ଟରନ୍ୟାଶନାଲ ଆସୋସିଏଶନ ଫୁଟ୍ବଲ ବୋର୍ଡ (ଆଇଏଫ୍ଏବି) ଖେଳ ନିୟମରେ ଏକ ଐତିହାସିକ ପରିବର୍ତ୍ତନ ଆଣିବାକୁ ଯାଉଛି। ଏଥିରେ ରେଡ୍ କାର୍ଡ ତୁଳନାରେ ସ୍ବଳ୍ପ ଦଣ୍ଡର ବ୍ୟବସ୍ଥା ଥିଲେ ମଧ୍ୟ ଖେଳରେ ଏହା ଖୁବ୍ ପ୍ରଭାବ ପକାଇବ ବୋଲି ଆଶା କରାଯାଉଛି। ଜଣେ ଖେଳାଳିକୁ ବ୍ଲୁ କାର୍ଡ ଦିଆଗଲେ ସମ୍ପୃକ୍ତ ଖେଳାଳି ଖେଳରୁ ୧୦ ମିନିଟ୍ ପାଇଁ ସସ୍ପେଣ୍ଡ ହେବେ। ସମୟ ନଷ୍ଟ କରିବା ଉଦ୍ଦେଶ୍ୟରେ ଅଯଥା ଜାଣିଶୁଣି ଫାଉଲ ମାରିବା କିମ୍ବା ରେଫରିଙ୍କୁ ଅପମାନିତ କଲେ ସମ୍ପୃକ୍ତ ଖେଳାଳିଙ୍କୁ ବ୍ଲୁ କାର୍ଡ ମିଳିବ।
ଅନ୍ୟପକ୍ଷରେ ଆସନ୍ତା ସିଜନରେ ଲିଗ୍-୧ରେ ଆଉ ଏକ ନିୟମ ହ୍ବାଇଟ୍ କାର୍ଡର ପରୀକ୍ଷାମୂଳକ ବ୍ୟବହାର ଲାଗି ବିଚାର ଯୋଜନା ଚାଲିଛି। ବହୁ ମାସ ପୂର୍ବେ ଫ୍ରାନ୍ସ ପ୍ରଥମ ରାଷ୍ଟ୍ର ଭାବେ ଏହି ପ୍ରସ୍ତାବ ଦେଇଥିଲା। ଲିଗ୍-୧ରେ ଏହାକୁ ସୀମିତ ରଖିବା ପାଇଁ କହିଥିଲା। ଆଲୋଚନା ପରେ ଫ୍ରାନ୍ସ ୨୦୨୪-୨୫ ସିଜନରେ ପ୍ରଥମେ ନିଜ ଦେଶରେ ଏହି ନିୟମକୁ କାର୍ଯ୍ୟକାରୀ କରିବାକୁ ସ୍ଥିିର କରିଥିଲା। ମାତ୍ର ଆଇଏଫ୍ଏବି’ର ହସ୍ତକ୍ଷେପ ଯୋଗୁ ଏହି ନିୟମକୁ ବିଶ୍ୱବ୍ୟାପୀ ବିଭିନ୍ନ ପ୍ରତିଯୋଗିତାରେ ଲାଗୁ କରାଯାଇପାରେ। ବ୍ୟବହାରିକ ଦୃଷ୍ଟିରୁ ହକି ଖେଳ ଭଳି ଅନୁରୂପ ଫୁଟ୍ବଲରେ ବ୍ଲୁ କାର୍ଡକୁ ବ୍ୟବହାର କରାଯିବ। ନିୟମ ଉଲ୍ଲଂଘନର ମାତ୍ରାକୁ ବିଚାର କରି ରେଫରି ସମ୍ପୃକ୍ତ ଖେଳାଳିଙ୍କୁ କେତେ ସମୟ ପାଇଁ ପଡ଼ିଆ ବାହାରକୁ ଯିବାକୁ ହେବ ତାହା ସ୍ଥିର କରିବେ। ପ୍ରଥମ ପର୍ଯ୍ୟାୟରେ ଏହି ନୂଆ ନିୟମକୁ ଚାମ୍ପିୟନ୍ସ ଲିଗ୍ ଅବା ପ୍ରିମିୟମର ଲିଗ୍ ଓ ଲା ଲିଗା ଭଳି ନ୍ୟାଶନାଲ ଲିଗ୍ଗୁଡ଼ିକରେ ଲାଗୁ କରାଯାଇପାରେ। ବ୍ଲୁ କାର୍ଡ ନିୟମ ଲାଗୁ କରାଯିବା ସମ୍ପର୍କରେ ଆଇଏଫ୍ବି ତରଫରୁ ଖୁବ୍ ଶୀଘ୍ର ବିଧିବଦ୍ଧ ଘୋଷଣା କରାଯିବ ବୋଲି ଆଶା କରାଯାଉଛି।
